8 I dinaa aꞌa ei rotaa lalai ma ei maꞌesuabea, yau a ware ba na rawani ba roneiꞌaa lalai, ana aleꞌeni yau. 9 Maꞌuaa, nabaa lomi roꞌaa apisipaꞌaa ana roꞌou, ronei lalai. Uaa na rawaninaa fei ba rona lalai laraa fei ba lomi roꞌaa gutapaꞌi ua.

10 I dinaa aꞌa ei rona lalai, una faniwarea (abaa yau, na? maꞌuaa mei Fasu): hemea pifine harolalai neiꞌaa diꞌininaa mei harona. 11 Maꞌuaa nabaa i bigiꞌia aleꞌei, te, ineiꞌawe lalaidiai, o inei fawanewanedinaa watolaa lagua mei harona. Ma hemea wawane harolalai neiꞌaa fiꞌalagii aꞌa mei harona.

12 Ma feni warea feni i dinaa aꞌa minaa hamuꞌou (abaa mei Fasu, na? uaa yau.): Nabaa nemea lofu ma i paꞌi harona hemea abaa narafaweꞌia maꞌuaa mei pifine mei, na nunuminia ba i gutafipui aꞌana, mei wawane, ineiꞌaa fiꞌalagii aꞌana. 13 Ma nabaa nemea pifine ma i paꞌi harona, hemea abaa narafaweꞌia maꞌuaa mei wawane mei na nunuminia ba i gutafipui aꞌana, ineiꞌaa fiꞌalagii aꞌana. 14 Uaa mei wawane abaa narafaweꞌia na apunai, uaa mei harona. Ma mei pifine, mei abaa narafaweꞌia na apunai, uaa mei harona, mei narafaweꞌia. Uaa nabaa lomi, ei naꞌuu lagua, lomi roꞌaa fafaꞌarai. Ma siꞌei ba na aleꞌei, rona apunai.

15 Maꞌuaa, nabaa mei abaa narafaweꞌia ba i dii, rawaia. Nemea narafaweꞌia, pifine o wawane, lomi na hupuꞌai aꞌa ei manumanu aleꞌei; mei Haidaa na rafeinaa oꞌou ba onei gutafirawanii ua. 16 Yoi mena pifine, batanai o aida ba ana o fatelapaꞌaa mei haromu? O yoi mena wawane, batanai o aida ba ana o fatelapaꞌaa mei haromu?

17 Maꞌuaa hememea hamuꞌou nei guta aleꞌena fei mau gutanana fei na fania mei Haidaa ma aꞌa fei, mei Haidaa na harofia. Hefeni wareau feni, minaa ena losuu ronei nenegia. 18 Na paꞌi hemea wawane na moroꞌaa hudii wawaneina ei i tonaa fei haroharofa? Ineiꞌaa filogii. Ina paꞌi hemea wawane lomi na moro ei i tonaa fei haroharofa? Ineiꞌaa filogii. 19 Fei ba rona moroꞌaa hudii wawanei o lomi, abaa baua manumanu. Fei baua manumanu sifei ba onei neneraa ei wareaa mei Haidaa. 20 Hememea nei guta aleꞌei fei gutanana mina, ei i harofia mei Haidaa. 21 Haa, yoi hemea humuwa ei o tonaa fei haroharofa? Apuna naranara watauda wagina; maꞌuaa, nabaa o alagio aꞌa fei humuwa ma ba o aleꞌei hemea ramaꞌa ua, te, bigiꞌia. 22 Uaa mei hia humuwa ei i harofia mei Fasu, nawe ala uaa Christ ma hia aleꞌei ramaꞌa ua aꞌa mei Fasu. Ana aleꞌei, mei hia ramaꞌa ua ei i tonaa fei haroharofa, hia humuwaa Christ. 23 Hamona paꞌi ponoꞌaa hamuꞌou ma ina ponodigaa hamuꞌou. Apuna oanaa humuwaa ramaꞌa. 24 Ena lofu, hememea hamuꞌou aꞌa mei Haidaa nei guta aleꞌei fei mau gutanana ei i harofia mei Haidaa.

