Fiꞌalagia laloo fei Losuu
3
Ena lofu, lomi ba a wareware aꞌa hamuꞌou aleꞌei ba hamona paꞌi fei Spiriti, maꞌuaa aleꞌei maumau ramaꞌaa malagufu—aleꞌena baduu ua aꞌa Christ. 2 Una fasusunaa hamuꞌou pao susu. Abaa una fagunaa hamuꞌou weꞌia duꞌua, uaa hamotawe hawia ma ana hamotawepoꞌo felefele. 3 Hamuꞌou, aleꞌeni ramaꞌaa malagufu ua eni. Uaa na paꞌi punepunea ma fisibaia dupuaa hamuꞌou. Ma siꞌei, hamuꞌou ramaꞌaa malagufu ua, na? Fei maumau hamuꞌou, aleꞌena ramaꞌa ua, na? 4 Uaa nabaa nemea i ware ba, “Yau na neneraa Paul” ma nemeadiai ba, “Yau na neneraa Apollos,” hamuꞌou aleꞌena ramaꞌa ua, na?5 Ramaꞌa bata Apollos? Ma ramaꞌa bata Paul? Nafi ua ma ana aꞌa lagua, hamona guainaa fei uꞌuga ma siꞌei, hamona narafaweꞌi. Mei Fasu na fani bigiꞌa aꞌa hememea. 6 Yau na faroaa fei lau. Apollos na fani ranuna maꞌuaa mei Haidaa na fahabeia. 7 Siꞌei, mei faroa o mei fanaa ranu, lomi na paꞌi haraa lagua, unaa mei Haidaa ua—mei na fahabeaa ei manumanu. 8 Mei faroa ma mei fanaa ranu, laguna paꞌi hepalo ua naranara ma hememea lagua, iwe tonaa ponoꞌana ana aleꞌei ei bigiꞌana. 9 Uaa haigua, paniaa panii mei Haidaa ma hamuꞌou, peꞌihapee mei Haidaa ma ana humuu mei Haidaa.
10 Wagii fei rawaniꞌa na fanau mei Haidaa, una augaa fei fasuꞌufufugoi, aleꞌei hemea paꞌaa fadufadua ma hemeadiai fi fadufadu wagina. Maꞌuaa hememea nei omaꞌafarawaninaa anaia ba batanai na fadufadu. 11 Uaa lomi ba nemea i faꞌudiai hepalo fasuꞌufufugoi. Uaa na paꞌidii hepalo, simeni Jesus Christ ua. 12 Nabaa nemea i fadufadu pafoo fei fasuꞌufufugoi ma i biginaa gold, o silver, o ei mugoo na bauana ponoꞌana, o ei haihai, o ei guana, o paꞌapaꞌaa ei lau, 13 fei bigiꞌana, i unia ba na biginaa tamanu, uaa fei Arewaa i faꞌarewaia. Fei hafi, ipowe faꞌarewaia ma maniaa fei bigiꞌaa hememea ba na weꞌi, o lomi. 14 Ma nabaa fei faduana na telapaꞌi, i tonaa fei ponoꞌana. 15 Ma nabaa fei faduana na guꞌa, na paꞌai ei bigitemuana. Ana unaia i tela maꞌuaa aleꞌei hemea na ponitelaꞌapaꞌi aꞌa fei weguweguna.
16 Haa, lomi hamona aida ba hamuꞌou humuu mei Haidaa ma fei Spiritii mei Haidaa na oa laloo iaa hamuꞌou? 17 Nabaa nemea i rosiaa fei humuu mei Haidaa, mei Haidaa, ana i rosia, uaa fei humuu mei Haidaa na apunai ma hamuꞌou fei humu fei.
18 Hamoneiꞌaa sifiꞌaa ana hamuꞌou. Nabaa nemea hamuꞌou i nara ba hia na paꞌi apaꞌana aleꞌei fei apaꞌaa feni malagufu, ineidoꞌo oa aleꞌei hemea poapoa ma nene, i oa aleꞌei hemea na paꞌi apaꞌana. 19 Uaa fei apaꞌaa feni malagufu, aleꞌena manumanuu fafadia pudaa mei Haidaa. Ana aleꞌei fei neꞌia: “Ina panarofaa ei rona paꞌi apaꞌaa roꞌou aꞌa ei manitoai roꞌou.” 20 Ma hepalodiai, “Mei Fasu na aida ba fei naranaraa ei rona paꞌi apaꞌaa roꞌodu, lomi hanuna.” 21 Siꞌei, lomi na rawani ba nemea i mamagugu! Minaa ei manumanu, finefinee hamuꞌou; 22 aleꞌei Paul, o Apollos, o Cephasa, o feni ano, o fei faweweni, o maꞌea, o wagieni, o narani—minaa ena, finefinee hamuꞌou. 23 Ma hamuꞌou manumanuu Christ ma Christ manumanuu mei Haidaa.