Fei Asiꞌana
16
I pedu fei Sabbath, Mary Magdalene, Mary mei inaa James mawe Salome, rona ponoꞌaa ei pao dufa ba roꞌaa hapigaa fei unuu Jesus. 2 Paꞌaa mafufuo aꞌa fei rawarawa arewaa fei hefapagipagia, nene ua fei anaa halo, roꞌei talaiꞌamaꞌanaa fei huapu 3 ma rona fiꞌiꞌigai, “Hini i piguaa fei mugoo aꞌa fei wawaduꞌii fei huapu?”4 Maꞌuaa roꞌaa aralao, rona fanunupaꞌaa fei baua mugoo na pigudii. 5 Roꞌei waduꞌailao aꞌa fei huapu, rona fanunupaꞌaa hemea baubara, susuna poꞌia, na guta i pepei maꞌau ma rona maꞌau.
6 Ina ware, “Apuna maꞌau. Hamoꞌei lalabaginaa Jesus mei Nazareth, mei na fatawa. Ina asiꞌadii! Hia lomi yeni. Maꞌa, fawelei roꞌaa fudigia yei. 7 Maꞌuaa aunu ma warefanaa ena otalai nenerana mawe Peter ba ina aunudiginaa Galilee i maꞌaa hamuꞌodu. Yena hamoꞌaa fanunupaꞌia, ana aleꞌei idii wareia Jesus aꞌa hamuꞌodu.”
8 Ei pifine, rona maꞌaufunurere ma poniꞌasiꞌaa aꞌa fei huapu. Lomi rona wareaa hepalo manumanu aꞌa hemea, uaa ronamina maꞌau.
Jesus na Faꞌarewa aꞌa Mary Magdalene
9 Jesus, i asiꞌaa foi aꞌa fei rawarawa arewaa fei hefapagipagia nadoꞌo faꞌarewa aꞌa Mary Magdalene, mei hia na fawalaꞌanaa olorompalo pigea aꞌana. 10 Ina aunu ma warefanaa ei rona oa aꞌa Jesus famaꞌa, ei roi faloloaꞌi ma aiꞌai. 11 Roꞌaa guainia ba Jesus na mamaꞌadii ma Mary na fanunupaꞌia, lomi ronapoꞌo nara ba faꞌua.
Jesus na Faꞌarewa aꞌa Helagui Otalai Nenerana
12 Hinene, na uꞌugaidiai fei maumau Jesus, ei i faꞌarewa aꞌa helagui roꞌou, ei laguꞌei tatalai yei sugatataꞌaia. 13 Laguna hadiweꞌai ma warefanaa roꞌodu; maꞌuaa ana lomi ronapoꞌo nara ba faꞌua.
Jesus na Faꞌarewa aꞌa ei Hefua ma Hemea
14 Hinene, ei roi hanana, Jesus na faꞌarewa aꞌa ei hefua ma hemea ma na hotaꞌaa roꞌodu, uaa lomi na weꞌi naranaraa roꞌodu ma na waiwai tabaa roꞌodu ma lomi ronapoꞌo nara ba faꞌua ei wareaa ei rona fanunuia nenee fei asiꞌanana.
15 Na ware aꞌa roꞌodu, “Hamonei aununaa aꞌa minaa ena gufuu feni ano ma wareaa fei rawaniꞌa warea aꞌa minaa ena ramaꞌa. 16 Hini na weꞌi naranarana ma i pudugufai, iwe tela; maꞌuaa hini lomi na weꞌi naranarana, iwe to lagina. 17 Ma aꞌa ena rona narafaweꞌi wagii fei harau, i bigipaꞌi eni hilala eni: roꞌawe fawalaꞌanaa ena pigea, wareaa manufau wareagufu, 18 panarofaa ei waꞌa hafelo ma ena rona hunumaa ei numa, ei na paꞌi siafa wagina, lomi i fagianapaꞌaa roꞌodu; roꞌaa augaa panii roꞌou pafoo ei funua ma farawaninaa roꞌou.”
Mei Haidaa na Duginaa Jesus Pafea