Fei Aweia Noranarai aꞌa fei Uꞌugaa ei Israel Mina
10
Ena lofu, nunuminau ba hamonei aida ba fei uꞌugaa ei upuu oꞌodu, paꞌaa faꞌua. Minaa roꞌou na talai haroo fei papalei ma talaiꞌailao wagii fei Roa Agi. 2 Minaa roꞌou, rona pudugufai aꞌa Moses wagii fei papalei ma fei agi. 3 Minaa roꞌou, rona hanaiaa hepalo ua duꞌuaa spiriti 4 ma hunumaa hepalo ua numaa spiriti; uaa rona hunu aꞌa fei mugoo fei spiriti, fei i aunuhugiaa roꞌodu. Ma fei mugoo fei, Christ. 5 Maꞌuaa mei Haidaa, lomi na niꞌeniꞌe aꞌa watauda roꞌodu. Siꞌei, ei hudi unuu ei maꞌea na talanenenei fawelei abaa wawawau ramaꞌa. 6 Ma eꞌei manumanu eꞌei, aleꞌei ba famaꞌamaꞌaaa oꞌodu ba oneiꞌaa naraiaa ei hafeloꞌa manumanu aleꞌei roꞌodu. 7 Apuna uduginaa ei haidaa sifisifi aleꞌei bigiꞌaa hefiꞌa roꞌou. Uaa fei neꞌia na ware ba, “Ei ramaꞌa, rona guta ba roꞌaa hanana ma hunu ma rona asiꞌaa ba roꞌaa bigiꞌaa ei maumau hafeloꞌa aleꞌei ei ramaꞌa roromaa.” 8 Oneiꞌaa bigiꞌaa fei fitatafipaꞌaia aleꞌei hefiꞌa roꞌou mina—ma laloo heai arewaa ua, enu paꞌania ma oduai pufabaꞌa ramaꞌa, rona maꞌe. 9 Oneiꞌaa maniaa mei Fasu aleꞌei hefiꞌa roꞌou—ma ei waꞌa rona tadufamaꞌeaa roꞌodu. 10 Apuna babauꞌua aleꞌei hefiꞌa roꞌou ma rona maꞌe, uaa na foꞌafamaꞌeaa roꞌou mei aloꞌaloo foꞌafamaꞌea.
11 Ma eꞌei manumanu eꞌei, na pasiaa roꞌou ba famaꞌamaꞌa ma aꞌawei oꞌou, oꞌou eni nawe nodigimai aꞌa oꞌou fei au. 12 Siꞌei, nabaa hamona nara ba hamona ufaweꞌi, hamonei omaꞌamaꞌa ba hamoneiꞌawe pasi! 13 Ei manumanuu mania i patarofaa hamuꞌou, ana na manidigaa watauda ramaꞌa maꞌuaa mei Haidaa na oafagugu ma lomi i augaa hamuꞌou aꞌa fei mania, fei namina rataiaa hamuꞌou. Maꞌuaa ena hamona oa aꞌa fei manimania, ana iwe bigifani talaa hamuꞌou ba hamoꞌaa upaꞌi wagina.
Fei Finei mei Fasu ma ei Hananaa ei Haidaa Sifisifi
14 Siꞌei, ena tafiu, hamonei ponifaraua aꞌa ei haidaa sifisifi. 15 Uꞌei warefanaa ei rona paꞌi hubee tabaa roꞌodu. Hamonei naramaꞌaiaa ei wareau. 16 Fei baraa ‘ta’, fei ona ware ‘ta’ wagina, aꞌa ba tonaa oꞌou wagii fei namoo Christ? Ma fei faraa pidaua ona bidigeia, aꞌa ba tonaa oꞌou wagii fei hudi unuu Christ? 17 Siꞌei ba hepalo ua faraa pidaua ma minaa oꞌou watauda ba o hanaia, minaa oꞌou hepalo ua paꞌafi.
18 Naramaꞌaiaa ei Israel: Haa, aꞌa ba ei rona hanaiaa ei manulelelee fana, ana rona fiꞌalaginia aꞌa fei tawahafi na apunai? 19 Haa, fei hanui yau ba ei manulelele rona faninaa aꞌa ei haidaa sifisifi, baua manumanu, o ei haidaa sifisifi, baua manumanu? 20 Lomi. Maꞌuaa eꞌei fanaa ei roromaa, roi faninaa aꞌa ei pigea, abaa aꞌa mei Haidaa ma lomi na nunuminia ba hamonei paniaa panii ei pigea. 21 Lomi ba hamoꞌaa hunu aꞌa fei baraa mei Fasu ma aꞌa fei baraa ei pigea anaa. Lomi ba hamoꞌaa hanana aꞌa fei tawaa mei Fasu ma aꞌa fei tawaa ei pigea anaa. 22 Haa? Ba oꞌaa faꞌunaꞌanaa walai mei Fasu? Haa, na faufaudiai oꞌou laraa hia?
Fei Alaraa ei Narafaweꞌia
23 “Minaa ei manumanu na rawani ba o bigiꞌia”—maꞌuaa abaa minaa roꞌou, roꞌaa farawaninaa oꞌou. “Minaa ei manumanu na rawani ba o bigiꞌia”—maꞌuaa abaa minaa roꞌou, ro bigipaꞌi. 24 Lomi na rawani ba nemea i farawaninaa anaia maꞌuaa, nei farawaninaa hefiꞌadiai.
25 Hanaꞌuaiaa minaa ena pigio, ena rona aloia humuu aloꞌalo ma apuna famarapuaa unuu hamuꞌou wagina 26 uaa, “Feni malagufu ma minaa ei manumanu wagina manumanuu mei Fasu.”
27 Nabaa nemea abaa narafaweꞌia na falalaꞌio ba hamuꞌaa hanana ma ona nunumiai ba oꞌaa dinaa aꞌana, hanana ua tamanu na fanio ma apuna naranara watauda. 28 Maꞌuaa, nabaa nemea i warefanio ba, “Feni, rona fanidiginaa aꞌa ei haidaa sifisifi,” oneiꞌaa hanaia. Uaa i famarapuaa unuu mei na warefanio ma siꞌei ba lomi i hamamagua naranaraa hemeab — 29 ufi wareaa fei naranaraa mei hamugua abaa yoi, na? Haa, tani i faꞌuduguguaa unuu fei naranaraa hemeadiai? 30 Nabaa una hanana fininaa warea ‘ta’ ma i rawani naranarau wagina, tani hemea i warefafeloau nabaa una waredii ba ‘ta’ aꞌa mei Haidaa?
31 Siꞌei, nabaa ona hanana o hunu, o tamanu fei bigiꞌamu, onei bigiꞌaa minaa ei ba i fani hawera aꞌa mei Haidaa. 32 Apuna faꞌalabeꞌaa nemea Jew, o Greece, o fei losuu mei Haidaa— 33 aleꞌei yau ba ana fi farawaninaa minaa ei ramaꞌa aꞌa watauda tala, abaa fi labarai fararawaniu maꞌuaa fararawanii wataudadiai ba roꞌaa tela.