Fei Fiwareipaꞌaia ba Roꞌaa Foꞌaiaa Jesus
26
Iꞌa warepedugaa ei manumanu ei Jesus, ina warenaa aꞌa ei otalai nenerana, 2 “Hamona aida ba i nomai fei Talai Falogia namafuo ma mei Naꞌuu Ramaꞌa roꞌaa fifaninia panii hefiꞌa ba roꞌaa fatawaia.”3 I dii, ei famamoaa humuu mei Haidaa ma ei bauaniaa gufu, rona figupui laloo humuu Caiaphas, mei paꞌaa bauaniaa humuu mei Haidaa 4 ma rona fiwareinaa hefiꞌa manitoai hafeloꞌa ba roꞌaa panarofaa Jesus ma foꞌafamaꞌeia. 5 Rona ware aleꞌei ba, “Maꞌuaa aꞌa ba wagii fei au Hananaa, o ei ramaꞌa rowemina fisibai.”
Mei Pifine na Iginaa Jesus Pao Yei Bethany
6 I guta yei Bethany Jesus laloo humuu hemea ramaꞌa, mei rona roroinia Simon mei Watawatai, 7 na nomai aꞌana hemea pifine na paꞌi hepalo alabaster peꞌi pao na dufa ma namina bauana ponoꞌana ma na iginaa tabana ei fi gutafapalagi ditataa fei tawa.
8 Roꞌaa fanunuaa fei ei otalai nenerana, ronamina siba ma iꞌigai, “Tani o igisimiꞌuaia aleꞌei? 9 Fei dufaa pao, ina rawani nabaa ona alonaa baua mugoo poꞌi ma fanaa ei mugoo poꞌi aꞌa eꞌei lomi manumanuu roꞌou.”
10 Jesus na aida ba rona ware aleꞌei ma na warenaa aꞌa roꞌou, “Tani hamoꞌaa fahauaa unuu mei pifine? Ina bigiꞌaa hepalo paꞌaa rawaniꞌa manumanu aꞌau. 11 Ranimai, ei lomi manumanuu roꞌou, rona guta inamoaa hamuꞌou maꞌuaa, abaa ranimai yau a gutafipui aꞌa hamuꞌou. 12 Ina igiaa feni dufaa pao unuu ba i hapigiꞌaugau aꞌa fei huapu. 13 A warefaꞌuai aꞌa hamuꞌou ba hitani yeni malagufu roꞌaa uꞌugaa fei rawaniꞌa warea, ana rowe guainaa tamanu ina bigiꞌia aꞌau mei pifine ba ronei nonominia.”
Judas na Uga ba i Aloaa Jesus
14 I dii, hemea ei Hefua ma Helagui—mei rona roroinia Judas Iscariot—na aununaa aꞌa ei famamoaa humuu mei Haidaa 15 ma na iꞌigai, “Hamoꞌaa fanau tamanu nabaa a fifaninia panii hamuꞌou?” Siꞌei, rona wareifania odufua paꞌania mugoo poꞌi silver. 16 Aꞌa fei ma nolao, Judas na omaꞌaiaa hepalo rawaniꞌa au ba i fifaninia panii roꞌou.
Fei Hananaa fei Talai Falogia
17 Aꞌa fei rawarawa arewaa laloo fei Hananaa ei Faraa Pidaua Lomi Fafuafua, ei otalai nenerana, rona nomai aꞌa Jesus ma iꞌigai, “Nunumiamu ba haiꞌouꞌaa pagia hitani fei gutanaa oꞌou ba oꞌaa hanana aꞌa fei Talai Falogia?”
18 Ina ware, “Wi waduꞌainaa fei baua gufu aꞌa hemei ramaꞌa ma warefania ba, ‘Mei Feroia na ware ba: Fei auu na rafiꞌi. Haiꞌou ei otalai nenerau, haiꞌou gutafipui wagii fei Hananaa fei Talai Falogia i humumu.’” 19 Siꞌei, ei otalai nenerana, rona bigiꞌaa ei warenaa aꞌa roꞌou ma pagiꞌaugaa ei manumanuu fei Talai Falogia.
20 I nopoilao, Jesus na gutafapalagi aꞌa fei tawa fipui aꞌa ei Hefua ma Helagui. 21 Ma ei roi hanana, ina ware, “A warefaꞌuai ba hemea hamuꞌou, i aloau.”
22 Ronamina faloloaꞌi ma hememea roꞌou na warenaa aꞌana ba, “Aꞌa ba yau, mena Fasu?”
23 Jesus na ware, “Mei i pudifipuinaa panina aꞌau laloo fei hagi, hia, i aloau. 24 Mei Naꞌuu Ramaꞌa, iwe aunu ana aleꞌei ronadii neꞌinia. Maꞌuaa ina fagiana mei na aloaa mei Naꞌuu Ramaꞌa! Ina rawani nabaa lomi ina waninimai.”
25 I dii, Judas, mei ba i aloaa Jesus nawe ware aꞌana ba, “Aꞌa ba yau, Rabbi?”
Jesus na ware, “Hiꞌi, paꞌaa yoi.”a
Fei Finei mei Fasu
26 Ei roi hanana, Jesus na tonaa fei faraa pidaua, na ware ‘ta’, bidigedigeia ma fanaa ei otalai nenerana ma na ware, “Tonia ma hanaia; feni, pigiou.”
27 Ma na tonaa fei bara, ware ‘ta’, fanaa roꞌou ma ware, “Hunu aꞌa feni, minaa hamuꞌou. 28 Feni, rarau aꞌa fei fiꞌugaia,b fei na wigii aꞌa watauda ba mei Fasu i futoaa ei hafeloꞌaa roꞌou. 29 A warefanaa hamuꞌou ba lomi ba a hunudinaa ei ranuu grape nopaꞌaloo fei arewaa na hunufipuidiai aꞌa hamuꞌou laloo fei haparaiaa mei Amau.”
30 Roꞌaa laugidigaa hepalo laugaa mei Haidaa, rona aununaa yei Maugeni Olive.
Jesus nadii Wareaa fei Sifisifii Peter
31 I dii, Jesus na warenaa aꞌa roꞌou, “Aꞌa feni poi feni, minaa hamuꞌou, hamoꞌaa pasi, uaa yau. Uaa ronadii neꞌinia ba:
“‘Yau, ba a hafugaa mei omaꞌamaꞌaa ei sipsipi,
ma ei sipsipi, rowe ponitalanenei.’
32 Maꞌuaa ena na asiꞌaa, awe aunulao i maꞌaa hamuꞌou, dinaa Galilee.”
33 Na ware Peter, “Nabaa minaa roꞌou, rona pasi uaa yoi, yau, paꞌaa lomi.”
34 Jesus na ware, “A warefaꞌuai aꞌamu ba aꞌa feni poi feni, atawe ai fei aꞌaroo, yoi, oꞌaa ware ba lomi ona apaꞌau.”
35 Maꞌuaa Peter na ware, “Nabaa unei maꞌefipui aꞌamu, ana lomi a ware ba lomi na apaꞌaꞌio.” Ma minaa ei otalai nenerana, ana rona ware aleꞌei.
Gethsemane
36 I dii, Jesus na dinaa Gethsemane fipui aꞌa ei otalai nenerana ma warenaa aꞌa roꞌou, “Guta yeni ena na dinaa yei ma lafulafu.” 37 Ina dugaa Peter mawe laguei naꞌuu Zebedee fipui aꞌana ma nawemina faloloaꞌi ma awata naranarana. 38 Ma ina warenaa aꞌa roꞌou, “Fei naranarau namina pepesu aꞌa ei faloloaꞌia ba apoꞌo bimaꞌe ua. Guta yeni ma omaꞌomaꞌafipui aꞌau.”
39 Iꞌa nolao maꞌidadiai, na fapasinaa pudana i malagufu ma lafulafu, “Mena Amau, nabaa na rawani aꞌamu, tonaa fei bara aꞌau. Maꞌuaa oneiꞌaa bigiꞌaa ei nunumiau, uaa ei nunumiamu.”
