2 Yau na tenaa hamuꞌou aꞌa fei nonomiaa hamuꞌou yau aꞌa minaa ei manumanu ma fei urofaa hamuꞌou ei feroia^a ana aleꞌei a fifaninaa roꞌou panii hamuꞌou.

3 Nunumiau ba hamonei aida ba Christ, Fasuu minaa ei wawane ma ei wawane, fasuu ei pifine ma mei Haidaa, fasuu Christ. 4 Hini wawane i lafulafu o diwareꞌaugaa ei manumanu i nomai nene ma na paꞌi hawaa tabana, lomi na fahonuaa fei tabana. 5 Hini pifine i lafulafu o diwareꞌaugaa ei manumanu i nomai nene ma lomi na paꞌi hawaa tabana, lomi na fahonuaa fei tabana ana aleꞌei ba hia na sisigaa ei loaa tabana. 6 Ma nabaa nemea pifine lomi i hawainaa tabana, inei sisigaa ei loaa tabana. Ma nabaa manumanuu mafaa fei baꞌofaa loaa taba, mei pifine nei hawainia. 7 Mei wawane neiꞌaa hawainaa tabana,^b uaa hia haduo ma haweraa mei Haidaa. Maꞌuaa, mei pifine, hia haweraa mei wawane. 8 Uaa mei wawane, abaa noramiana aꞌa mei pifine, uaa mei pifine, noranamai aꞌa mei wawane. 9 Abaa i mamaraimai mei wawane ba manumanuu mei pifine, uaa mei pifine manumanuu mei wawane. 10 Sifei hepalo paꞌafina ba mei pifine nei paꞌi uniꞌunii fei foraforaa mei wawane pafoo tabana ma hepalodiai, uaa ei aloꞌalo.

11 Maꞌuaa aꞌa mei Fasu, mei pifine lomi ba i fapapanai ua aꞌa mei wawane ma mei wawane ana lomi ba i fapapanai ua aꞌa mei pifine. 12 Ana aleꞌei ba mei pifine noranamai aꞌa mei wawane, hee, mei wawane, waninianamai aꞌa mei pifine. Maꞌuaa minaa ei manumanu, noramiana aꞌa mei Haidaa. 13 Hamonei narafarawanimaꞌaia: Ina wanewane ba mei pifine i lafulafu i aꞌa mei Haidaa ma lomi hawaa tabana? 14 Haa, ei fanunuaa hamuꞌou aꞌa ei bigiꞌaa mei Haidaa, lomi na faꞌaiaa hamuꞌou ba mei wawane na malaa loaa tabana manumanuu mafaa aꞌana? 15 Maꞌuaa, nabaa mei pifine ana i famalaiaa fei loaa tabana, hefei, i fani hawerana. Uaa ei malaa loaa taba aleꞌei hawana. 16 Nabaa nemea i harea aꞌa fei maumau fei, lomi hepalodiai maumau oꞌodu—ana lomi aꞌa minaa ei losuu mei Haidaa.

17 Aꞌa ei manumanu ba a fawanewaneia, yau lomi napoꞌo niꞌeniꞌe aꞌa hamuꞌou, uaa aꞌa ei figupuiaa hamuꞌou na rata fei fafeloana laraa fei farawaniana. 18 Famaꞌa, yau na guainia ba ei hamoꞌei figupui fei losuu hamuꞌou, na paꞌi watauda fihareia dupuaa hamuꞌou. Ma aꞌa hefiꞌa warewarea, woro narau ba faꞌua. 19 Faꞌua ba nei paꞌi fibibiyeia dupuaa hamuꞌou, maꞌuaa wagii fei, iwe faꞌaia ba hini hamuꞌou na ugainia mei Haidaa. 20 Ena hamoꞌaa nofigupuimai, aꞌa ba aleꞌei ba hamofi hanaiaa fei Finei mei Fasu. 21 Uaa ena hamona hanana, hememea hamuꞌou fi rata ua ma lomi na fawiwiꞌainaa hemea. Hemea lomi na magu. Hemeadiai na hunufapoapoai. 22 Haa, paꞌaa lomi humu ba hamoꞌaa hanana ma hunu lalona? O, na paꞌi bidiꞌaa unuu hamuꞌou aꞌa fei losuu mei Haidaa ma ana hamoꞌei famamafaiaa ei lomi manumanuu roꞌou? A ware batanai aꞌa hamuꞌou? A tenaa hamuꞌou aꞌa feni? Paꞌaa lomi!

23 Uaa tamanu ei tonau aꞌa mei Fasu, ana una fifaninawii aꞌa hamuꞌou. Mei Fasu Jesus, aꞌa fei poi, fei rona fifaninaa hia panii hefiꞌa, ina tonaa fei faraa pidaua 24 ma iꞌa hawegidigia, ina bidigeia ma ware ba, “Feni, feni pigiou, feni a fanaa hamuꞌou. Bigiꞌaa feni aleꞌena fanonomii hamuꞌou yau.” 25 Ana aleꞌei, nenee hananaa, ina tonaa fei bara ma ware ba, “Feni bara feni, manufau fiꞌugaia aꞌa feni namou. Bigiꞌaa feni aleꞌena fanonomii hamuꞌou yau ena hamona hunumia.” 26 Uaa ena hamona hanaiaa feni faraa pidaua ma hunumaa feni bara, hamofi warefaꞌaiaa ei ramaꞌa fei maꞌeaa mei Fasu nopaꞌaloo fei noramiana.

27 Siꞌei, hini i hanaiaa fei faraa pidaua o hunumaa fei baraa mei Fasu ma lomi na rawani ei mau bigiꞌana wagina, hia na fafeloaa fei pigio ma fei namoo mei Fasu. 28 Hememea ramaꞌa, ba i hanaiaa fei faraa pidaua ma hunumaa fei bara, neidoꞌo fanunumaꞌaiaa fei maumauna. 29 Uaa mei i hanana ma hunu ma lomi na fani honua aꞌa fei hudi unuu mei Fasu, ana fi hana ma hunutoꞌuaiaa fei lagina. 30 Siꞌei, watauda dupuaa hamuꞌou, rona rafilele ma funu ma watauda hamuꞌou, rona maꞌigu noꞌoa. 31 Maꞌuaa, nabaa o dududuaa ana oꞌodu, lomi ba i tonaa oꞌou fei dududua. 32 Ma ena ina dududuaa oꞌou mei Fasu, fi sualaparaa oꞌodu ba oneiꞌaa dududufini aꞌa feni ano.

33 Siꞌei, ena lofuu, ena hamona nofigupuimai ba hamoꞌaa hanana, fawiwiꞌainaa hememea hamuꞌou. 34 Nabaa nemea na bao, ineidoꞌo dihanana humuna ma ena hamona nofigupuimai, lomi i paꞌi dududua wagina.

Ma ena una nomai, awe wareꞌitalalafuifanaa hamuꞌou hefiꞌadiai.