Jesus i Pudaa Pilate ma Herod
23
Minaa ei aꞌa fei gupu na asiꞌaa ma noduginaa hia aꞌa Pilate. 2 Ma rona ware ba ina bigifatata, “Haiꞌouna aida ba meni ramaꞌa meni, na fafeloaa feni gufuu haiꞌou. Lomi na nunuminia ba ei ramaꞌa ronei fani mugoo poꞌi aꞌa Caesar ma ware ba hia Christ,a hemea hapara.”3 Siꞌei, Pilate na iꞌiginaa Jesus, “Haa, yoi mei haparaa ei Jew?”
Jesus na ware, “Hiꞌi, ana aleꞌena wareamu.”
4 I dii, Pilate na warenaa aꞌa ei famamoaa humuu mei Haidaa ma fei gupuu ramaꞌa, “Lomi una labagipaꞌi tataa meni ramaꞌa meni.”
5 Maꞌuaa ronaminaꞌu wareꞌualao, “Ina faꞌunaꞌanaa ei ramaꞌa tadiweꞌaiaa Judeab aꞌa ei feroiana. Rawarawa na bigiꞌia Galilee ma nawe nopaꞌamii yeni.”
6 I guainaa fei, Pilate na iꞌigai ba hia Galilee. 7 I apaꞌalao ba Jesus na guta wagii fei haparaiaa Herod, ina alonaa hia aꞌa Herod, mei ana hia yei Jerusalem aꞌa fei au fei.
8 I fanunupaꞌaa Jesus Herod, namina niꞌefafelo uaa minaa nunumianamai mina ba i fanunuia. Ma wagii ei guaiana uꞌugana na nara ba i fanunu na bigiꞌaa hefiꞌadiai foigia. 9 Ina iꞌigainia watauda iꞌigaia, maꞌuaa Jesus, lomi na u wareware aꞌana. 10 Ei famamoaa humuu mei Haidaa mawe ei feroiaa law, rona ufalarai yei ma warefiꞌuꞌuinaa difoo roꞌou ba hia napaꞌaa tata. 11 Ma Herod mawe ei maroana foꞌaa, rona hapehapeia ma warefafeifeinia. Rona farafenaa hia fei maurawani hawaa ugu ma alohadiweꞌinia aꞌa Pilate. 12 Aꞌa fei arewaa fei, Herod ma Pilate, lagunawe fitafii—doꞌo famaꞌa na paꞌi watolaa lagua.
Rona Ware ba Jesus nei Maꞌe
13 Pilate na harofipuinamii ei famamoaa humuu mei Haidaa ma ei bauaniaa gufu mawe ei ramaꞌa 14 ma warenaa aꞌa roꞌou, “Hamona dugamii meni ba hia mei i faꞌunaꞌanaa ei ramaꞌa ba ronei foꞌafipui aꞌa fei gavaman. Una iꞌiginia i pudaa hamuꞌou ma lomi na labagipaꞌi paꞌafii fei tatana, fei hamona ware ba ina bigiꞌia. 15 Ma Herod, ana lomi na labagipaꞌaa tatana, uaa ina alohadiweꞌinamai aꞌa oꞌou ma hamona fanunupaꞌidigia ba hia, lomi na bigiꞌaa hepalo manumanu ba nei maꞌe. 16 Siꞌei, adoꞌo babuinia ma awe alagia.” 17\f + \fr 23:17 \ft Hefiꞌa neꞌia ba alagia.” 17 Ba i paꞌaa alaraa hemea aꞌa roꞌou wagii fei Hananaa.\f*
18 Ma ronamina fai harofa, “Dugifarauaninia mena ramaꞌa mena. Ma alafanamiaa haiꞌou Barabbas!” 19 (Rona boboꞌainaa Barabbas uaa ina baꞌananarai aꞌa fei gufu ma ana na foꞌafamaꞌe ramaꞌa).
20 Siꞌei ba Pilate na naranara ba i alaraa Jesus, na iꞌigidinaa roꞌou, 21 maꞌuaa rona haroharo memewai ua, “Fatawaia! Fatawaia!”
22 Ina warefaꞌodupoai aꞌa roꞌou, “Tani ei? Tamanu bigifatatana? Lomi una labagipaꞌaa hepalo tatana ba nei maꞌe. Siꞌei, adoꞌo babuinia ma awe alagia.”
23 Maꞌuaa ronamina harofaweꞌi ba i nei fatawa ma fei harofaa roꞌou nawe nopaꞌilao. 24 Siꞌei, Pilate nawe nara ba ipowe ugainaa fei iꞌigaiaa roꞌou. 25 Ina alaraa mei boboꞌaia wagii fei baꞌananaraiana ma foꞌafamaꞌeana ramaꞌa, mei rona nunuminia ma na rawanaa panii roꞌou Jesus.
