Fei Spiriti Apuna na Nomai wagii fei Au Pentecost
2
I nodigimai fei arewaa Pentecost, rona oafipui hefawala. 2 Ana ei ua, na memeꞌai fei aleꞌei hefaa baua lalarena noranarai pafea ma namina fapepesuaa fei humu rona guta wagina. 3 Rona maꞌapaꞌaa fei aleꞌei mau aleꞌaleaa hafi na tafola ma faloro pafoo hememea roꞌou. 4 Fei Spiriti Apuna namina didifaa minaa roꞌou ma rona wareaa hefiꞌadiai wareagufua aleꞌei i fawareaa roꞌou fei Spiriti Apuna.5 Ma aꞌa fei au fei, yei Jerusalem na paꞌi hefiꞌa Jew rona maꞌauaa mei Haidaa; noramiaa roꞌou aꞌa minaa ei gufu aꞌa feni ano. 6 Roꞌaa guainaa fei memeꞌaiaa fei, rona nofigupuimai fininaa tanoꞌuawalai roꞌou, uaa hememea na guainia ba rona warenaa wareagufuna. 7 Ronamina maduofo ma iꞌigai: “Haa, eni ramaꞌa roi wareware eni, abaa roꞌou Galilee? 8 Naꞌaa aleꞌei, tani hememea oꞌou na guaipaꞌaa roꞌou aleꞌei wareagufuu oꞌou? 9 Aleꞌei wareaa ei Parthia, Media ma Elam; ei ro guta Mesopotamia, Judea ma Cappadocia, Pontus ma Asia, 10 Phrygia ma Pamphylia, Egypt ma ei gufu i Libya na rafiꞌinaa Cyrene; ei noramiaa roꞌou Rome 11 (minaa eni—ei Jew mawe ei rona filoginaa losuiaa roꞌou ba roꞌou Jew); ei Crete ma ei Arab—ona guainia ba roꞌei uꞌugaa ei fananawalaa puda bigiꞌaa mei Haidaa aꞌa ei wareagufuu oꞌou!” 12 Rona maduofo ma poapoai wagina ma fiꞌiꞌigai: “Tamanu hanuna fei?”
13 Maꞌuaa hefiꞌa, rona fadinaa roꞌou ba: “Namina rata hunumaa roꞌou, wine.”b
Peter na Warenaa aꞌa fei Gupuu Ramaꞌa
14 Siꞌei Peter na ufalaraifipui aꞌa ei hefua ma hemea ma warefabauanai aꞌa fei gupuu ramaꞌa: “Hamuꞌou ena maroau Jew mawe hamuꞌou ena hamona guta Jerusalem, yau ba a uꞌugaa feni aꞌa hamuꞌou; guaifarawaninaa tamanu a wareia. 15 Eni ramaꞌa eni, lomi rona hunu poapoai aleꞌei naraa hamuꞌou. Faimeiai idoꞌo mafufuo ua eni! 16 Agia. Feni, fei nadii wareia mei mamamaꞌa Joel:
17 “‘Aꞌa ei aꞌapoo arewaa, mei Haidaa na ware,
yau, a aloarai fei Spiritiu pafoo minaa ei ramaꞌa.
Ena naꞌuu hamuꞌou pifine ma wawane, roꞌadii wareaa tamanu ba i nomai,
ei baubaraa hamuꞌou, roꞌaa fanunuaa hefiꞌa manumanu laloo naranaraa roꞌou aleꞌei mau foigia
ma ei bau gufuu hamuꞌou, roꞌaa mefinaa hefiꞌa manumanu aleꞌei mau foigia.
18 Ma aꞌa ei paniaa paniu anaa, pafoo minaa lagua, ei wawane ma pifine,
awe ipiaa fei Spiritiu aꞌa ena arewaa ena,
ma rowedii wareaa tamanu ba i nomai.
19 Awe au fananawalaa puda i pumanugawe
ma hilala yeni malagufu
aleꞌei raraa, hafi ma hagu.
20 Fei halo, iwe filoginaa roromaa
ma fei puda, iwe filogii aleꞌei raraa
hinene iwe nomai fei baua arewaa fininaa fei haweraa mei Fasu.
21 Ma hini ei rona lalaꞌaa
fei haraa mei Fasu, roꞌaa tela.’
22 “Ena Israel, guainaa feni: mei Haidaa na faꞌarewaiaa Jesus, mei Nazareth aꞌa hamuꞌou wagii ei foigia, fananawalaa puda ma hilala, ei na biginaa hia aꞌa hamuꞌou mei Haidaa, ei hamona apaꞌidigia. 23 Mei ramaꞌa mei, rona aloia aꞌa hamuꞌou ma mei Haidaa na aida ba i aleꞌei ma nadoꞌo naradigia; ma ei hafeloꞌa ramaꞌac rona bigiꞌaa fei nunumiaa hamuꞌou ma hamona foꞌafamaꞌeia ei hamoꞌaa fatawaia pafoo fei hawafolo. 24 Maꞌuaa, mei Haidaa na faꞌasiꞌania aꞌa fei maꞌea ma alagia aꞌa fei fiꞌiaa fei maꞌea, uaa paꞌaa lomi na hawia ba fei maꞌea i panarofia. 25 David na warewareia ba:
“‘Ranimai una fanunupaꞌaa mei Fasu i maꞌau.
Siꞌei ba hia i pepei maꞌauu, lomi ba a faꞌasisi.
26 Siꞌei, na niꞌeniꞌe fei naranarau ma fei raweraweu na lalaugi;
fei hudi unuu, ana i ude oꞌonai
27 uaa, lomi o rawanaa yau aꞌa fei huapu,
ma ana lomi ba o uga ba nei raia fei hudi unuu mei Apunaiamu.
28 Ona famaꞌaiau fei talaa faweweni;
owemina faniꞌeniꞌeau inamoamu.’
29 “Ena lofu, apaꞌaa warefaꞌuai aꞌa hamuꞌou ba mei amaa oