Ei Apostle Christ
4
Siꞌei, ei ramaꞌa, ronei tonaa haiꞌodu aleꞌei nafii Christ ma aleꞌei omaꞌaa ei manumanuu mei Haidaa, ei na udeꞌopaꞌai. 2 Ma hepalo baua manumanu, fei ba ei rona omaꞌaa hepalo manumanu aleꞌei, ronei famaꞌaia ba ronapaꞌaa wewea. 3 Lomi manumanu aꞌau nabaa hamoꞌaa narafafelo aꞌau o aunaa yau dududua, uaa ana lomi una narafafelo ana aꞌau. 4 Fei naranarau na rawani ua maꞌuaa lomi na ware ba yau rawaniꞌa ramaꞌa. Ana mei Fasu ua i dududuau. 5 Siꞌei, nabaa atawepaꞌaa fei auna, apuna dududuaa hepalo manumanu; hamonei fawiwiꞌai nopaꞌaloo fei ba i nomai mei Fasu. Iwe falelefoaa ei manumanu na udeꞌopaꞌai laloo fei roromaa ma i faꞌarewaiaa fei paꞌaa naranaraa ei ramaꞌa. Aꞌa fei au fei, mei Haidaa iwe fanaa fei udugiana aꞌa hememea. 6 Siꞌei, ena lofu, ei manumanu ei, una aunamii pafoo haigua Apollos ba fararawanii hamuꞌou uaa ba aꞌa haigua, hamonei to apaꞌaa hamuꞌou aꞌa feni warea feni, “Apuna auꞌualao naranara pafoo tamanu na neꞌidii.” Aleꞌei, lomi ba o famamagugui aꞌa hemea ma fafeloaa hemeadiai. 7 Uaa hini na bigifaꞌuꞌugainaa hamuꞌou aꞌa hefiꞌadiai? Tamanu manumanu ba hamona toꞌuaia? Ma nabaa faꞌua ba hamona toꞌuaia, tani hamoꞌaa mamagugu wagina?
8 Paꞌidigaa hamuꞌou minaa ei manumanu hamona nunuminia! Hamona paꞌidii watauda manumanu! Hamona oadii aleꞌei hapara—ma abaa haiꞌodu aꞌa hamuꞌou. Ma una nunuminia ba hamuꞌou paꞌaa aleꞌei hapara, aleꞌei haiguꞌaa haparaifipui aꞌa hamuꞌou! 9 Fafanunuau aleꞌei ba mei Haidaa na aunaa haiꞌou eni apostle mugii ei roi talailao wagii fei humuu fifigaia ba i hanunuinia i haroo pumanugawe aleꞌei ba haiꞌou nei tonaa maꞌea wagii fei mau fifigaia. Ba ronei hapeinaa haiꞌou, minaa fei haroo pafea, ei aloꞌalo ma ei ramaꞌa pu. 10 Haiꞌou aleꞌena poapoaa Christ maꞌuaa na paꞌi baua apaꞌaa hamuꞌou aꞌa Christ, na? Haiꞌou pududuu ma hamuꞌou na faufau! Hamona honua, lomi haiꞌouna honua! 11 Ana aꞌa feni au feni, haiꞌouna tonaa baoa ma sigigia, na madigedige lalawaa haiꞌodu ma rona foꞌafafeloaa haiꞌodu ma lomi humuu haiꞌodu. 12 Haiꞌouna bigifaweꞌinaa panii haiꞌodu. Ena rona umuaa haiꞌodu, haiꞌouna haweginaa roꞌodu. Ena rona haperaraiaa haiꞌodu, haiꞌouna apisinia. 13 Nabaa hefiꞌa na uꞌufafeloaa haiꞌodu, haiꞌouna warefagigii ua. Nopaꞌamii wagieni, haiꞌou aleꞌena abaguaa agi o memee feni malagufu.
14 Abaa eni a neꞌinaa feni ba a famafaiaa hamuꞌou maꞌuaa a aweinaa hamuꞌou aleꞌena rawaniꞌa naꞌuu. 15 Faꞌua ba hamona paꞌi hefua paꞌania pufabaꞌa oanananaa hamuꞌou aꞌa Christ maꞌuaa lomi hamona paꞌi watauda amaa hamuꞌou. Uaa, aꞌa Christ Jesus, yau na oanaa amaa hamuꞌou aꞌa fei rawaniꞌa warea. 16 Siꞌei, a iꞌiginaa hamuꞌou ba fei maumau hamuꞌou nei fiminaꞌei aleꞌei fei maumauu. 17 Sifei fei paꞌafina ba a aloawii Timothy, mei naꞌuu, mei una haguia, mei na oafagugu aꞌa mei Fasu. Iwe fanonominaa hamuꞌou fei tatalaiau aꞌa Christ Jesus, fei na fiboꞌii aꞌa tamanu una feroinia laloo minaa ei losuu.
18 Hefiꞌa hamuꞌou na fafofolaa banaꞌaa lomi a nomai aꞌa hamuꞌou. 19 Maꞌuaa anaa a nomai eni nabaa na nunumiai mei Fasu. Ma awe lalabaginaa warewareaa ei roꞌaa fafofolaa ma batanai faufau rona paꞌi. 20 Uaa fei haparaiaa mei Haidaa abaa manumanuu warewarea maꞌuaa manumanuu faufaua. 21 Tamanu naraa hamuꞌou? Ba unei notomai babu, o a nofagigimai fininaa hagua?