Zacchaeus, mei Otonaa Mugoo Poꞌii Gavaman
19
Jesus na dinaa Jericho ma talailao. 2 Na paꞌi hemea yei, harana Zacchaeus, hia famomoaa ei otonaa mugoo poꞌii gavaman ma na paꞌi watauda mugoo poꞌina. 3 Hia ba i fanunu ba Jesus ramaꞌa bata, maꞌuaa siꞌei ba namina welegui, loꞌe na fanunupaꞌi uaa fei gupuu ramaꞌa. 4 Siꞌei, na poninaa maꞌa ma faneaa hepalo figi sycamore ba i fanunuia, uaa Jesus fi talailao yei.5 I nopaꞌaloo fawelei Jesus, na arenaa pafea ma warenaa aꞌana, “Zacchaeus, upubatafagio. A guta humumu wagieni.” 6 Siꞌei, na poniꞌupu ma taufaꞌugia.
7 Minaa ei ramaꞌa, rona fanunuaa fei ma bababauꞌu, “Hia, ba iree gutafipui aꞌa hemea ‘hafeloꞌa.’”
8 Maꞌuaa, Zacchaeus na ufalarai ma warenaa aꞌa mei Fasu, “Mena Fasu, fanunu! Yeni ma eꞌeni a fani hesuwi wagii minaa ei manumanuu aꞌa ei lomi rona paꞌi. Ma nabaa una fafanaonaa hemea aꞌa hepalo manumanu, te, a hodiꞌia ma pafoinaa obaodiai.”
9 Jesus na warenaa aꞌana, “Wagieni, fei talaa telaꞌana na nomai aꞌa feni humu feni, uaa meni ramaꞌa meni, ana hemea naꞌuu Abraham. 10 Uaa mei Naꞌuu Ramaꞌa na nomai ba i labaginaa ei rona paꞌai ma fatelaꞌanaa roꞌou.”
Fei Warea Hanunuu Hefua Mugoo Poꞌi
11 Ei roi guguainaa fei, ina waredilao ma uꞌufanaa roꞌodu hepalo warea hanunu, uaa hia, na rafiꞌinaa Jerusalem ma ei ramaꞌa, rona naranara ba fei haparaiaa mei Haidaa ipaꞌaa sufudai eꞌeni. 12 Ina ware: “Na paꞌi hemea ramaꞌa, waninianamai aꞌa fei maroaa ei hapara. Ma na aununaa aꞌa hepalo gufu rauaa ba roꞌaa fania fei hapara ma nene, iwe hadiweꞌimai. 13 Siꞌei, ina lalaꞌaa hefua ei tameloina ma fanaa roꞌou hefua mugoo poꞌi.a Ina ware, ‘Hamonei bigifani fahononoo eni mugoo poꞌi hawina una hadiweꞌimai.’
14 “Maꞌuaa ei paniaa panina na bidi unuu roꞌou aꞌana ma rona aloaa hefiꞌa nenena ba ronei ware, ‘Lomi haiꞌouna nunuminaa meni ramaꞌa meni ba haparaa haiꞌodu.’
15 “Maꞌuaa inawe tonaa fei hapara ma hadiweꞌinaa gufuna. Ma na lalaꞌamii ei tameloina, ei i fani mugoo poꞌi aꞌa roꞌou ba i paꞌaa apaꞌia ba rona bigifani fahononona.
16 “Mei rawarawa na nomai ma ware ba, ‘Mena bauana, una bigipaꞌaa hefuadiai aꞌa fei mugoo poꞌimu.’
17 “Mei fasuna na ware, ‘Na rawani bigiꞌamu mena rawaniꞌa tameloiu! Ma siꞌei ba ona bigifarawani aꞌa ei pusuꞌo manumanu, oꞌaa omaꞌaa hefua baua gufu.’
18 “Na nomai mei fahelaguiaa tameloina ma ware, ‘Mena bauana, una bigipaꞌaa haipanidiai aꞌa fei mugoo poꞌimu.’
19 “Mei fasuna na ware, ‘Yoi omaꞌaa haipani baua gufu.’
20 “Ma i dii, na nomai hemeadiai tameloina ma ware, ‘Mena bauana, sifeni, feni mugoo poꞌimu; una sumia laloo hepalo pusuꞌo lawalawa. 21 Una mamaꞌauio, uaa yoi, hemea sibasiba ramaꞌa. Ona tonaa ei abaa augamu ma hufuꞌaa ei abaa faroamu.’
22 “Mei fasuna na ware, ‘A dududunaa yoi aꞌa ei wareamu, mena hafeloꞌa tameloiu! Yoi na aida ba yau hemea sibasiba ramaꞌa ba una tonaa ei abaa augau ma hufuꞌaa ei abaa faroau, na? 23 Nabaa ona aida, tani lomi ona aunaa humuu mugoo poꞌi ma una hadiweꞌimai i paꞌi fahononona?’
