2
Ena a nomai aꞌa hamuꞌou, ena lofu, abaa una nofininamii hofehofea o famamagugui ba na paꞌi baua apaꞌau ei a uꞌufanaa hamuꞌou fei uꞌugaa mei Haidaa.a 2 Uaa yau na nara ba uneiꞌaa apaꞌaa neꞌa manumanu ei a gutafipui aꞌa hamuꞌou maꞌuaa ana unaa Jesus Christ ma fei fatawana. 3 Una nofininamii fei pududua ma maꞌaua fipuinaa funurerea aꞌa hamuꞌou. 4 Fei paolaa uꞌugau abaa na nofininamii baua apaꞌa o hofea aꞌa hamuꞌou maꞌuaa fi famaꞌaa hamuꞌou fei faufau fei Spiriti. 5 Hee, lomi na rawani ba hamuꞌou narafaweꞌi aꞌa fei apaꞌaa ramaꞌa maꞌuaa aꞌa fei faufau mei Haidaa ua.Fei Anoꞌano Noranarai aꞌa fei Spiriti
6 Maꞌuaa haiꞌouꞌei warewareaa fei uꞌuga, fei na paꞌi apaꞌa i dupuaa ei rona aꞌu. Maꞌuaa abaa fei mau apaꞌaa feni au feni, o fei mau apaꞌaa ei haparaa feni au feni, ei fi paꞌailao ei faufau roꞌou. 7 Agia, haiꞌou fi wareaa fei anoꞌanoiaa mei Haidaa, fei nadoꞌo udeꞌopaꞌai, fei ba mei Haidaa na audigia ba i fani hawera aꞌa oꞌou, ei atawe mamara feni malagufu. 8 Lomi hemea bauaniaa feni malagufu na apaꞌia. Nabaa rona aida, lomi roꞌaa fatawaiaa mei Fasuu fei hawera. 9 Maꞌuaa, aleꞌei fei neꞌia:
“Lomi puda na fanunupaꞌi,
lomi adia na guaipaꞌi
ma fei naranara i gu nabaa i naraiaa
tamanu mei Haidaa nadii pagiꞌaufanaa ei rona haguia”—
10 maꞌuaa aꞌa fei Spiritina, mei Haidaa na foiginia aꞌa oꞌodu.
Fei Spiriti i labaginaa minaa ei manumanu ma ana i labaginaa ei manumanuu mei Haidaa, ei na ude fawalalo. 11 Uaa hini dupuaa ramaꞌa na apaꞌaa naranaraa hemea ramaꞌa? Ana fei spiriti laloo iaa mei ramaꞌa. Ana aleꞌei, lomi hemea na apaꞌaa fei naranaraa mei Haidaa. Ana fei Spiritii mei Haidaa ua. 12 Lomi ona tonaa fei spiritii feni malagufu maꞌuaa fei Spiriti noranarai aꞌa mei Haidaa ba onei apaꞌaa tamanu mei Haidaa na faniꞌuaia aꞌa oꞌou. 13 Sifeni feni ba onei wareia, abaa paolaa warea rona feroinaa oꞌou aꞌa ei apaꞌaa ramaꞌa maꞌuaa ei paolaa warea, feroiaa fei Spiriti, ei na warewareaa ei manumanu na faꞌuai aꞌa fei Spiriti ma aꞌa ei paolaa wareaa fei Spiriti.b 14 Mei lomi na paꞌi fei Spiriti, lomi ba i tonaa ei manumanu noranamai aꞌa fei Spiritii mei Haidaa, uaa i aꞌana ei manumanu ei, na aꞌafoloi ma paꞌaa lomi ba i apaꞌaa roꞌodu. Uaa ei, manumanuu fei Spiriti. 15 Mei na paꞌi fei Spiriti, ina hawia ba i fanunuꞌapaꞌaa minaa ei manumanu maꞌuaa ana hia, lomi ba iwe oanaa hapeꞌumuu ramaꞌa:
16 “Haa—hini i apaꞌaa fei naranaraa mei Fasu
ba i feroinia?”
Maꞌuaa oꞌodu, ona paꞌi fei naranaraa Christ.