3 Ma Satan na waduꞌaa Judas, hepalo harana Iscariot, hemea ei Hefua ma Helagui. 4 Judas na dinaa aꞌa ei famamoaa humuu mei Haidaa mawe ei bauaniaa ei oanananaa fei humuu mei Haidaa ma wareware aꞌa roꞌou ba batanai i aloaa Jesus. 5 Ronamina niꞌeniꞌe ma uga ba roꞌaa fani mugoo poꞌi aꞌana. 6 Ina ugainaa roꞌou ma opaninaa hefaa au ba i fifaninaa Jesus panii roꞌou nabaa lomi watauda ramaꞌa.

7 Inawe nomai fei arewaa fei Faraa Pidaua Lomi Fafuafua, fei arewaa roꞌaa moroꞌaa huaa fei sipsipii fei Talai Falogia ba fana aꞌa mei Haidaa. 8 Jesus na aloaa Peter ma John ma ware, “Hamunei pagiꞌaugaa ena ba o hanaia aꞌa fei Talai Falogia.”

9 Laguna iꞌigai, “Ma haigua pagiꞌaugia hitani.”

10 Ina ware, “Ena hamuna nowau aꞌa fena gufu, hamuꞌaa bapaꞌaa hemea fi talaiporoꞌaa fena baraa ranu. Nenerawau aꞌa fena humu i dinaa wagina 11 ma warefanaa mei amaa fei humu, ‘Mei Feroia na iꞌigai: hitani fei nopaa ei gufu raua onaꞌo fanaa roꞌou, fei ba a hananafipui aꞌa ei otalai nenerau wagii fei Talai Falogia?’ 12 Iwe famaꞌaa hamugua hefaa baua nopa pafea na udeꞌaudii. Pagiaa ei manumanu yena.”

13 Laguna dii ma fanunupaꞌaa ei manumanu ana aleꞌei i warefanaa lagua Jesus. Siꞌei, laguna pagiꞌaugaa ei manumanuu fei Hananaa fei Talai Falogia.

14 I nopaꞌaloo fei au, Jesus mawe ei apostle, rona gutafapalagi ditataa fei tawa. 15 Ma na warenaa aꞌa roꞌou, “Paꞌaa nunumiau ba a hananafipui aꞌa hamuꞌou feni Hananaa fei Talai Falogia ma hinene a tonaa fiꞌiu. 16 Uaa, a warefanaa hamuꞌou, lomi a hananadinia nopaꞌaloo fei ba na arewa fei hanuna wagii fei haparaiaa mei Haidaa.”

17 I todigaa fei bara, na ware ‘ta’ ma warenaa aꞌa roꞌou, “Tonaa feni ma hunufimaꞌainia. 18 Uaa, a warefanaa hamuꞌou ba lomi a hunudinaa fei ranuu grape nopaꞌaloo fei noramiaa fei au haparaiaa mei Haidaa.”

19 Ma ina tonaa fei faraa pidaua, ware ‘ta’, itafia, fanaa roꞌou ma ware, “Feni, pigiou, fanau aꞌa hamuꞌou; bigiꞌia aleꞌei ba fanonomii hamuꞌou yau.”

20 Ana aleꞌei, roꞌaa hananadii, na tonaa fei bara ma ware, “Sifeni feni baraa fei manufau fiꞌugaia wagii fei namou, fei i wigii aꞌa hamuꞌou. 21 Maꞌuaa fei panii mei ba i aloau, yeni pafoo tawa aꞌau. 22 Mei Naꞌuu Ramaꞌa i aunu ana aleꞌei fei neꞌia, maꞌuaa, ipaꞌaa fagiana mei ba i aloia. 23 Ma ronawe fiꞌiꞌigai ba hini roꞌou na bigiꞌaa fei.

