Alofatalainaa mei Lofu, mei na Bigifatata
5
Yau na guainia ba na paꞌi fitatafipaꞌaia dupuaa hamuꞌou ma fei maumau fei, ana lomi na paꞌi dupuaa ei roromaa: Hemea wawane na haroaa mei haroo mei amana. 2 Ma hamona mamagugu ua, na? Hamona paꞌi hepalo baua awataa aꞌa hemea ma lomi hamona nanamuipaꞌia. Ana lomi hamotawe faꞌasiꞌania ano. 3 Faꞌua ba yau abaa na oafipui aꞌa hamuꞌou maꞌuaa fei naranarau i aꞌa hamuꞌou. Ma una waredii ba na tata mei na bigiꞌaa fei, ana aleꞌena yau yena. 4 Ena hamona papaꞌifipui aꞌa fei haraa mei Fasuu oꞌodu Jesus ma fei naranarau i aꞌa hamuꞌou ma fei faufau mei Fasuu oꞌodu Jesus anaa, 5 te, hamonei fifaninia panii Satan ba fei hafeloꞌa maumaunaa nei pedu ma fei spiritina, i tela aꞌa fei arewaa mei Fasu. 6 Lomi na rawani fei mamaguguaa hamuꞌou. Haa, lomi hamona aida ba maꞌida fafuafua i fafuanaa minaa fei palaua? 7 Siminaa fei waraguu fafuafua. Ma hamowe aleꞌei manufau palaua lomi fafuafuana—ana aleꞌei paꞌaa hamuꞌou. Uaa aꞌa oꞌou, Christ, hia mei Naꞌuu Sipsipi wagii fei Talai Falogia ma na fatawadii. 8 Siꞌei, onei urofaa fei Hananaa maꞌuaa abaa aꞌa fei waraguaa fafuafuaa ei manitoai ma hafeloꞌa, maꞌuaa aꞌa fei faraa pidaua lomi fafuafua fei rawaniꞌa maumau ma fei faꞌuaia.
9 Fei neꞌiau na ware ba apuna gutafipui aꞌa ei rona fitatafipaꞌai. 10 Ena una ware ba paꞌaa lomi, abaa fi hanuinaa ei ramaꞌaa ano, ei rona paꞌi naranaraa fitatafipaꞌaia, ei wawaꞌai poa, ei balafafanaosifisifi, o ei haguaa manumanuu ano. Nabaa aleꞌei, hamonei paꞌaa ofadugaa feni ano. 11 Maꞌuaa eꞌeni a neꞌinaa aꞌa hamuꞌou ba apuna gutafipui aꞌa nemea na ware ba hia hemea lofu maꞌuaa na paꞌi fei mau fitatafipaꞌaia, o wawaꞌai poa, o haguaa ei manumanuu ano, o wiwitoia, o hunu poapoai, o balafafanaosifisifi. Mei ramaꞌa aleꞌei, apuna hananafipui aꞌana.