Jesus na U i Pudaa Pilate, mei Gavanaa Rome
15
Mafufuo badu ei famamoaa humuu mei Haidaa fipuinaa ei bauaniaa gufu, ei feroiaa law mawe minaa ei bauaniaa ei Jew, ronawe paꞌapaꞌainaa hepalo naranara. Rona fauroroꞌinaa Jesus, nodugia ma fifaninia aꞌa Pilate.2 Na iꞌigai Pilate, “Haa, yoi mei haparaa ei Jew?”
Na ware Jesus, “Hiꞌi. Ana aleꞌena wareamu.”
3 Ei famamoaa humuu mei Haidaa, rona uniꞌunia aꞌa watauda manumanu. 4 Siꞌei, na iꞌigidinia Pilate, “Lomi o wareware? Maꞌaia. Rona ware ba ona bigifatataiaa watauda manumanu.”
5 Maꞌuaa lomi na wareware Jesus ma Pilate na hawaiꞌuaiaa poana.
Rona Ware ba Jesus nei Maꞌe
6 Hepalo maumau wagii fei Hananaa ba i ala hemea boboꞌaia, mei rona nunuminia ei ramaꞌa. 7 Hemea, harana Barabbas, hia laloo humuu boboꞌaia. Hia hemea na foꞌafamaꞌe aꞌa fei au hefiꞌa na fadugedugeaa ei bauaniaa gufu. 8 Ei ramaꞌa, rona nomai aꞌa Pilate ma iꞌiginia ba nei bigiꞌia aꞌa roꞌodu aleꞌei inaꞌo bigiꞌia.
9 Na iꞌigai Pilate, “Hamona nunuminau ba a alafanaa hamuꞌodu mei haparaa ei Jew?” 10 Na aidadii ba ei famamoaa humuu mei Haidaa, rona fifaninaa Jesus aꞌana uaa fei punepuneaa roꞌodu. 11 Maꞌuaa ei famamoaa humuu mei Haidaa, rona faꞌunaꞌanaa ei ramaꞌa ba Pilate nei alafanaa roꞌodu Barabbas.
12 Pilate na iꞌiginaa roꞌodu, “A bigiꞌaa tamanu aꞌa mei hamona ware ba haparaa ei Jew?”
13 Rona memewai, “Fatawaia!”
14 Na iꞌigai Pilate, “Hamatani? Tamanu ei bigifatatana?”
Ma ronamina memewaiꞌapoidiai, “Fatawaia!”
15 Siꞌei ba i fawaneneaa ei ramaꞌa, Pilate na alafanaa roꞌodu Barabbas. Na uga ba Jesus nei to hafuhafu ma fifaninia ba nei fatawa.
Ei Foꞌaa na Hararasinaa Jesus
16 Ei foꞌaa, rona noduginaa Jesus laloo fei baua humuu mei bauaniaa foꞌaa (harana ‘Praetorium’) ma harofipuinaa minaa ei foꞌaa. 17 Rona farafenaa hia fei susu, pomana watolaa marawi ma roa ma rona fifigaa hepalo hogiaa tao ma fataonaa tabana. 18 Ma ronawe haronaa aꞌana, “Uu, mena haparaa ei Jew!” 19 Rona hafuhafugaa tabana aꞌa hepalo o ma huwia. Rona faꞌunaa duꞌuu roꞌou ma losuinia. 20 Ei roꞌaa hapehapeidigia, rona dudumaa fei susu ma farafedinaa hia ana fei susuna. Siꞌei, rona nodugia ba roꞌaa fatawaia.
Rona Fatawaia
21 Hemea Cyrene, harana Simon, mei amaa Alexander ma Rufus, hia noranarai sugutataꞌaia ma fi talaifaloginaa roꞌodu ma rona ware ba inei harenaa fei hawafolo. 22 Rona nodugaa Jesus fawelei rona ware ba Golgotha (hanuna Fawelei Guitaba). 23 Siꞌei, rona fani numana wine na fihafuinaa myrrh maꞌuaa lomi na hunumia. 24 Rona fatawaia ma alaginaa ei susuna. Ma hememea roꞌou na tonaa ei susuna aꞌa fei uniꞌuni fifigaia.
