Fei Huapu, Lomi Ramaꞌa
20
Paꞌaa mafufuo badu aꞌa fei rawarawa arewaa fei hefapagipagia, atawe arewafarawani, Mary Magdalene na aununaa aꞌa fei huapu ma fanunupaꞌia ba hefiꞌa, rona pigudigaa fei baua mugoo i poaa wawaduꞌi. 2 Siꞌei, ina poninaa aꞌa Simon Peter ma hemeadiai otalai nenera, mei na haguia Jesus ma na ware, “Rona faꞌasiꞌanaa mei Fasu aꞌa fei huapu ma lomi ona aida ba rona fahainopia hitani!” 3 Siꞌei, Peter mawe mei ana hemea otalai nenera, laguna unaꞌanaa aꞌa fei huapu. 4 Minaa lagua, laguna poni, maꞌuaa mei hemeadiai otalai nenera na muainaa Peter ma nadoꞌoree paꞌaa fei huapu. 5 Ina fabalou ma farerefilao ma unaa ei maninii lawalawa lalona, maꞌuaa, lomi na waduꞌai. 6 I dii, Simon Peter, mei i nomai mugina nawe nopaꞌamai ma waduꞌainaa laloo huapu. Ina fanunupaꞌia ba ei maninii lawalawa ua yei 7 ma fei lawalawaa agifaia, fei rona hawainaa tabaa Jesus. Fei lawalawa fei, na duꞌu ma ude uꞌugai aꞌa ei maninii lawalawa. 8 I dii, mei otalai nenera, mei nadoꞌoree paꞌaa fei huapu, ana na waduꞌai. Ina fanunuia ma na narafaweꞌi. 9 (Lagutawe narapaꞌia ei wareaa fei Buꞌu Apuna ba Jesus, iwe asiꞌaa aꞌa ei maꞌea.) 10 Ma laguei otalai nenera, lagunawe hadiweꞌinaa humuu lagua.
Jesus na Faꞌarewa aꞌa Mary Magdalene
11 Maꞌuaa Mary na u i poaa fei huapu ma aiꞌai. Ei fi aiꞌai, na fabalou ma fanununaa laloo fei huapu 12 ma na fanunupaꞌaa helagui aloꞌalo. Poꞌiaa susuu lagua ma laguna guta fawelei nadoꞌo haino fei unuu Jesus, hemea yei tabana ma hemea yei balofena.
13 Laguna iꞌiginia, “Mena pifine, tani o aiꞌai?”
Ina ware, “Rona topaꞌainaa mei Fasuu ma lomi na aida ba rona augia hitani.” 14 Aꞌa fei, ina momoꞌai ma fanunupaꞌaa Jesus na ufalarai yei, maꞌuaa, lomi na aida ba Jesus.
15 Ina ware, “Mena pifine, tani o aiꞌai? Oi labaginaa hini?”
Ina nara ba hia, mei omaꞌaa fei peꞌihape ma na ware, “Haguꞌu, nabaa poroꞌamu, warefanau ba ona augia hitani ma awe tonia.”
16 Jesus na warenaa aꞌana, “Mary.”
Ina diarailao aꞌana ma warefaweꞌi aꞌana, warea Aramea ba, “Rabboni!” (hanuna ba Feroia).
17 Jesus na ware, “Oneiꞌaa panarofau, uaa atawe hadiweꞌinaa aꞌa mei Ama. Maꞌuaa dinaa aꞌa ei lofuu ma warefanaa roꞌou ba, ‘A hadiweꞌinaa aꞌa mei Amau, mei ana amaa hamuꞌou, mei Haidaniau, mei ana Haidaniaa hamuꞌou.’”
18 Mary Magdalene na dinaa aꞌa ei otalai nenera ma uꞌu ba, “Una fanunudigaa mei Fasu!” Ma na warefanaa roꞌou ba hia na wareaa ei manumanu ei aꞌana.
Jesus na Faꞌarewa aꞌa ei Otalai Nenerana
19 I nofafilao fei rawarawa arewaa fei hafapagipagia, rona gutafipui ei otalai nenera ma ei gigei na ude fawi, uaa rona maꞌau aꞌa ei Jew, Jesus namii u dupuaa roꞌou ma ware, “Inei rawani ua ei naranaraa hamuꞌou!” 20 I waredigaa fei, na famaꞌaa roꞌou guei panina ma huwana. Roꞌaa fanunuaa mei fasu, ronamina niꞌeniꞌe ei otalai nenera.
21 Ina warediai Jesus ba, “Inei rawani ua ei naranaraa hamuꞌou! Ana aleꞌei ba na aloagiau mei Ama, a aloaa hamuꞌou.” 22 Ma aꞌa fei, ina fawenailao aꞌa roꞌou ma na ware, “Tonaa fei Spiriti Apuna. 23 Nabaa hamoꞌaa futoaa ei hafeloꞌaa nemea, i paꞌai ei hafeloꞌana; nabaa lomi hamoꞌaa futoaa ei hafeloꞌana, ana lomi i paꞌai.”
Jesus na Faꞌarewa aꞌa Thomas
24 Ma Thomas (ana harana Didymus), hemea ei Hefua ma Helagui, hia, lomi aꞌa ei otalai nenera ei i nomai Jesus. 25 Siꞌei, rona warefania, “Haiꞌouna fanunudigaa mei Fasu!”
Maꞌuaa ina warenaa aꞌa roꞌou, “Nabaa lomi na fanunupaꞌaa ei dibaa fadua i panina ma didifinaa fei anaꞌanau wagina ma didifinaa paniu huwana, ana lomi a nara ba faꞌua.”
26 Nenee heai hafapagipagia, ei otalai nenerana na gutadiai laloo fei humu ma Thomas aꞌa roꞌou. Na fawidii ei gigei, maꞌuaa Jesus namii u dupuaa roꞌou ma ware, “Inei rawani ua ei naranaraa hamuꞌou!” 27 I dii, ina warenaa aꞌa Thomas, “Didifinaa fei anaꞌanamu yeni; maꞌaiaa gueni paniu. Roainamii fei panimu ma didifinia huwau. Fapedugaa ei hamamaguamu ma narafaweꞌi.”
28 Thomas na warenaa aꞌana, “Mena Fasuu, mena Haidaniau!”
29 Ma Jesus na warenaa aꞌana, “Siꞌei ba ona fanunupaꞌau, ona narafaweꞌi; rona paꞌi hawegiaa roꞌou—ei rona narafaweꞌi maꞌuaa, lomi rona fanunuau.”