Fei Pao Tabaa Jesus i Bethany
12
Oloroa arewaa dufu ba i paꞌaa fei Talai Falogia ma Jesus na dinamii Bethany, fei gufuu Lazarus, mei na famamaꞌaia wagii fei maꞌea Jesus. 2 Ma rona bigiꞌaa hepalo hananaa ba roꞌaa farawaninaa Jesus. Martha na hasumaa ei duꞌua ma Lazarus, hia hemea ei na gutafapalagi aꞌa fei tawaa duꞌua. 3 Ma Mary na tonaa aleꞌei hesuwi litrea nard, hepalo paꞌaa dufaa pao, fei na rata ponoꞌana ma na igia pinee Jesus ma huguaa pinena aꞌa ei loaa tabana. Ma namina malelefarawani fei humu wagii fei dufaa pao.4 Maꞌuaa hemea ei otalai nenerana, Judas Iscariot, mei ba i aloia, na siba ba, 5 “Tani lomi ona aloaa fei pao dufa ma ei mugoo poꞌina o fanaa ei lomi manumanu? Ponoꞌana, aleꞌei ponoꞌaa hemea laloo heai igisimasi.” 6 Fei wareana fei, abaa na narapaꞌaa ei lomi manumanu, hamatee hia, fafanao; inaꞌaida omaꞌaiaa fei udeꞌudee mugoo poꞌi ma naꞌo totoꞌuaia.
7 Jesus na ware, “Apuna papaꞌaa mei pifine mei. Fei pao dufa i utofaꞌainau nopaꞌaloo fei iꞌifaiau. 8 Ranimai, ei lomi manumanu, roꞌou aꞌa hamuꞌou, maꞌuaa lomi ba a oa aꞌa hamuꞌou ranimai.
9 I dii, hepalo baua gupuu ei Jew, ronawe guainia ba Jesus, hia yei ma rona nomai ba roꞌaa maꞌaia ma ana ba roꞌaa maꞌa Lazarus, mei ina faꞌasiꞌania aꞌa fei maꞌea. 10 Siꞌei, ei famamoaa humuu mei Haidaa, ronawe nara ba ana roꞌaa foꞌafamaꞌeaa Lazarus, 11 uaa hamatee hia, watauda ei Jew rona dinaa aꞌa Jesus ma narafaweꞌi aꞌana.
Ina Nomai aleꞌei Hemea na Mua
12 I noꞌarewadilao, fei baua gupuu ramaꞌa na nomai aꞌa fei Hananaa ma guainia ba Jesus fi dinaa Jerusalem. 13 Rona tonaa ei aleꞌei rau niu ma dinaa aꞌana ma harofabauanai,
“Hosanna!”b
“Na paꞌi hawegiana mei i nomai aꞌa fei haraa mei Fasu!”
“Na paꞌi hawegiana mei Haparaa ei Israel!”
14 Jesus na bapaꞌaa hepalo baubara donkey ma na hugi pafona, aleꞌei ronadii neꞌinia,
15 “Apuna maꞌau, ena baduu pifine Zion;
maꞌaia, mei haparaa hamuꞌou na guta ma ponimai,
pafoo hepalo baubara donkey.”
16 Doꞌo famaꞌa ei otalai nenerana, lomi rona aida hanuu eꞌei. Nenee fei i todigaa fei hawerana Jesus, ronawe aida ba na udedii fei neꞌia wagii ei bigiꞌaa roꞌou aꞌana.
17 Ma fei gupuu ramaꞌa i aꞌana ei i faꞌasiꞌanaa Lazarus aꞌa fei huapu, ronaꞌu uꞌugia. 18 Watauda na dinaa aꞌana, uaa rona guainia ba na bigiꞌaa fei hilalaa foigia fei. 19 Siꞌei, ei Pharisee na fiwarewarei ba, “Doꞌo naraia. Aꞌa fei, minaa ei ramaꞌaa feni ano, rona aununaa aꞌana!”
Jesus nadii Wareꞌaugaa fei Maꞌeana
20 Ma na paꞌi hefiꞌa Greece dupuaa ei ba roꞌaa losui wagii fei Hananaa. 21 Rona bapaꞌaa Philip, mei gufuna Bethsaida yei Galilee ma na paꞌi iꞌigaiaa roꞌou aꞌana. Rona ware, “Haguꞌu, ba haiꞌou maꞌa Jesus.” 22 Philip naree warefanaa Andrew; Andrew mawe Philip, lagunaree warefanaa Jesus.
23 Jesus na ware, “Ina nodigimai fei paꞌaa au ba i to hawerana mei Naꞌuu Ramaꞌa. 24 A warefaꞌuai aꞌa hamuꞌou ba hepalo lau wheat, nabaa lomi i doꞌo pasinaa malagufu ma maꞌe, i udeꞌualao aleꞌei hepalo lau ua. Maꞌuaa, nabaa idoꞌo maꞌe, iwe paꞌi wataudadiai lau. 25 Mei ramaꞌa, mei i paꞌaa haguaa fei harenuana, iwe paꞌai aꞌana, maꞌuaa mei i fabidinaa ununa fei harenuana yeni ano, iwe paꞌia aꞌa fei harenua lomi i pedutoo. 26 Hini ba i nafii aꞌau, inei nenerau; ma naꞌaa yau hitani, mei nafiu ana hia yei. Hini mei i nafii aꞌau, mei Amau iwe fani honua aꞌana.
