Fei Asiꞌana
28
Nenee fei Sabbath, i baꞌapanii fei rawarawa arewaa wagii fei hefapagipagia, Mary Magdalene mawe mei ana hemeadiai Mary, laguna aunu ba laguꞌaree maꞌa fei nopaa maꞌea.2 Inamina rerere fei malagufu, uaa hemea aloꞌaloo mei Fasu na upugio i pafea, na dinaa aꞌa fei nopaa maꞌea, piguaa fei mugoo ma guta pafona. 3 Fei maumauna aleꞌei usida ma ei susuna namina poꞌimalewa. 4 Ei oanananaa, ronamina maꞌaufunurere aꞌana ma roꞌou aleꞌei maꞌea ramaꞌa.
5 Mei aloꞌalo na warenaa aꞌa laguei pifine, “Apuna maꞌau, uaa una aida ba hamuꞌei labaginaa Jesus, mei rona fatawaia. 6 Hia, lomi yeni; ina asiꞌadii, ana aleꞌei ei wareana. Midoꞌo maꞌa feni nopana. 7 Ma aunubatafa ma re warefanaa ei otalai nenerana ba: ‘Ina asiꞌadii aꞌa fei maꞌea ma fi aunulao i maꞌaa hamuꞌou yei Galilee. Hamowe maꞌaia yena.’ Te, una warefanidigaa hamugua.”
8 Siꞌei, laguei pifine, laguna diꞌinibatafainaa fei nopaa maꞌea; laguna maꞌau, maꞌuaa, ana lagunamina niꞌeniꞌe ma poni ba laguꞌaa warefanaa ei otalai nenerana. 9 Ana ei ua, Jesus na bapaꞌaa lagua. Ina ware, “Mafufuo.” Laguna nomai aꞌana, panarofaa pinena ma laguna losuinia. 10 Ma Jesus na warenaa aꞌa lagua, “Apuna maꞌau. Wi warefanaa ena lofuu ba ronei dinaa Galilee; rowe fanunuau yena.
Ei Wareaa ei Oanananaa
11 Ei laguꞌei tatalailao laguei pifine, hefiꞌa ei oanananaa, rona waduꞌainaa fei baua gufu ma uꞌufanaa ei famamoaa humuu mei Haidaa minaa ei manumanu rona fanunuia. 12 Roꞌaa fiwarewareidii ei bauaniaa gufu ma ei famamoaa humuu mei Haidaa, rona paꞌapaꞌainaa hepalo naranara ma fanaa ei foꞌaa watauda mugoo poꞌi. 13 Ma rona warefanaa roꞌou, “Hamonei ware ba, ‘Ei otalai nenerana, rona nomai poi ei hamoꞌei maꞌigu ma poropaꞌainia.’ 14 Nabaa i guainaa fei uꞌugaa fei mei gavanaa, ipowe rawani aꞌana ma lomi ba hamoꞌaa tonaa dududua wagina.” 15 Siꞌei, ei ramaꞌaa foꞌaa, rona tonaa ei mugoo poꞌi ma bigiꞌia aleꞌei rona guainia. Ma fei uꞌuga fei, na talenaa aꞌa watauda gufu dupuaa ei Jew aꞌa fei au fei nopaꞌamii wagieni.
Ronei Bigiꞌaa fei Baua Bigiꞌa
16 Ma ei hefua ma hemea otalai nenerana, rona aununaa Galilee aꞌa fei maugeni, fei na ware Jesus ba ronei dinaa wagina. 17 Roꞌaa maꞌapaꞌia, rona losuinia; maꞌuaa, hefiꞌa, rona hamamagua. 18 Ma Jesus na nomai aꞌa roꞌou ma ware, “Minaa ei faufau i pafea ma yeni malagufu ina fanidigau. 19 Siꞌei, hamonei aununaa aꞌa minaa ei gufu ma feroinaa ei ramaꞌa ba ronei nenerau ma hamonei pudugufinaa roꞌou aꞌaa fei haraa mei Ama ma mei Naꞌu ma fei Spiriti Apuna 20 ma feroinaa roꞌou ba ronei neneraa minaa ei warefanau hamuꞌou. Ma apowe oafipui aꞌa hamuꞌou ranimai, nopaꞌaloo fei pedupeduu feni ano.”