4 Ma wagii ei duꞌua, ei rona faninaa ei haidaa sifisifi: Ona aida ba ei haidaa sifisifi, paꞌaa lomi hanuna yeni ano, hamatee hemea ua Haidaa. 5 Uaa nabaa na paꞌi watauda rona roroinaa roꞌou ba haidaa yei paꞌudu, o yeni malagufu (faꞌua, na paꞌi watauda “haidaa”, o “fasu” aleꞌei), 6 maꞌuaa ona aida ba hemea ua Haidaa, mei Ama, mei na fanoramiaa minaa ei manumanu ma ba oꞌou paniaa panina. Ma hemea ua Fasu, Jesus Christ, mei na fanoramiaa minaa ei manumanu, mei aꞌana ona paꞌi faweweni.

7 Maꞌuaa abaa minaa ei ramaꞌa rona apaꞌaa fei. Hefiꞌa ramaꞌa ana na palaꞌaidii aꞌa ei haidaa sifisifi ma ena rona hanaiaa ei duꞌua aleꞌei, ronaꞌaida naranaraia aleꞌei ba na fanidiginaa aꞌa ei haidaa sifisifi ma siꞌei ba ei naranaraa roꞌou lomi na weꞌi, na fafeloaa roꞌou. 8 Maꞌuaa fei duꞌua, lomi i farafiꞌinamii oꞌodu aꞌa mei Haidaa; nabaa ona hanana o lomi, ana lomi imina fafeloaa oꞌou o farawaninaa oꞌou.

9 Maꞌuaa hamonei wagiꞌinaa hamuꞌou ba ei ina rawani aꞌa hamuꞌou neiꞌaa oanaa alabeꞌa aꞌa ei lomi na weꞌi naranaraa roꞌou. 10 Uaa hamuꞌou ena hamona paꞌi fei apaꞌa, nabaa nemea lomi na weꞌi naranarana i maꞌaiaa hamuꞌou fi hanana i laloo fei humuu ei haidaa sifisifi, haa, lomi i maꞌanenegi ma i hana ua ei duꞌua rona faninaa aꞌa ei haidaa sifisifi? 11 Ma mei lofu, mei lomi na weꞌi naranarana, mei na maꞌe aꞌana Christ, na pasi hamatee fei apaꞌaa hamuꞌou. 12 Ma ena hamona bigifatata aꞌa ena lofuu hamuꞌou aleꞌei ma fapasiaa ei lomi na weꞌi naranaraa roꞌou, ana hamona fafeloaa Christ. 13 Siꞌei, nabaa tamanu una hanaia i fapasiaa mei lofuu, fai lomi a hanadiai pigio uaa lomi na rawani ba apoꞌo fapasiꞌuaia.