27 “Eꞌeni unamina naranara watauda ma ba a ware batanai? Aleꞌei ba ‘Mena Amau, hadumau aꞌa feni au feni’? Loꞌe, sifei fei paꞌafina ba na nopaꞌamii feni au feni. 28 Oꞌama, uduginaa fei haramu!”
Hepalo lao na norai pafea, “Una udugidigia ma awe udugidinia.” 29 Fei gupuu ramaꞌa yei na guainia ba aleꞌei baꞌaa parara; hefiꞌadiai, rona ware ba hemea aloꞌalo na wareware aꞌana.
30 Jesus na ware, “Fei lao fei, fararawanii hamuꞌou, aꞌa ba fararawaniu. 31 Eꞌeni, au dududuaa feni ano; eꞌeni a tetefaꞌasiꞌanaa mei haparaa feni ano. 32 Maꞌuaa ena una fatawa yeni malagufu, awe foraiamii minaa ei ramaꞌa aꞌau.” 33 Na wareaa fei ba i faꞌarewaia batanai fei mau maꞌeana.
34 Fei gupuu ramaꞌa, rona ware, “Haiꞌouna guainia aꞌa fei Law ba mei Christ,c iwe oamai ranimai ranimai ma siꞌei, tani o ware ba ‘Mei Naꞌuu Ramaꞌa nei fatawa’? Hini mei ‘Naꞌuu Ramaꞌa’ mei?”
35 Ma Jesus na warefanaa roꞌou, “Lomi i madii ma fena weꞌai aꞌa hamuꞌou i aunu. Hamoneidoꞌo tatalai ena ana hamofi paꞌi weꞌai, ena ataa nomai fei roromaa. Mei na tatalai wagii fei roromaa, lomi na aida ba i dinaia. 36 Augaa ei naranaraa hamuꞌou aꞌa fei weꞌai ei fidoꞌo ude i aꞌa hamuꞌou ba hamoꞌaa oanaa naꞌuu fei weꞌai.” I waredigaa eꞌei Jesus, ina aunu ma opaꞌai aꞌa roꞌou.
Fimina Waiwaiꞌualao Tabaa ei Jew
37 Jesus na bigiꞌaa ei hilalaa foigia i pudaa roꞌou, maꞌuaa ana lomi rona narafaweꞌi aꞌana. 38 Ina aleꞌei, ba ei wareaa mei mamamaꞌa Isaiah nei paꞌaa faꞌuai:
“Mena Fasu, hini na nara ba faꞌua ei wareaa haiꞌou?
Ma aꞌa hini na famaꞌaiaa fei panina mei Fasu?”
39 Aꞌa fei, lomi rona narafaweꞌi, uaa ana aleꞌei ei wareaa Isaiah hefawala ba:
40 “Ina fapudawerainaa roꞌou
ma famaꞌeaa ei naranaraa roꞌou
ba roneiꞌaa fanunupaꞌi,
o narapaꞌi,
o momoꞌai ba a fawanewaneaa roꞌou.”
41 Isaiah na ware aleꞌei hamatee ina fanunudii fei haweraa Jesus ma na uꞌugia.
42 Maꞌuaa aꞌa fei au fei, watauda rona narafaweꞌi aꞌana, ana dupuaa ei bauana. Maꞌuaa lomi rona ware ba rona narafaweꞌi, hamatee rona mamaꞌau ba ei Pharisee, roꞌaa faꞌasiꞌanaa roꞌou aꞌa fei synagogue; 43 uaa ronamina nunuminaa fei udugiaa ei ramaꞌa laraa fei udugiaa mei Haidaa.
44 I dii, Jesus na harofabauana, “Nabaa nemea i narafaweꞌi aꞌau, abaa ina narafaweꞌi ua i aꞌau, maꞌuaa aꞌa mei na aloagiau anaa. 45 Ena na fanunuau, ina fanunupaꞌaa mei na aloagiau. 46 Una nomai aꞌa feni ano aleꞌei weꞌai ba hini i narafaweꞌi aꞌau, lomi ba i oa aꞌa fei roromaa.
47 “Mei i guainaa ei wareau ma lomi i nenegia, lomi a dududuia. Uaa fei noramiau, aꞌa ba a dududuaa feni ano, maꞌuaa ba a fatelaꞌania. 48 Na paꞌi hemea ba i dududuaa mei i ofadugau ma lomi na guainaa wareau; ei unadii wareia, ana siꞌei iwe dududuia aꞌa fei aꞌapoo arewaa. 49 Uaa abaa fi wareaa ana yau, maꞌuaa mei Ama, mei na aloagiau, nadii warefanau tamanu nei wareia ma batanai na wareia. 50 Una aida ba ei wareana i fani harenua lomi i pedutoo. Siꞌei, tamanu na wareia, ana fi wareaa ei warefanaa mei Ama yau.”