3 Iꞌa fanunupaꞌia Judas, mei na aloia, ba rona ware ba nei maꞌe Jesus, inamina faloloaꞌi ma na auhadiweꞌinaa ei odufua paꞌania mugoo poꞌi silver aꞌa ei famamoaa humuu mei Haidaa mawe ei bauaniaa gufu. 4 Ina ware ba, “Yau, una bigifafelo, uaa una aloaa hemea maꞌea ma lomi hafeloꞌana.”

Rona ware, “Abaa manumanuu haiꞌodu! Uaa manumanumu.”

5 Siꞌei, Judas na siminaa ei mugoo poꞌi laloo fei humuu mei Haidaa ma aunu. I dii, ina nolao ma re fahabe.

6 Ei famamoaa humuu mei Haidaa, rona hauꞌaa ei mugoo poꞌi ma ware, “Lomi na rawani aꞌa fei law nabaa oꞌaa augia laloo fei udeꞌudee ei mugoo poꞌi, uaa na udia raraa mei maꞌea.” 7 Siꞌei, ronawe ware ba ei mugoo poꞌi ei nei ponoꞌaa hepalo malagufu fawelei ronaꞌo bigiꞌaa ei babagii ma ipowe oanaa huapuu ei ramaꞌaa hepapa gufu. 8 Sifei, fei paꞌafina ba nopaꞌamii wagieni ronaꞌo ware ba Malagufu Raraa. 9 Ma fei diwareaa Jeremiah, mei mamamaꞌa nawe faꞌuai: “Rona tonaa ei odufua paꞌania mugoo poꞌi silver, ei rona augia ei Israel ba ponoꞌana 10 ma aꞌa fei, rona ponoꞌaa fei malagufu, fawelei ronaꞌo bigiꞌaa ei babagii, ana aleꞌei tamanu mei Fasu na ware ba unei bigiꞌia.”

11 Ma ei, Jesus na u i maꞌaa mei gavanaa ma mei gavanaa na iꞌigainia, “Haa, yoi, mei haparaa ei Jew?”

Jesus na ware, “Hiꞌi, ana aleꞌei ona wareia.”

12 Roꞌaa ware ei famamoaa humuu mei Haidaa mawe ei bauaniaa gufu ba ina bigifata, lomi ina wareware. 13 Ma Pilate na iꞌiginia, “Ona guainia ei uꞌufafeloaa roꞌou yoi?” 14 Maꞌuaa Jesus lomi na wareware, paꞌaa lomi na ware aꞌa hepalo hafeloꞌa wareaa roꞌou—ma namina maduofo wagina mei gavanaa.

15 Ma wagii fei au Hananaa, fei maumau mei gavanaa ba i alafaleleꞌanaa nemea i laloo humuu boboꞌaia, nemea rona nunuminia ei gupuu ramaꞌa. 16 Aꞌa fei au fei, rona paꞌi hemea paꞌaa hafeloꞌa i laloo humuu boboꞌaia, harana Barabbas. 17 Siꞌei, roꞌaa figupuidigimai ei ramaꞌa, Pilate na iꞌiginaa roꞌou, “Hini lagua ba a alafaleleꞌania aꞌa hamuꞌou: Barabbas, o Jesus, mei rona roroinia ba Christ?” 18 Uaa ina aidadii ba ei roꞌaa fifaninaa Jesus panina, siꞌei ba rona punepune.

19 Ei i guta pafoo fei gutanaa mei fadududua Pilate, mei harona na alonaa aꞌana feni neꞌia feni: “Apuna bigiꞌaa hepalo manumanu aꞌa mei wanewanea, uaa laloo fei mefiu wagieni, namina fiꞌi tabau uaa hia.”

20 Maꞌuaa ei famamoaa humuu mei Haidaa mawe ei bauaniaa gufu, rona uꞌugainaa ei gupuu ramaꞌa ba Barabbas nei leleꞌaa ma Jesus nei maꞌe.

21 Na iꞌigai mei gavanaa, “Hini lagua hamona nunuminia ba a alafaleleꞌafanaa hamuꞌou?”

Rona ware, “Barabbas.”

