Fei Asiꞌana
24
Aꞌa fei rawarawa arewaa fei hefapagipagia, aleꞌena mafufuo badu, ei pifine rona notonaa ei pagiaa roꞌou manumanu dufaa ma dinaa aꞌa fei huapu. 2 Rona fanunupaꞌia ba fei baua mugoo gigei fei naꞌa, na pigudii aꞌa fei huapu, 3 maꞌuaa, roꞌaa waduꞌai, lomi rona fanunupaꞌaa fei hudi unuu mei Fasu, Jesus. 4 Roꞌei naranara wagina ma helaguei wawane, lawalawaa lagua namina weꞌa aleꞌei usida, laguna u papaa roꞌou. 5 Uaa fei maꞌauaa roꞌou, ei pifine, rona fapasiꞌoꞌoꞌuinaa pu, maꞌuaa laguei wawane, laguna warenaa aꞌa roꞌou, “Tani hamuꞌou lalabarainaa mei fi gutaguta dupuaa ei maꞌea? 6 Hia lomi yeni. Na asiꞌadii! Hamonei nonominaa ei warefanana hamuꞌou ei i oafipui aꞌa hamuꞌou i Galilee: 7 ‘Mei Naꞌuu Ramaꞌa roꞌaa fifaninia panii ei hafeloꞌa ba ronei fatawaia ma aꞌa fei faꞌoduaiaa arewaa i asiꞌadiai.’” 8 Ma ronawe nonominaa ei wareana. 9 Roꞌaa nodigimai aꞌa fei huapu, rona uꞌugaa minaa eꞌei aꞌa ei Hefua ma Hemea mawe hefiꞌadiai. 10 Mary Magdalene, Joanna, Mary mei inaa James mawe hefiꞌa aꞌa roꞌou, rona uꞌugaa eꞌei aꞌa ei apostle. 11 Maꞌuaa rona nara ba abaa faꞌua fei uꞌugaa ei pifine, uaa ei wareaa roꞌou aleꞌei mau wareaa poapoa. 12 Maꞌuaa Peter na asiꞌaponinaa aꞌa fei huapu. Ina fabalou ma fanunupaꞌaa ei mininii linen na ude uꞌugai ma na aunulao ma naranara ba tani ipoꞌo biyei.
Fei Tala i Dinaa Emmaus
(Mark 16:12, 13)
13 Ana aꞌa fei arewaa fei, helagui roꞌou, laguna dinaa aꞌa fei gufu, harana Emmaus aleꞌei hefua ma heai kilometre,a rauana aꞌa Jerusalem. 14 Laguꞌei fiwarewareinaa minaa ei manumanu na nodigimai. 15 Laguꞌaa fiwarewareinaa ei manumanu ei, Jesus na nomai ma talaihugiaa lagua; 16 Maꞌuaa lomi na faꞌarewa ba laguꞌaa fanunuꞌapaꞌia.
17 Ina iꞌiginaa lagua, “Tamanu ei talaifiwarewareiaa hamugua?”
Laguna uꞌoꞌoꞌuinaa pu. 18 Hemea lagua, harana Cleopas na iꞌiginia, “Yoi hemea tatalaia ua i Jerusalem ma lomi ona aida ei manumanu na nodigimai aꞌa eni arewaa eni?”
19 Ina iꞌigai, “Manumanu bata?”
Laguna ware, “Ei na nomai aꞌa Jesus mei Nazareth. Hia hemea mamamaꞌa. Na faufau ei wareana ma bigiꞌana i pudaa mei Haidaa ma minaa ei ramaꞌa. 20 Ei famamoaa humuu mei Haidaa ma ei bauaniaa haiꞌou, rona fifaninia panii hefiꞌa ba ronei foꞌafamaꞌeia ma rona fatawaia; 21 maꞌuaa, na oꞌonai unuu haiꞌou ba hia mei ba i ponohadiweꞌinaa Israel. Ma hepalodiai, wagieni, faꞌoduaiaa arewaa ei i nomai ei manumanu ei. 22 Ma hepalodiai, hefiꞌa pifinee haiꞌodu, rona famaduofoaa haiꞌodu. Rona dinaa aꞌa fei huapu mafufuo badu wagieni 23 maꞌuaa lomi rona fanunupaꞌaa fei hudi ununa. Rona nomai ma warefanaa haiꞌou ba rona fanunupaꞌaa laguei aleꞌei aloꞌalo, laguna ware ba ina mamaꞌa. 24 Ma hefiꞌa tafii haigua, rona dinaa aꞌa fei huapu ma fanunuia ana aleꞌei ei wareaa ei pifine. Maꞌuaa lomi rona maꞌapaꞌia.