MEI HAPARAA EI JEW.
27 Rona fatawaiaa laguei fafanao aꞌana. Hemea, maꞌauna ma hemea mauwina. 28 a 29 Ei rona talaifalogilao, rona hararasinia. Rona oroꞌoreinaa tabaa roꞌodu ma ware ba, “Yoi, mena ba o fawataꞌoꞌoaa fei humuu mei Haidaa ma faduia laloo oduꞌai arewaa, 30 nadii, upugio aꞌa fena hawafolo ma hadumaa ana yoi!”
31 Ana aleꞌei, ei famamoaa humuu mei Haidaa ma ei feroiaa law, rona hararasinia dupuaa roꞌodu. Rona ware ba, “Na hadumaa hefiꞌa, maꞌuaa lomi i hadupaꞌaa anaia! 32 Mena Christ,b mena haparaa Israel, upugio eni aꞌa fena hawafolo ma haiꞌou fanunuia ma nara ba faꞌua.” Laguei, laguꞌaa fatawa aꞌana, ana lagunamina hararasinia.
Fei Maꞌeaa Jesus
33 Aꞌa fei faꞌoloroaa hour fei roromaa na hawaꞌonaa minaa feni malagufu nopaꞌaloo fei fafaimpaloaa hour. 34 Ma aꞌa fei fafaimpaloaa hour, Jesus na aimemewai, “Eloi, Eloi, lama sabachthani?”—hanuna ba, “Mena Haidaniau, Mena Haidaniau, tani o ofadugau?”
35 Hefiꞌa ei roꞌaa ufalaraifarafiꞌi, rona guainia ma ware, “Guainia, ifi harofaa Elijah.”
36 Hemea na poni ma fahinumaa fei waraguaa wine aꞌa fei hinu ma augia aꞌa hepalo raramanu ma fanaa Jesus ba nei hunumia ma na ware, “Apuna papaꞌana. Odoꞌo maꞌa ba i nomai Elijah ma faꞌuꞌupuia.”
37 Jesus nawemina aimemewai ei fidii fawenaiꞌapoi.
38 Fei rapirapii fei humuu mei Haidaa na baꞌaꞌanininaa guapapa, faꞌugio paꞌudu ma aununaa pu. 39 Ma na ufalarai maꞌaa Jesus hemea centurion. I guainaa fei aigana mac fanunuia batanai fi maꞌe, na ware, “Paꞌaa faꞌua ba meni ramaꞌa meni, paꞌaa Naꞌuud mei Haidaa!”
40 Hefiꞌa pifine, rona ufanunumai rauaa. Dupuaa roꞌodu, Mary Magdalene, Salome, Mary, mei inaa James mei baubara ma ana inaa Joses. 41 Yei Galilee eni pifine eni, ronafane nenegia ma hadumia aꞌa ei nunumiana. Wataudadiai pifine, ei rona nofipuimai aꞌana dinaa Jerusalem, roꞌou yei anaa.
Fei Iꞌifaiaa Jesus
42 Ma fei, arewaa Pagipagia (hanuna ba, nenee fei arewaa fei, Sabbath). Ma fi fafimai, 43 Joseph, mei Arimathea, hemea bauaniaa ei Jew, hemea rona maꞌauia, mei ana fi gutaꞌomaꞌaa fei haparaiaa mei Haidaa, na aunufarawaninaa aꞌa Pilate ma iꞌigainaa fei hudi unuu Jesus. 44 Pilate na baꞌarofo ei i guainia ba na maꞌedii. Na harofaa mei centurion ma iꞌiginia ba napaꞌaa maꞌedii Jesus. 45 I guaidigia aꞌa mei centurion ba paꞌaa faꞌua, na fanaa Joseph fei hudi ununa. 46 Siꞌei Joseph na ponoꞌaa hepalo hawa linen, na faꞌupuaa fei hudi unu, guasumia aꞌa fei linen ma augia laloo hepalo huapu, ei waduaa roꞌodu aꞌa ei naꞌa. Ma na piguaa hepalo mugoo poaa fei wawaduꞌii fei huapu. 47 Mary Magdalene ma Mary mei inaa Joses, laguna fanunuꞌuꞌumaa fawelei rona fahainopia.