40 Ma inawe hadiweꞌidinaa aꞌa ei otalai nenerana ma re bapaꞌaa roꞌou, rona maꞌigu ua. Ina iꞌiginaa Peter, “Haa, lomi ba hamoꞌaa gutaꞌomaꞌafipui aꞌau aleꞌei heai hour ua? 41 Hamonei omaꞌa ma lafulafu ba hamoneiꞌaa pasi aꞌa ei hafeloꞌa. Fei spiriti, na mamalawia, maꞌuaa, fei unu na rafilele.”
42 Ina aunudiai fei faguapoana ma na lafulafu, “Mena Amau, nabaa unei hunumaa fei bara ma lomi ba o tonia, te, a bigiꞌaa nunumiamu.”
43 Iꞌa hadiweꞌimai, na fanunupaꞌidinaa roꞌou ba rona maꞌigu, uaa namina pasiholehole pudaa roꞌou. 44 Siꞌei, ina diꞌininaa roꞌou ma aunudiai ma fei faꞌodupoaa lafulafuana ana aleꞌei ei wareana famaꞌa.
45 Iꞌa hadiweꞌidimai aꞌa ei otalai nenerana, ina warenaa aꞌa roꞌou, “Haa, ana hamoꞌei maꞌigu ma fawenai? Maꞌaia, fei au na rafiꞌi ma mei Naꞌuu Ramaꞌa, na udediginaa panii ei hafeloꞌa. 46 Asiꞌaa. O dii! Ifi nomai mena i aloau!”
Rona Panarofaa Jesus
47 Ana fi wareware ua, na nomai Judas, hemea ei Hefua ma Helagui. I aꞌana na paꞌi hepalo baua gupuu ramaꞌa ma rona paꞌi wadu ma hafuhafu, aloamiaa ei famamoaa humuu mei Haidaa mawe ei bauaniaa gufu. 48 Mei aloa nadii pagiꞌaugaa fei lala aꞌa roꞌou aleꞌei ba, “Mei una hatofaa manufina, simei; hamonei panarofia.” 49 Judas na nofawanewanelao aꞌa Jesus ma na ware, “Poi, mena Rabbi!” ma ina hatofaa manufina.
50 Jesus na ware, “Otafi, bigiꞌaa fena ba oꞌaa bigiꞌia.”c
Ma ei ramaꞌa, ronaꞌaa ulao, panarofaa Jesus ba roꞌaa nodugia. 51 Ma hemea ei maroaa Jesus na rapuwenuꞌaa fei waduna ma lafigifamosuaa fei adiaa mei nafii mei paꞌaa bauaniaa humuu mei Haidaa.
52 Jesus na warefania, “Auhadiweꞌinia aꞌa fei udeana fei wadumu, uaa hini i rapuwenuꞌaa waduna ana i maꞌe aꞌa fei wadu. 53 Lomi hamona aida ba nabaa a harofaa mei Amau, i alofanamiau aleꞌena oloromfua paꞌania pufabaꞌa aloꞌalo? 54 Maꞌuaa, nabaa aleꞌei, batanai ba i faꞌuai ei neꞌia laloo fei Buꞌu Apuna ba nei aleꞌei eꞌeni?”
55 Aꞌa fei au fei, Jesus na warenaa aꞌa fei gupuu ramaꞌa, “Haa, una fasibaiaa ei ramaꞌa aꞌa fei gavaman ma siꞌei hamona notonamiaa ei wadu ma ei hafuhafu ba hamomii panarofau? Minaa ei arewaa na guta i malalaa fei humuu mei Haidaa ma feferoi ma lomi hamona panarofau. 56 Maꞌuaa minaa ei manumanu ei, ina nomai ba nei fafaꞌuainaa ei neꞌiaa ei mamamaꞌa.” Ma minaa ei otalai nenerana, rona ponidiꞌininia.
