ACTS
Jesus na Dinaa Pafea
1
Mena Theophilus, aꞌa fei doꞌo neꞌiau buꞌu una neꞌinaa minaa ei bigiꞌaa Jesus ma ei feroiana 2 nopaꞌaloo fei ba ina warenaa aꞌa ei apostle, ei rafeiana wagii fei Spiriti Apuna ma nawe duginaa hia pafea mei Haidaa. 3 Nenee fei fiꞌiana, ina faꞌarewa aꞌa eni ramaꞌa eni ma na famaꞌaa roꞌou ba hia napaꞌaa mamaꞌa. Ina faꞌarewa aꞌa roꞌou laloo gunaroa paꞌania arewaa ma uꞌufanaa roꞌou fei haparaiaa mei Haidaa. 4 Hefarani, ei fi hananafipui aꞌa roꞌou, na warefaweꞌi aꞌa roꞌou ba: “Apuna diꞌininaa Jerusalem, maꞌuaa omaꞌaa fei fana, fei faꞌunaiaa mei Amau, fei diwareana aꞌa hamuꞌou. 5 Uaa, John na pudugufinaa hamuꞌou ranu,a maꞌuaa, aleꞌena figa ua arewaa, hamowe pudugufai aꞌa fei Spiriti Apuna.”Mei Haidaa na Duginaa Jesus Pafea
6 Hee, ropowe figupui, rona iꞌiginia, “Mena Fasu, aꞌa feni au eꞌeni ba o faꞌasiꞌadinaa fei haparaia aꞌa ei Israel?”
7 Ina warenaa aꞌa roꞌou: “Abaa manumanuu hamuꞌou ba hamuꞌou aida ena au o ena arewaa, ena nadii augia aꞌa fei foraforana, mei Ama. 8 Maꞌuaa, hamowe to faufau ena na pasi pafoo hamuꞌou fei Spiriti Apuna ma uꞌugaa tamanu hamona fanunuia aꞌau yeni Jerusalem ma laloo minaa ei Judea ma Samaria ma minaa ei gufu aꞌa feni ano.”
9 I waredigaa feni, mei Haidaa na duginaa hia pafea i pudaa roꞌou ma hepalo papalei na tapuꞌaa pudaa roꞌou.
10 Ifi aunulao pafea, roꞌeimina araiaa nenena ma ana ei ua, helagui wawane, susuu lagua poꞌiaa, laguna u papaa roꞌou. 11 Laguna ware, “Ena Galilee, tani hamuꞌou ufalarai yeni ma aranaa pafea? Ana mena Jesus mena, mena na duginaa hia pafea mei Haidaa, iwe hadiweꞌimai ana aleꞌei hamoꞌaa fanunuia fi dinaa pafea.”
Rona Rafeinaa Matthias ba i Tonaa Gutanaa Judas
12 Siꞌei, rona hadiweꞌinaa Jerusalem noramiaa roꞌou aꞌa fei maugeni, fei rona roroinia Maugeni Olive. Fei rauana aꞌa Jerusalem aleꞌei ona talai laloo heai Sabbath.b 13 Roꞌaa sufudaimai, rona tafanenaa pafea ma waduꞌainaa fei humu rona guta wagina. Ei roꞌou yei, Peter, John, James, Andrew; Philip ma Thomas, Bartholomew ma Matthew; James mei naꞌuu Alphaeus ma Simon mei Zealot (mei na haguaa gufuna) mawe Judas, mei naꞌuu James. 14 Ronaꞌaida lafulafufipui aꞌa ei pifine ma Mary, mei inaa Jesus mawe ei lofuna.
15 Aꞌa ei arewaa ei, Peter na ufalarai dupuaa ei narafaweꞌiac (hefaa gupuu ramaꞌa puduu roꞌou, hefa puꞌu ma enu paꞌania) 16 ma ware, “Ena lofuu, fei Buꞌu Apuna neipaꞌaa faꞌuai, fei ba mina mina na umuinaa David fei Spiriti Apuna ba batanai Judas, mei famamoaa ei rona panarofaa Jesus— 17 hia hemea maroaa oꞌou ma ana na bigi aꞌa feni bigiꞌaa mei Haidaa.”
18 (Aꞌa fei ponoꞌaa fei hafeloꞌana, na ponoꞌaa hefaa ano ma na pasifaro, fei hudi ununa na baꞌatawara ma ei pepeana na leleꞌaa. 19 Minaa ei yei Jerusalem, rona guainaa fei, siꞌei aꞌa fei wareagufuu roꞌou, rona roroinaa fei ano fei, Akeldama, hanuna ba fei Anoo Raraa.)
20 Peter na ware, “Hamatee, na neꞌidii laloo fei Buꞌuu Lauga,
“‘Fei humuna neimina namonamoa;
nemeadiai neiꞌaa guta wagina.’
ma,
“‘Ma fei bigiꞌana ba hia hemea famamoa, nemea nei tonia.’
21 Siꞌei, na rawani ba onei rafeinaa hemea na tatalaifipui aꞌa oꞌou ranimai ei fidoꞌo oafipui aꞌa oꞌou Jesus, 22 hemea aꞌa oꞌou wagii fei pudugufaiaa John, nopaꞌaloo fei au na duginaa Jesus pafea mei Haidaa. Uaa mei, inei rarafiaa oꞌou uꞌugaa fei asiꞌanana.”
23 Siꞌei, rona uniaa helagui: Joseph, mei rona roroinia Barsabbas (ana harana Justus) mawe Matthias. 24 Ma rona lafulafu ba: “Mena Fasu, faꞌarewaia aꞌa haiꞌou ba hini lagua ona rafeidigia 25 ba nei tonaa feni bigiꞌaa apostle, fei na rawaia Judas ba i retonaa fei arena.” 26 Siꞌei, fei mau fifigaiaa roꞌou na uniaa Matthias ba nei rarafiaa eꞌei hefua ma hemea apostle.