24 “Ma ina warenaa aꞌa ei rona ufalarai yei, ‘Tonaa fei mugoo poꞌina ma fanaa mei na paꞌi hefua mugoo poꞌi.’
25 “Rona ware, ‘Mena bauana, na paꞌidii hefua aꞌana!’
26 “Ina ware, ‘A warefanaa hamuꞌodu ba hini na paꞌi, mei fasuna i fani hefiꞌadiai aꞌana, maꞌuaa hemei lomi na paꞌi, tamanu maꞌidei hodihodiana, mei fasuna i tohadiweꞌinia aꞌana. 27 Maꞌuaa ei ramaꞌa na bidi unuu roꞌou aꞌau, ei lomi rona nunumiai ba unei haparainaa roꞌou—dugamii roꞌou yeni ma foꞌafamaꞌeaa roꞌou i pudau.’”
Fei Baua Niꞌeniꞌea aꞌa fei Waduꞌaiana
28 I waredigaa fei Jesus, nadoꞌo nonoꞌaununaa pafea, yei Jerusalem. 29 Ei fi nofarafiꞌinaa Bethphage ma Bethany aꞌa fei maugeni, harana Maugeni Olive, na aloaa helagui otalai nenerana ma warenaa aꞌa lagua, 30 “Aununaa aꞌa fei gufu i maꞌaa hamugua ma ena hamuna nowau, hamuꞌaa fanunupaꞌaa hepalo baubara hosi na fau yena, fena rotawe hugi pafona. Alagia ma foraiamai yeni. 31 Nabaa nemea na iꞌiginaa hamugua, ‘Tani hamuꞌaa alagia?’ warefania, ‘Mei Fasu na nunuminia.’”
32 Laguei, laguꞌadoꞌo nolao maꞌa, laguna paꞌia ana aleꞌei i wareia aꞌa lagua. 33 Laguꞌaa alaraa fei hosi, ei amaa fei, rona iꞌiginaa lagua, “Tani hamuꞌaa alaraa fei hosi?”
34 Laguna ware, “Mei Fasu na nunuminia.”
35 Laguna foranaa aꞌa Jesus ma augaa ei hawaa uguu lagua pafoo fei hosi ma fahuginaa Jesus pafona. 36 Ei fi ponilao, ei ramaꞌa, rona hafeninaa fei tala aꞌa ei hawaa uguu roꞌodu.
37 I nofarafiꞌimai aꞌa fei tala i upunaa fei Maugeni Olive, minaa fei gupuu ei otalai nenerana, namina niꞌeniꞌe ma laugifabauana uduginaa mei Haidaa aꞌa tamanu foigia rona fanunuia:
38 “Hawegia aꞌa mei hapara, mei i nomai wagii fei haraa mei Fasu!”
“Fei gutafarawania i pafea ma fei hawera aꞌa mei na Pafeai!”
39 Hefiꞌa ei Pharisee aꞌa fei gupuu ramaꞌa na warenaa aꞌa Jesus, “Feroia, sibaiaa ei otalai neneramu!”
40 Ina ware, “A warefanaa hamuꞌou, nabaa rona babanini, ei mugoo, roꞌaa lalaugi.”
41 I nofarafiꞌinaa Jerusalem ma fanunupaꞌaa fei gufu, na pasi uꞌugu ranuu pudana wagina 42 ma na ware, “Nunumiau ba hamonei aida tamanu i fagutafarawaninaa hamuꞌou wagieni—maꞌuaa eni, na opaꞌai pudaa hamuꞌou. 43 I nomai ei arewaa ba ena na bidi unuu roꞌou aꞌa hamuꞌou, roꞌaa ufaweloinaa gufuu hamuꞌou ma afi eꞌee pinee roꞌou ba ro tafanewaduꞌainaa gufuu hamuꞌou ma fifoꞌai aꞌa hamuꞌou. 44 Roꞌaa foꞌafapasinaa hamuꞌou pu, hamuꞌou ma ena naꞌuu hamuꞌou aꞌa ei humuu hamuꞌou. Lomi rowedii augaa neꞌaa mugoo pafoo hepalodiai, uaa lomi hamona fanunuꞌapaꞌaa fei noramiaa mei Haidaa aꞌa hamuꞌou.”
Jesus aꞌa Fei Humuu mei Haidaa
45 I dii, na dinaa malalaa fei humuu mei Haidaa ma teteaa ei roi aloꞌalo. 46 Ina warenaa aꞌa roꞌodu, “Na udedii fei neꞌia ‘Fei humuu, humuu lafulafua’; maꞌuaa hamona fafaia aleꞌei ‘waduu ei fafanao.’”