Fei Dududua Dupuaa ei Narafaweꞌia
6
Nabaa nemea hamuꞌou i paꞌi sibana aꞌa hemea, tamanu naraa hamuꞌou—ba i dinaa aꞌa mei fadududuaa feni ano laraa ei apunaiaa mei Haidaa? 2 Haa, lomi hamona aida ba ei apunaiaa mei Haidaa rowe dududuaa feni malagufu? Ma nabaa hamoꞌaa fadududuaa feni malagufu, ana hamoꞌaa dududupaꞌaa hepalo pusuꞌo manumanu? 3 Haa, lomi hamona aida ba oꞌou ana o dududuaa ei aloꞌalo? Ma siꞌei, ei manumanu wagieni, lomi na waiwai. 4 Siꞌei, nabaa hamona fiharei aꞌa hepalo manumanu aleꞌei, hamonei uniaa ana ei lomi baua haraa roꞌou laloo fei losuu ba fawanewaneaa fei. 5 Una wareaa feni ba a famamafaa hamuꞌou. Haa, paꞌaa lomi hemea hamuꞌou na paꞌi maꞌida hubee tabana ba i fawanewaneaa ei manumanu watolaa ei narafaweꞌia? 6 Maꞌuaa agia, hemea lofu na dududuaa hemeadiai—ma fei, na bigiꞌia i pudaa ei abaa narafaweꞌia!7 Fei ba hamona fidududui, hanuna ba hamona pasidii. Fei manumanu fei, na hafelodiai laraa fei ba hamona bigifatata ma fafanao. 8 Ma ana hamona fafanao ma bigifafelo aꞌa ei lofuu hamuꞌou.
9 Haa, lomi hamona aida ba ei ramaꞌa hafelo, lomi roꞌaa tonaa fei haparaiaa mei Haidaa? Apuna guaitonaa sifisifiꞌa hamatee paꞌaa lomi ba ro tonaa fei haparaiaa mei Haidaa—ei fitatafipaꞌaia, ei na haguaa manumanu feni ano, ei fiharoharoipaꞌaia, ei wawanee tala, helagui pifine o helagui wawane fitatafipaꞌaia, 10 ei fafanao, ei wawaꞌai poa, ei rona hunu poapoai, ei wiwitoia o ei balafafanaosifisifiꞌa. Lomi hemea roꞌou i tonaa fei haparaiaa mei Haidaa. 11 Mina, maumau hefiꞌa hamuꞌou ana aleꞌei ei ramaꞌa ei maꞌuaa aꞌa fei haraa mei Fasu Jesus Christ mawe fei Spiritii mei Haidaniaa oꞌou, hamona didiginaa fei fafaꞌaraia, papaditaia ma fei wanewanea.
Fitatafipaꞌaia
12 “Minaa ei manumanu, na hawia ba a bigiꞌia”—maꞌuaa lomi ba minaa ei manumanu roꞌaa farawaninau. “Minaa ei manumanu, na hawia ba a bigiꞌia”—maꞌuaa lomi na rawani ba hepalo eꞌei i humuwainau. 13 “Ei duꞌua manumanuu fei pahanana ma fei pahanana manumanuu ei duꞌua”—maꞌuaa mei Haidaa i fapedugaa guapaloei. Fei hudi unu, abaa manumanuu fitatafipaꞌaia, uaa manumanuu mei Fasu ma mei Fasu manumanuu fei hudi unu. 14 Ana aꞌa fei faufauna, mei Haidaa na faꞌasiꞌanaa mei Fasu aꞌa fei maꞌea ma ana i faꞌasiꞌanaa oꞌodu. 15 Haa, lomi hamona aida ba ei hudi unuu hamuꞌou maroaa Christ ua? Haa, ana na rawani ba a hupuꞌainaa ei maroaa Christ aꞌa nemea pifinee tala? Paꞌaa lomi! 16 Haa, lomi hamona aida ba mei i hupuꞌai aꞌa hemea pifinee tala na pigioinaa hepalo aꞌana? Uaa aleꞌei fei warea, “Lagua, laguꞌaa pigioinaa hepalo.” 17 Maꞌuaa mei i hupuꞌai aꞌa mei Fasu, fei spiritii lagua aleꞌena hemea ua.
18 Faraua aꞌa fei mau fitatafipaꞌaia. Wataudadiai hafeloꞌa bigiꞌaa hemea ramaꞌa, rona ude auguu fei hudi ununa. Maꞌuaa hini i bigiꞌaa fei fitatafipaꞌaia, ana hia na fafeloaa fei hudi ununa. 19 Haa, lomi hamona aida ba ei hudi unuu hamuꞌou, humuu fei Spiriti Apuna, fei i oa laloo iaa hamuꞌou, fei hamona tonia aꞌa mei Haidaa? Hamuꞌou abaa manumanuu ana hamuꞌou; 20 ina paꞌi ponoꞌaa hamuꞌou ma mei Haidaa na ponodigaa hamuꞌou. Siꞌei, hamonei fani honua aꞌa mei Haidaa wagii ei hudi unuu hamuꞌou.