25 Ma ina warenaa aꞌa lagua, “Hamunapaꞌaa poapoai ma na polai tabaa hamugua ma lomi hamuna nara ba faꞌua minaa ei ronadii wareia ei mamamaꞌa! 26 Haa, lomi ba mei Christb neidoꞌo tonaa fiꞌina wagii ei manumanu ei ma nene i tonaa fei hawerana?” 27 Ma ina ware itailalafuifanaa lagua minaa ei uꞌugaa fei Buꞌu Apuna, fei na uꞌugia i aꞌa fei neꞌiaa Moses amaꞌanaa ei neꞌiaa minaa ei mamamaꞌa.
28 Ro nofarafiꞌinaa fei gufu ba roꞌaa dinaa wagina, Jesus ba i talaidilao. 29 Maꞌuaa laguna warefaweꞌi aꞌana, “Gutafipui aꞌa haigua, uaa anaa i roro; fei arewaa anaa i pedu.” Siꞌei, ina waduꞌai ba i gutafipui aꞌa lagua.
30 Roꞌaa guta wagii fei tawa, ina tonaa fei faraa pidaua, ware ‘ta’, itafia ma fanaa lagua. 31 Ma ei pudaa lagua, nawe arewa ma lagunawe fanunuꞌapaꞌia ma ina faꞌapaꞌai pudaa lagua. 32 Ma laguna fiꞌiꞌigai, “Haa, lomi bibiyeiaa naranaraa agua ei i fiwarewarei aꞌa agua i tala ma faꞌarewainaa fei Buꞌu Apuna aꞌa agua?”
33 Laguna asiꞌaa ma hadiweꞌibatafanaa Jerusalem. Ma yei, laguna bapaꞌaa ei Hefua ma Hemea mawe hefiꞌadiai aꞌa roꞌou, rona oafipui 34 ma laguna ware, “Paꞌaa faꞌua! Mei Fasu na asiꞌaa ma faꞌarewa aꞌa Simon.” 35 Ma laguna uꞌufanaa roꞌou tamanu na nomai aꞌa lagua i tala ma batanai lagua fanunuꞌapaꞌaa Jesus ei fi itafaa fei faraa pidaua.
Jesus na Faꞌarewa aꞌa ei Otalai Nenera
36 Roi fiwarewareinaa fei, Jesus na faꞌarewa dupuaa roꞌou ma warenaa aꞌa roꞌou, “Meꞌo, gutafarawani ua.”
37 Rona baꞌarofo ma maꞌau. Ei naraa roꞌou ba rona fanunupaꞌi haniꞌu. 38 Ina warenaa aꞌa roꞌou, “Tani hamoꞌaa naranara watauda ma hamamagua? 39 Fanunuamii paniu ma pineu. Ana yau ua! Panarofau ma fanunu; haniꞌu lomi pigiona ma guina, aleꞌei hamona fanunupaꞌia ba yau una paꞌi.”
40 I waredigaa fei, na famaꞌaa roꞌou guei panina ma pinena. 41 Maꞌuaa lomi rona nara ba faꞌua uaa rona niꞌeniꞌe fininaa nanawala pudaa roꞌou ma ina iꞌiginaa roꞌou, “Hamona paꞌi duꞌua yeni ba a hanana?” 42 Rona fania hepalo unumaa roꞌou nia 43 ma ina tonia ma hanaia i pudaa roꞌou.
44 Ina warenaa aꞌa roꞌou, “Sifeni, feni adii warefanaa hamuꞌou ei adoꞌo guta aꞌa hamuꞌou: Minaa ei neꞌia na uꞌugau aꞌa fei Law Moses, ei Mamamaꞌa mawe fei Buꞌuu Lauga, roneipaꞌaa nomai.”
45 Ma inawe faꞌarewainaa tabaa roꞌou ba ronei apaꞌifarawaninaa fei Buꞌu Apuna. 46 Ina warefanaa roꞌou, “Sifeni feni neꞌia: Mei Christ nei tonaa fiꞌina ma asiꞌaa wagii fei maꞌea aꞌa fei faꞌoduaiaa arewaa 47 ma wagii fei harana, doꞌo famaꞌa i Jerusalem, rowe uꞌufanaa minaa ei gufu ba ei ramaꞌa, ronei filoginaa naranaraa roꞌodu ma iwe futoaa ei hafeloꞌaa roꞌou. 48 Hamona fanunudigaa ei manumanu ei. 49 Yau, a alofanamiaa hamuꞌou fei faꞌunaiaa mei Amau; maꞌuaa hamoneidoꞌo guta aꞌa feni gufu feni hawina hamona tonaa fei faufau noranarai pafea.”
Mei Haidaa na Duginaa Jesus Pafea