22 Pilate na iꞌigai, “Ma a bigiꞌaa tamanu aꞌa Jesus, mei rona roroinia ba Christ?”

Minaa roꞌou, rona ware ba, “Fatawaia!”

23 Pilate na iꞌigai, “Hamatani? Tamanu fei bigifatatana?”

Maꞌuaa, rona haropararaiꞌapoi, “Fatawaia!”

24 Iꞌa fanunupaꞌia Pilate ba lomidiai maꞌatalana ma fei gupuu ramaꞌa fipowe asiꞌaa fei sibaa roꞌou, ina tonaa fei ranu ma na fesuaa panina i pudaa roꞌou. Ma na ware, “Lomi na paꞌi tatau aꞌa ei raraa meni wanewanea. Manumanuu hamuꞌou!”

25 Minaa ei ramaꞌa, rona ware, “Ei rarana, na udenaa pafoo haiꞌou mawe ei naꞌuu haiꞌou!”

26 Ma ina alafaleleꞌanaa Barabbas aꞌa roꞌou. Maꞌuaa ina ware ba ei maroana, ronei babuinaa Jesus ma ina fifaninaa panii roꞌou ba ronei fatawaia.

27 Ma ei ramaꞌaa foꞌaa mei gavanaa, rona tauduginaa Jesus i laloo fei Praetorium ma minaa ei ramaꞌaa foꞌaa, rona ufaweloinia. 28 Rona dudufaꞌalaꞌalaia ma hawainia aꞌa hepalo hawaa ugu ina ro 29 ma rona fifigifipuinaa ei wowoꞌii na hogia aleꞌei tao hapara ma rona aunaa tabana. Rona augaa hepalo o i panina pepei maꞌau, faꞌunaa duꞌuu roꞌou maꞌana ma hararasinia. Rona ware, “Haguꞌu, mena haparaa ei Jew!” 30 Rona huwia, tonaa fei o ma hafuhafugaa tabana. 31 Roꞌaa hararasidigia, rona dudumaa fei hawaa ugu ma farafehadiweꞌinaa hia ana ei susuna. Ma rona aunudugia ba roꞌaa fatawaia.

32 Ei roꞌei asiꞌalao, rona nobapaꞌaloo hemea Cyrene, harana Simon ma rona augaa fei hawafolo foreforena ba nei harenia. 33 Rona nomai fawelei, Golgotha (hanuna ba Naꞌanaꞌa Guitaba). 34 Fawelei, ba roꞌaa fahunumaa Jesus fei wine, fei rona fihafuinia aꞌa fei ranuu ei paraꞌaa fua; maꞌuaa, iꞌa hunumaꞌaia, lomi na nunuminia. 35 Roꞌaa fatawadigia, rona fiꞌalaginaa ei susuna aꞌa hepalo uniꞌuni fifigaia.^a 36 Rona gutaꞌomaꞌaia yei. 37 I palalaa fei tabana rona neꞌiꞌaugaa feni ba tatana:

41 Ana aleꞌei, ei famamoaa humuu mei Haidaa, ei feroiaa law mawe ei bauaniaa gufu, rona hararasinia. 42 Rona ware, “Ina fatelaꞌanaa hefiꞌa, maꞌuaa, lomi ba i fatelapaꞌaa anaia! Hia Haparaa Israel! Inei upumai aꞌa fei hawafolo ma oꞌawe nara ba faꞌua wareana. 43 Ina narafaweꞌi aꞌa mei Haidaa. Na rawani ba mei Haidaa nei fatelaꞌania eꞌeni nabaa ina nunuminia, uaa ina ware, ‘Yau Naꞌuu mei Haidaa.’” 44 Ana aleꞌei, laguei fafanao, laguei laguna fatawafipui aꞌana, laguna warefafeloia.

45 Haloaina nopaꞌaloo fei faꞌoduaiaa idoꞌo, minaa ei gufu tadiweꞌai na roroma. 46 Aleꞌena fei faꞌoduaiaa idoꞌo, Jesus na aipararai, “Eloi, Eloi,^b lama sabachthani?”—hanuna ba, “Mena Haidaniau, mena Haidaniau, tani o ofadugau?”