24 Ana na paꞌi fihareia dupuaa roꞌou ba hini i pafeai. 25 Jesus na warenaa aꞌa roꞌou, “Ei haparaa Gentile rona fasuinaa ei ramaꞌa ma ei paniaa panii roꞌou, rona ware ba roꞌou ana Haduma. 26 Maꞌuaa maumau hamuꞌou, neiꞌaa aleꞌei. Agia, mei paꞌaa bauana dupuaa hamuꞌou nei aleꞌei hemea baduu ma mei na tonaa fei hapara nei aleꞌei hemea nafi. 27 Uaa amaia na pafeai, mei i guta tawa, o mei hasumaa duꞌua? Aꞌa ba mei i guta tawa? Maꞌuaa yau aleꞌei hemea nafi i dupuaa hamuꞌou. 28 Hamuꞌou, ena hamona palarau wagii ei manimaniau. 29 Ma a fanaa hamuꞌou hefaa gufuu hapara, ana aleꞌei mei Amau na fanau hepalo 30 ba hamoꞌaa hana ma hunu aꞌa fei tawau wagii fei haparaiau ma guta pafoo ei gutanaa hapara ma dududuaa ei hefua ma guapaloei pai Israel.

31 “Simon, Simon, Satan na iꞌigai ba i nuenueinaa hamuꞌou aleꞌei baranafi. 32 Maꞌuaa una lafulafunio, Simon, ba fei weꞌiaa naranaramu neiꞌaa wataꞌadudu. Ma ena ona momoꞌaimai, onei faweꞌiaa naranaraa ei lofumu.”

33 Maꞌuaa ina ware, “Mena Fasu, yau a aunuhugio aꞌa fei boboꞌaia ma fei maꞌea.”

34 Jesus na ware, “A warefanio, Peter, hinene i ai fei aꞌaroo na wagieni i odupoai wareamu ba lomi ona apaꞌau.”

35 Jesus na iꞌiginaa roꞌou, “Ei a aloaa hamuꞌou pani ua, lomi mugoo poꞌi, raba, o supinai, hamona nunuminaa hefiꞌadiai?”

Rona ware, “Lomi.”

36 Na warenaa aꞌa roꞌou, “Maꞌuaa eꞌeni, nabaa na paꞌi mugoo poꞌi, tonia ma hepalo raba anaa. Ma nabaa lomi hamona paꞌi wadu, aloaa ei hawaa uguu hamuꞌou ma ponoꞌaa hepalo. 37 Na udedii feni neꞌia: ‘Hia, i wareifini aꞌa ei barafeaa law’; ma uꞌei warefanaa hamuꞌou ba feni, neipaꞌaa faꞌuai aꞌau. Faꞌua, tamanu rona neꞌinaa aꞌau, fi nopaꞌamii fei fafaꞌuaiana eni.”

38 Ei otalai nenera, rona ware, “Maꞌaia, mena Fasu, siguapaloeni, guapaloeni wadu.”

Na ware, “Na hawidigia.”

39 Ana aleꞌei maumauna, Jesus na dinaa fei Maugeni Olive ma ei otalai nenerana, rona nenegia. 40 Roꞌaa nopaꞌaloo yei, na warenaa aꞌa roꞌou, “Hamonei lafulafu ba lomi hamoꞌaa pasi wagii ei manimania.” 41 Ina diꞌininaa roꞌou, rauana aleꞌei pasiaa nafaꞌaa roꞌou hefaa mugoo, faꞌunaa duꞌuna ma lafulafu, 42 “Oꞌama, nabaa ona nunumiai, tonaa feni bara aꞌau, maꞌuaa bigiꞌaa fei nunumiamu, abaa fei nununumiau.” 43 Hemea aloꞌalo i pafea na faꞌarewa aꞌana ma na faweꞌia. 44 Namina awata naranarana ma namina lafulafu faweꞌi ma fei mapuna aleꞌei namo na pasiꞌuꞌugunaa pu.^a

45 I asiꞌaa aꞌa fei lafulafuana ma hadiweꞌinaa aꞌa ei otalai nenera, na fanunupaꞌaa roꞌou rona maꞌigu, na madugu unuu roꞌou uaa na fuaꞌonaa roꞌou fei faloloaꞌia. 46 Na iꞌiginaa roꞌou, “Tani hamuꞌou maꞌigu? Asiꞌaa ma lafulafu ba lomi hamoꞌaa pasi wagii ei manimania.”

47 Ana fi wareware ua, hefaa gupuu ramaꞌa na nomai ma mei harana Judas, hemea ei Hefua ma Helagui, na talaidugamii roꞌou. Na nolao aꞌa Jesus ba i hatofaa pudana, 48 maꞌuaa Jesus na iꞌiginia, “Judas, yoi ba oꞌaa aloaa mei Naꞌuu Ramaꞌa aꞌa fei hatofaa puda?”

