3 Sifei, fei ba a warefanaa ei rona gutanarafafelo ba yau na tata. 4 Haa, haiꞌou neiꞌaa paꞌi duꞌua ma numa? 5 Haa, haiꞌou neiꞌaa nodugaa ei narafaweꞌia haroo haiꞌodu, aleꞌei hefiꞌa ei apostle ma ei lofuu mei Fasu ma Cephas?^a 6 O ba uniaa haigua Barnabas nei bigitoponoꞌaa manumanuu haigua?

7 Hini ramaꞌaa foꞌaa i bigi ua ma lomi ponoꞌana? Hini i bigi peꞌihape ma lomi i hana duꞌua wagina? Hini i omaꞌaa ei manulelele ma lomi i hunu paosusu? 8 Tamanu naraa hamuꞌou? Haa, ei a wareaa fei, fi wareware aleꞌei naranaraa ramaꞌa? Aꞌa ba fei Law na ware ana aleꞌei? 9 Uaa ina neꞌi aꞌa fei Law Moses: “Apuna sumaa poaa hepalo budumaꞌao ei fi bigi laloo peꞌihape.” Haa, fei i fanaranaraiaa mei Haidaa, paꞌaa fei budumaꞌao? 10 Ei i wareaa fei ba i farawaninaa oꞌou, na? Hiꞌi. Fei, roi neꞌifanaa oꞌou, uaa ena na suweni mei suwena ma mei nueia fi nuei, na oꞌonai unuu lagua ba ana laguꞌaa to duꞌua aꞌa fei hufuꞌa. 11 Nabaa haiꞌouna faroaa ei lau spiriti dupuaa hamuꞌou, haa, namina rata nabaa haiꞌou to duꞌua o manumanu aꞌa hamuꞌou? 12 Nabaa hefiꞌa rona to haduma aꞌa hamuꞌou, tani lomi haiꞌou to baua haduma aꞌa hamuꞌou?

Maꞌuaa lomi haiꞌou fapalaꞌai aleꞌei. Haiꞌouna rawaꞌaꞌafai ma hareꞌuaiaa ei awataa laraa fei ba haiꞌou pauninaa fei rawaniꞌa wareaa Christ. 13 Lomi hamona aida ba ei rona bigi laloo fei humuu mei Haidaa, ro to hanaa roꞌou ana aꞌa fei humuu mei Haidaa ma ei rona bigi aꞌa fei tawahafi na apunai, rona fiꞌalaginaa ana ei duꞌua wagina? 14 Ana aleꞌei, na ware mei Fasu ba ei rona uꞌugaa fei rawaniꞌa warea, ronei to fagutagutaa roꞌou ana aꞌa fei rawaniꞌa warea.

15 Maꞌuaa yau lomi a fapalaꞌai wagii eꞌei ma eni a neꞌinaa feni aꞌa hamuꞌou abaa na paꞌi fei naranara ba hamonei bigiꞌia aleꞌei aꞌau. Na rawaninaa fei ba una maꞌe laraa fei ba nemea i fapaunainaa fei warefaꞌaguꞌaguau. 16 Maꞌuaa ena una uꞌugaa fei rawaniꞌa warea, uneiꞌaa faꞌupeꞌupei uaa neipaꞌaa uꞌugia. Nabaa lomi una uꞌugaa fei rawaniꞌa warea, a fagiana! 17 Nei paꞌi ponoꞌau nabaa paꞌaa naranarau ba a uꞌugaa fei rawaniꞌa warea. Maꞌuaa unei bigiꞌaa fei, uaa mei Haidaa na fifaninaa paniu. 18 Ma tamanu ponoꞌau wagina? Sifeni ua: feni uꞌugau feni rawaniꞌa warea, feni fi uꞌufaniꞌuaiaa hamuꞌou. Faꞌua ba hamonei hadumau maꞌuaa abaa una ware ba hamonei fani manumanuu ena una uꞌugaa feni rawaniꞌa warea.

19 Faꞌua ba yau na ala ma abaa manumanuu hemea ramaꞌa maꞌuaa una fafaiau aleꞌena humuwaa minaa ei ramaꞌa ba unei muaitonaa watauda ma wataudadiai. 20 Aꞌa ei Jew yau aleꞌei hemea Jew ba unei muaitonaa ei Jew. Aꞌa ei rona oa haroo fei law, yau aleꞌei hemea na oa haroo fei law ba unei muaitonaa ei rona oa haroo fei law (maꞌuaa fei law, lomi na panarofau). 21 Aꞌa ei lomi rona paꞌi fei law, yau ana aleꞌei hemea lomi na paꞌi fei law ba unei muaitonaa ei lomi rona paꞌi fei law (maꞌuaa abaa una ala aꞌa fei law mei Haidaa, uaa una oa haroo fei law Christ). 22 Aꞌa ei pududuu, ana una fapududui ba unei muaitonaa ei pududuu. Unamina oanaa watauda manumanu aꞌa minaa ei ramaꞌa, uaa ba nei paꞌi watauda tala ma a fatelaiaa hefiꞌa. 23 Ei a bigiꞌia aleꞌei uaa ba fei rawaniꞌa warea ba ana nei paꞌi hawegiau wagina.

24 Haa, lomi hamona aida ba aꞌa fei ponifiwaleia, minaa ei ramaꞌa, roꞌaa fiwalei maꞌuaa unaa hemea ua i to ponoꞌa? Hamonei ponifaweꞌi ba hamoꞌaa tonaa fei ponoꞌa. 25 Hini i poni wagii fei fiwaleia neidoꞌo feroifaweꞌi. Rona bigiꞌia aleꞌei ba roꞌaa tonaa fei tao i wataramupaꞌai ua. Maꞌuaa oꞌou, ona bigiꞌia ba oꞌaa tonaa fei tao i udelao. 26 Siꞌei, lomi a poni aleꞌei hemea fi poponi ua. Lomi a foꞌa aleꞌei hemea fi sumai ua pani aꞌa fei lalarena. 27 Agia, una fanimaꞌaa fei hudi unuu ma fafaia aleꞌei humuwau, uaa lomi rowe fapedugau aꞌa fei fiwaleia ena una uꞌufanidigaa hefiꞌa fei rawaniꞌa warea.