2 Feni neꞌia i dinaa aꞌa fei losuu mei Haidaa i Corinth, aꞌa ei rona papaditai aꞌa Christ Jesus—ei ina harofaa roꞌou ba ronei apunaifipui aꞌa minaa ei ronaꞌaida lalaꞌaa fei haraa mei Fasu Jesus Christ—mei Fasuu roꞌou ma oꞌodu.

3 Fei rawaniꞌa ma gutafarawaniaa mei Haidaa mei Amaa oꞌodu ma mei Fasu Jesus Christ i oa aꞌa hamuꞌou.

4 Unaꞌaida ware ‘ta’ aꞌa mei Haidaa uaa hamuꞌou. Hamatee aꞌa Christ Jesus, ina fanaa hamuꞌou fei rawaniꞌana. 5 Uaa aꞌana inamina haweginaa hamuꞌou aꞌa minaa ena manumanu—minaa ei paolaa warea ma minaa ei apaꞌaa hamuꞌou— 6 uaa fei uꞌugaa Christ, fei haiꞌouna uꞌugia napaꞌaa faꞌuai aꞌa hamuꞌou. 7 Siꞌei, lomi i taretare pinee hamuꞌou aꞌa ei fanaa fei Spiriti ena hamofi omaꞌa fininaa refurefua ba nei famauamai mei Fasuu oꞌou Jesus Christ. 8 Iwe faweꞌinaa naranaraa hamuꞌou nopaꞌaloo fei aꞌapoo ma lomi i guguinaa unuu hamuꞌou hafeloꞌa aꞌa fei arewaa mei Fasuu oꞌou Jesus Christ. 9 Mei Haidaa na oafagugu ma na rafeinaa hamuꞌou ba hamonei oafipui aꞌa mei Naꞌuna Jesus Christ, mei Fasuu oꞌou.

10 Ena lofu, a iꞌiginaa hamuꞌou ba aꞌa fei haraa mei Fasuu oꞌou Jesus Christ, hamoneiꞌaa fifalaginaa hamuꞌou. Ma neiꞌawe paꞌi manumanu watolaa hamuꞌou ma hamonei oafipui aꞌa hepalo ua paꞌapaꞌa ma heai naranara. 11 Ena lofuu, hefiꞌa ramaꞌa humuu Chloe, rona warefanau ba na paꞌi fihareia dupuaa hamuꞌou. 12 Fei hanuiau aleꞌei: Hemea hamuꞌou na ware ba, “Yau na neneraa Paul”; hemea na ware, “Yau na neneraa Apollos”; hemea, “Yau na neneraa Cephas^a ”; ma hemeadiai, “Yau na neneraa Christ.”

13 Haa—Christ, na fifalagii? Ma Paul, rona fatawaia uaa hamuꞌou? Ma, hamuꞌou, hamona pudugufai wagii^b fei haraa Paul? 14 Naminapaꞌaa rawani ba laguna pudugufinaa hamuꞌou Crispus ma Gaius ma abaa yau. 15 Siꞌei, lomi i ware nemea ba hamona pudugufai wagii fei harau. 16 (Faꞌua ba ana una pudugufinaa ei ramaꞌa humuu Stephanas; maꞌuaa lomi una nonominia ba una pudugufinaa hemeadiai.) 17 Uaa abaa i aloamiau Christ ba nei pudugufai; maꞌuaa ba nei uꞌugaa fei rawaniꞌa warea. Abaa una wareaa ei naranaraa ramaꞌa ua. Nabaa aleꞌei, lomi na paꞌi faufau fei hawafoloo Christ.

18 Uaa fei uꞌugaa fei hawafolo, lomi hanuna aꞌa ei rona fagiana. Maꞌuaa aꞌa oꞌou eni ona tela, na paꞌi faufau mei Haidaa wagina. 19 Uaa ina neꞌidii:

20 Amaia mei na paꞌi apaꞌana? Amaia mei na tonaa watauda feroiana? Amaia mei ba namina apaꞌifarawaninaa ei uꞌugaa minaa ei manumanu aꞌa feni au feni? Haa, aꞌa ba mei Haidaa na fafanunuaa ramaꞌa aleꞌei poapoa aꞌa fei apaꞌifarawaniaa feni ano? 21 Wagii fei anoꞌanoiaa mei Haidaa na bigiꞌia aleꞌei ba i aꞌa fei anoꞌanoiaa feni malagufu, lomi roꞌaa apaꞌia. Ma aꞌa fei poapoa, fei rona uꞌugia, mei Haidaa na niꞌe ba i fatelaꞌanaa ei rona narafaweꞌi. 22 Ei Jew, rona nunuminaa ei hilalaa foigia ma ei Greece, roꞌei lalabaginaa fei anoꞌanoia, 23 maꞌuaa oꞌou, ona uꞌugaa fei fatawaa Christ: fei alabeꞌa aꞌa ei Jew ma lomi hanuna aꞌa ei Gentile. 24 Maꞌuaa aꞌa ei na lalaꞌaa roꞌou mei Haidaa, minaa laguei, Jew o Greece, Christ, hia fei faufau mei Haidaa ma fei anoꞌanoiana. 25 Uaa fei fapoapoaiaa mei Haidaa na muainaa fei apaꞌaa ramaꞌa ma fei fapududuiaa mei Haidaa na faufaudiai laraa fei faufau ramaꞌa.

26 Ena lofu, naramaꞌaia ba hamuꞌou batanai famaꞌa ei atawe lalaꞌaa hamuꞌou. Aꞌa ba na bauanai ei apaꞌaa minaa hamuꞌou i pudaa ramaꞌa ma aꞌa ba minaa hamuꞌou baua ramaꞌa o naꞌuu hapara. 27 Maꞌuaa mei Haidaa na rafeinaa ei aꞌafoloi feni malagufu ba famamafaa ei rona paꞌi baua apaꞌaa roꞌodu; mei Haidaa na rafeinaa ei pududuu manumanuu feni ano ba famamafaa ei rona faufau. 28 Ina rafeinaa ei pusuꞌo manumanu aꞌa feni ano ma ei fawawaroro manumanu—ma ei lomi rona wareifininia—ba fapedupeduu ei na udedii. 29 Uaa ba lomi nemea i famamagugui i maꞌaa mei Haidaa. 30 Siꞌei ba hia, hamona oafipui aꞌa Christ Jesus, mei na oa aleꞌei anoꞌanoo oꞌou aꞌa mei Haidaa, mei i fawanewaneaa oꞌou, fafafaꞌarainaa oꞌou ma ponoꞌaa oꞌou. 31 Siꞌei, ana aleꞌei na neꞌidii: “Mei ba i famamagugui, nei famamagugui aꞌa mei Fasu.”