49 Roꞌaa fanunuia ba tamanu fi nomai ei roꞌaa neneraa Jesus, rona ware, “Mena Fasu, haiꞌou foꞌanaa eni waduu haiꞌou?” 50 Hemea roꞌou na lafigipaꞌaa adiaa mei nafii mei paꞌaa bauaniaa humuu mei Haidaa, raudei maꞌau.

51 Maꞌuaa Jesus na ware, “Nei pedu feni!” Ma na idoaa adiaa mei ramaꞌa mei ma farawaninia.

52 Jesus na warenaa aꞌa ei famamoaa humuu mei Haidaa, ei bauaniaa ei oanananaa fei humuu mei Haidaa mawe ei bauaniaa gufu, ei ba roꞌaa panarofia, “Tani hamuꞌou notomai wadu ma babu—ei naraa hamuꞌou ba a foꞌafiloginaa ei bauaniaa gufu? 53 Minaa ei arewaa yau aꞌa hamuꞌou i malalaa humuu mei Haidaa ma lomi hamona panarofau. Maꞌuaa feni, au hamuꞌou, au haparaiaa fei roromaa.”

54 Siꞌei, rona panarofoꞌaia ma noduginaa hia humuu mei paꞌaa bauaniaa humuu mei Haidaa. Peter na talaifaꞌudeꞌudemai nene. 55 Maꞌuaa roꞌaa paꞌaiaa fei hafi i memewaa fei malalaa humu ma gutafipui, Peter na guta hugiaa roꞌou. 56 Hemea nafi nanao na fanunupaꞌia na guta yei aꞌa fei weꞌaa fei hafi. Ina fanunufaꞌuꞌuia ma ware, “Meni ramaꞌa meni, hia hemea aꞌana.”

57 Maꞌuaa na wareꞌopaꞌainia, “Mena pifine, lomi una apaꞌia.”

58 Lomi namina madii ma hemeadiai na fanunupaꞌia ma na ware, “Yoi ana hemea roꞌou.”

Na ware Peter, “Otafi, abaa yau!”

59 I didii aleꞌei heai hour, hemeadiai na ware, “Meni ramaꞌa meni napaꞌaa guta aꞌana uaa hia hemea Galilee.”

60 Peter na ware, “Otafi, lomi na apaꞌaa ena mau wareamu!” Ana fi wareware ua, na ai fei aꞌaroo. 61 Mei Fasu na diarai ma fanunufaꞌuꞌuaa Peter. Ma Peter nawe naraiaa tamanu na warefania mei Fasu: “Hinene i ai fei aꞌaroo, i odupoai wareamu ba lomi ona apaꞌau.” 62 Ma ina asiꞌanaa ano ma namina aimatogutogu.

63 Ei rona omaꞌaa Jesus, rona warefalalasia ma hafugia. 64 Rona sumaa pudana ma warefaweꞌi aꞌana, “Dii unifanaa haiꞌou ba hini fi hafugio?” 65 Ma ronamina wareaa watauda hafeloꞌa aꞌana.

66 I baꞌamai fei panii arewaa, ei bauaniaa gufu—ei famamoaa humuu mei Haidaa mawe ei feroiaa law, rona gutafipui ma hefiꞌa na nodugaloo Jesus i aꞌa roꞌou. 67 Rona ware, “Nabaa yoi mei Christ,^b warefanaa haiꞌou.”

Jesus na ware, “Nabaa na warefanaa hamuꞌou, hamoꞌaa nara ba abaa faꞌua 68 ma nabaa a iꞌiginaa hamuꞌou, lomi ba hamoꞌaa ware. 69 Maꞌuaa eꞌeni ma nolao, mei Naꞌuu Ramaꞌa i guta raudei maꞌau mei Haidaa, mei na faufau.”

70 Minaa roꞌou na iꞌigai, “Hama yoi Naꞌuu mei Haidaa?”

Na ware, “Na wanewane ena wareaa hamuꞌou ba yau hia.”

71 Ma rona ware, “Tamanu hanuna ba oꞌaa todiai uꞌuga aꞌa feni dududua? Ona guaidigaa ei warea leleꞌamiana ana aꞌa fei habaꞌumuna.”