Fei Fatawana
26 Roi nodugalao, rona panarofaa Simon, mei Cyrene fi baguamai sugatataꞌaia ma rona fafuharenaa hia fei hawafolo ba nei talaifuharenalao nenee Jesus. 27 Abaa poꞌo ramaꞌa, ei roꞌei nenegia; hefiꞌa roꞌou, ei pifine, ei rona aimemewai ma aiꞌaigia. 28 Jesus na omaꞌanaa aꞌa roꞌou ma ware, “Ena pifine, naꞌuu Jerusalem, apuna aigau; hamonei aigaa ana hamuꞌou ma ena naꞌuu hamuꞌou. 29 Uaa iwe nomai fei arewaa hamopowe ware, ‘Rona paꞌi hawegiaa roꞌou ei paꞌabeu pifine, ei watau lomi na wanini baduu ma ei susu lomi na fasusu baduu!’ 30 Ma
“‘ropowe ware aꞌa ei baua maugeni, “pasiꞌonaa haiꞌou!”
Ma aꞌa ei pusuꞌo maugeni, “Hawainaa haiꞌou!” ’
31 Uaa nabaa rona bigiꞌia aꞌa fei mamarawii haihai, poꞌo batanaidiai aꞌa fei na manunu?”
32 Helaguidiai, ramaꞌa hafelo, ana rona nodugifipuinaloo lagua aꞌana ba roꞌaa fatawaa lagua. 33 Roꞌaa nopaꞌamii fawelei harana Guitaba, rona fatawaia yei watolaa lagua, hemea maꞌauna ma hemea mauwina. 34 Jesus na ware, “Oꞌama, futoaa ei hafeloꞌaa roꞌou, uaa lomi rona apaꞌaa tamanu roi bigiꞌia.”c Ma ei susuna rona fiꞌalaginia wagii fei uniꞌuni fifigaiaa roꞌou.
35 Ei ramaꞌa, roi ufanunu ma ei bauaniaa ei Jew na fabaꞌefoinia. Rona ware, “Ina fatelaiaa hefiꞌa ma eꞌeni nei fatelaiaa anaia nabaa hia mei Christ, Hemei Rafeiana, mei aloagii mei Haidaa.”
36 Ei foꞌaa, ana rona nomai aꞌana ma warefafeifeinia. Rona fani numana, fei paraꞌaa wine 37 ma ware, “Nabaa yoi haparaa ei Jew, onei fatelaio.”
38 Ina paꞌi hefaa neꞌia palalana ba, “SIMENI, MENI HAPARAA EI JEW.”
39 Hemea laguei hafeloꞌa, laguei laguꞌaa fatawa yei na warefafeloia: “Abaa yoi mei Christ? Fatelaio ma haigua!”
40 Maꞌuaa hemea lagua na hotaꞌia. Ina ware, “Lomi ona maꞌauaa mei Haidaa? Abaa yoi ana o maꞌe aleꞌei hia? 41 Ina wanewane ba aguꞌaa maꞌe uaa lagii ei hafeloꞌaa agua. Maꞌuaa meni ramaꞌa meni, lomi na bigiꞌaa hepalo tata.”
42 Ma ina ware, “Jesus, nonominau ena ona panarofaa fena haparaiamu.”d
43 Jesus na warefania, “A warefaꞌuai aꞌamu ba wagieni, yoi o oafipui aꞌau wagii fei fananamaiaa gufu.”
Fei Maꞌeaa Jesus
44 Inawe nopaꞌamii fei faꞌoloroaiaa hour ma fei roromaa namina hawainaa minaa fei gufu nopaꞌaloo fei fafaimeiaiaa hour, 45 uaa fei halo lomi na weꞌa. Ma fei lawalawaa fei rapirapii fei humuu mei Haidaa na anininaa guapapa. 46 Jesus namina harofabauana, “Oꞌama, fei spiritiu, i panimu.” I waredigaa fei, na fawenai apoinaa fei fawewenina.
47 I fanununaa fei mei centurion, na uduginaa mei Haidaa ma ware, “Paꞌaa faꞌua ba meni, paꞌaa wanewanea. 48 Roꞌaa nofipuimai ei ramaꞌa ba roꞌaa fanunu fei, rona fanunuia ma aunuhafuhafugaa niniwai roꞌou. 49 Maꞌuaa minaa ei rona apaꞌia mawe ei pifine roꞌaa nenegia ei i norai Galilee, rona ufaraua ma fafanununaa ei manumanu ei.
Fei Iꞌifaiaa Jesus
50 Ina paꞌi hemea ramaꞌa, harana Joseph, hemea bauaniaa ei Sanhedrin ma hia hemea rawaniꞌa ramaꞌa ma fei maumauna na wanewane, 51 mei lomi na ugainaa fei naranara ma bigiꞌaa roꞌou. Hia hemea Judea noramiana Arimathea ma ifi omaꞌomaꞌaiaa fei haparaiaa mei Haidaa, fei ba i nomai. 52 Ina dinaa aꞌa Pilate ma iꞌiginaa fei hudi unuu Jesus. 53 Ma na porofaꞌuꞌupuia, hawainia aꞌa hefaa lawalawa linen ma fahainopia laloo huapu, fei waduaa roꞌou wagii ei naꞌa, fei atawe paꞌi maꞌea na hainopia. 54 Feni, Arewaa Pagipagia ma fei Sabbath anaa i nomai.