I Maꞌaa ei Sanhedrin
57 Ei ramaꞌa rona panarofaa Jesus, rona noduginaa hia aꞌa Caiaphas, mei paꞌaa bauaniaa humuu mei Haidaa, yei fawelei rona figupui ei feroiaa fei law mawe ei bauaniaa gufu. 58 Maꞌuaa Peter na nenegifarauamai maꞌida aꞌana, nopaꞌaloo fei malalaa fei humuu mei paꞌaa bauaniaa humuu mei Haidaa. Ina waduꞌai ma gutafipui aꞌa ei oanananaa ba i fanunu ba roꞌaa bigiꞌaa tamanu.
59 Ei famamoaa humuu mei Haidaa mawe minaa ei Sanhedrin, rona lalabaginaa ei sifisifi warea aꞌa ei ramaꞌa ba Jesus na bigifatata ma roꞌaa foꞌafamaꞌeia. 60 Watauda ramaꞌaa sifisifi, rona nomai maꞌuaa, lomi rona labagipaꞌaa hepalo tatana.
I dii, lagunawe nomai helagui ramaꞌa 61 ma laguna ware ba, “Meni ramaꞌa meni, ina ware ba ‘A birosiaa fei humuu mei Haidaa ma fadudinia laloo oduai arewaa.’”
62 Nawe ufalarai mei paꞌaa bauaniaa humuu mei Haidaa ma warenaa aꞌa Jesus, “Haa, lomi oꞌaa ware? Tamanu fei uꞌuga laguna wareia ba ona bigiꞌia?” 63 Maꞌuaa Jesus na ufamadumu.
Mei paꞌaa bauaniaa humuu mei Haidaa na warenaa aꞌana, “A warenaa aꞌamu ba onei warefaꞌuai i pudaa mei Haidaa, mei fi oalao: Nabaa yoi, mei Christ,d mei Naꞌuu mei Haidaa, te, warefanaa haiꞌou.”
64 Jesus na ware, “Hiꞌi. Ana aleꞌei ona wareia. Maꞌuaa a warefanaa minaa hamuꞌou ba nefarani, hamopowe maꞌapaꞌaa mei Naꞌuu Ramaꞌa i guta i maꞌau Hemei Faufaua na nomai i pafoo ei papalei pafea.”
65 Ma mei paꞌaa bauaniaa humuu mei Haidaa na rapuniniꞌaa ei lawalawaa anaia ma ware, “Ina warefafeloaa mei Haidaa! Tani o labagidinaa nemea ba i uꞌugia? Maꞌaia, hamona guaidigia ba ina warefafeloaa mei Haidaa. 66 Tamanu naraa hamuꞌou?”
Rona ware ba, “Ponoꞌana ba inei maꞌe.”
67 Siꞌei, rona huwiaa pudana ma laꞌugia. Hefiꞌadiai, rona lapagia 68 ma ware, “Di warefaꞌaiaa haiꞌou, mena Christ. Laꞌugaa hini yoi?”
Peter na Ware ba Lomi na Apaꞌaa Jesus
69 Peter na guta i malalaa fei roꞌei fadududu ma hemea nafi nanao na nomai aꞌana. Ina ware, “Yoi, ana hemea maroaa Jesus, mei Galilee.”
70 Maꞌuaa ina ware ba lomi. Ina ware, “Lomi una aida ba oi wareaa tamanu.”
71 Ma ina aunulao aꞌa fei baua gigei fei gufu ma hemeadiai nanao na maꞌapaꞌia ma warenaa aꞌa ei ramaꞌa yei, “Mena ramaꞌa mena, ina gutafipui aꞌa Jesus, mei Nazareth.”
72 Ina warediai ba lomi ma na faꞌunai ba, “Lomi una apaꞌaa mei ramaꞌa mei!”
73 Lomi namina madii ma ei roꞌaa ufalarai yei, rona nolao aꞌa Peter ma ware, “Paꞌaa faꞌua ba yoi hemea roꞌou, uaa haiꞌouna guaiꞌapaꞌaa paolaa wareamu.”
74 Ma inawe umuaa anaia ma faꞌunai aꞌa roꞌou, “Paꞌaa lomi una apaꞌaa mei ramaꞌa mei!”