47 Hefiꞌa ei roꞌaa ufalarai yei, roꞌaa guainaa fei, rona ware, “Ifi harofaa Elijah.”

48 Ana ei ua, hemea na ponilao ba i tonaa fei fahununu, fei i fahununaa fei wine aꞌa fei ranuu ei paraꞌaa fua, na fasuia aꞌa hepalo haihai ma roainalao aꞌa Jesus ba nei hunumia. 49 Ma ei roꞌou, rona ware, “Diꞌininia ma o fanunu ba i nomai Elijah mi hadumana.”

50 Ma iꞌa aiparararaidiai Jesus, ina fanaa fei spiritina.

51 Ana aꞌa fei au fei, fei rapirapi i laloo fei humuu mei Haidaa na aninirai pafea ma dinaa pu. Fei malagufu na rere ma ei mugoo, rona afala. 52 Ei nopaa ei maꞌea na baꞌagigi ma ei unuu watauda maꞌea, ei rona apunai, rona asiꞌatodiai harenuaa roꞌou. 53 Rona asiꞌamai aꞌa ei nopaa ei maꞌea ma nenee fei asiꞌanaa Jesus, rona aununaa aꞌa fei gufu na apunai ma ina faꞌarewa aꞌa watauda ramaꞌa.

54 Mei centurion mawe ei roꞌei omaꞌafipuinaa Jesus aꞌana, roꞌaa fanunuaa fei rereaa malagufu mawe minaa ei manumanu, ronamina maꞌau ma rona ware, “Paꞌaa faꞌua ba hia, Naꞌuu^c mei Haidaa!”

55 Watauda pifine yei, roꞌei fanunumai raua maꞌida. Rona neneraa Jesus ei i norai Galilee ba roꞌaa hadumia aꞌa ei nunumiana. 56 Dupuaa roꞌou, Mary Magdalene, Mary mei inaa James ma Joses ma mei inaa ei naꞌuu Zebedee.

57 I nopoilao, ina nomai hemea ramaꞌa watauda mugoo poꞌina, gufuna Arimathea, harana Joseph, mei ana hia, nawe neneraa Jesus eꞌeni. 58 Ina aunu ma iꞌiginaa Pilate ba nei fania fei unuu Jesus ma Pilate na ware ba ei maroana, ronei fania. 59 Joseph na tonaa fei unu, fahawainia aꞌa hepalo lawalawa linen lomi na loloa 60 ma naree fahainopia laloo fei manufau nopaa maꞌea fei bigiꞌaugana aꞌa ei naꞌanaꞌa. Ina piguꞌaugaa hepalo baua mugoo i maꞌaa fei wawaduꞌii fei nopaa naꞌanaꞌa ma ina aunu. 61 Mary Magdalene mawe hemeadiai Mary, laguna guta omaꞌanaa fei nopaa maꞌea.

62 Iꞌa nofidunaranilao, hefei arewaa nenee fei Sabbath, ei famamoaa humuu mei Haidaa mawe ei Pharisee, rona aunu ba roꞌaa maꞌa Pilate. 63 Rona ware, “Haguꞌu, haiꞌouna nonominia ba ei fi guta mei ramaꞌaa sifisifi, ina ware ba, ‘Nenee oduai arewaa, awe asiꞌadiai.’ 64 Hee, onei warefanaa ei maroamu ba ronei omaꞌafarawaninaa fei nopaa maꞌea hawina fei faꞌoduaiaa arewaa. Nabaa lomi, woro naraa haiꞌou ba ei otalai nenerana, rowe nomai ma topaꞌainaa fei ununa ma warefanaa ei ramaꞌa ba na maꞌeleleꞌaa aꞌa ei maꞌea. Ma ei sifisifii roꞌou, ipowemina apoidiai laraa ei sifisifii roꞌou famaꞌa.”

65 Pilate na ware, “Dugaa hefiꞌa oanananaa. Wi lawagifarawaninaa fei nopaa maꞌea aleꞌei apaꞌaa hamuꞌou.” 66 Siꞌei, ronaree lawaraa fei nopaa maꞌea aꞌa hepalo tamatama pafoo fei mugoo ma faꞌugaa ei oanananaa.