25 Ma hamuꞌou ena pifine, ena aꞌuꞌuagio, lomi na paꞌi warea noranarai aꞌa mei Fasu. Maꞌuaa, aꞌa ei faloloaꞌiaa mei Fasu, a fanaa hamuꞌou feni warea aleꞌei hemea na guaifarawaninaa mei Fasu. 26 Siꞌei ba na paꞌi hafeloꞌa aꞌa feni au feni, narau ba na rawani ba hamonei guta ua aleꞌena. 27 Yoi harolalai? Apuna fiꞌalagii. Yoi abaa harolalai? Apuna labarai hogii pinemu. 28 Maꞌuaa, nabaa ona lalai, lomi na tata; ma nabaa nemea nanao aꞌu ua i lalai, lomi na tata. Maꞌuaa aꞌa ei harolalai, roꞌaa paꞌi watauda awataa roꞌou aꞌa fei gutanaa roꞌou ma siꞌei a aweinaa hamuꞌou aꞌa fei.

29 Ena lofu, fei hanuiau ba feni au na welegui. Wagieni ma nolao, ei rona paꞌi haroo roꞌou pifine, ronei guta aleꞌena lomi haroo roꞌodu. 30 Ma ei ramaꞌa, ei rona aiwawasusu, ronei guta aleꞌei ba lomi rona faloloaꞌi. Ei ramaꞌa, ei rona guta niꞌeniꞌe, ronei guta aleꞌei ba lomi ronamina niꞌeniꞌe. Ma ei ramaꞌa, ei rona ponoꞌaa hepalo manumanu, ronei nara aleꞌei ba abaa aleꞌena paꞌaa manumanuu roꞌodu; 31 ma ei ramaꞌa, ei rona panarofaa ei manumanu yeni malagufu, roneiꞌaa naranara watauda aꞌa ei manumanu ei. Uaa, ei manumanuu feni ano wagieni, ifi paꞌailao eꞌeni.

32 Nunumiau ba hamonei ala aꞌa ei watauda naranara. Hemea wawane ataa lalai na naranara watauda aꞌa ei manumanuu mei Fasu—aleꞌei ba i faniꞌeniꞌe batanainaa mei Fasu. 33 Maꞌuaa mei wawane harolalai na naranara watauda aꞌa ei manumanuu feni ano—aleꞌei ba i faniꞌeniꞌe batanainaa mei harona— 34 ma inawe figitataa naranarana. Hemea pifine ataa lalai o hemea nanao aꞌu ua na naranara watauda aꞌa ei manumanuu mei Fasu. Fei baua nunumiana ba fei ununa ma fei spiritina nei oa aꞌa mei Fasu. Maꞌuaa mei pifine harolalai na naranara watauda aꞌa ei manumanuu feni malagufu—aleꞌei ba i faniꞌeniꞌe batanainaa mei harona. 35 Eni a wareaa feni, ba fararawanii hamuꞌou, abaa fi apunainaa hamuꞌou. Maꞌuaa ba hamonei gutafarawani ua ma neiꞌaa figitataa naranaraa hamuꞌou aꞌa mei Fasu.

36 Nabaa nemea wawane na nara ba lomi na rawani ei maumauna aꞌa hemea nanao, mei ba hogii pinena ma ba mei pifine namina sisiginaa raudei ma mei wawane na nara ba ipoꞌo lalai, te, inei bigiꞌia aleꞌei nunumiana. Lomi na hafelo; lagunei lalai. 37 Maꞌuaa nabaa mei wawane lomi hepalo manumanu na foraiaa naranarana ma na narafaweꞌi ba lomi i lalainaa mei nanao, mei wawane mei, ana na bigiꞌaa fei rawaniꞌa maumau. 38 Ma siꞌei, mei i lalainaa mei nanao mei, ana na bigifarawani, maꞌuaa mei lomi na lalainaa mei nanao, na mua maꞌidadiai fei mau bigiꞌana.^b

39 Mei pifine nei hupuꞌai aꞌa mei harona nopaꞌaloo fei ba ina maꞌe. Maꞌuaa, nabaa mei harona wawane i maꞌe, te, mei pifine nawe ala ba i lalainaa nemea nunumiana maꞌuaa inei lalainaa nemea na oafipui aꞌa mei Fasu. 40 Aꞌa fei naranarau ba i mamalawia pelee naranarana nabaa i guta ua aleꞌei. Ma una nara aleꞌei ba yau ana na paꞌi fei Spiritii mei Haidaa.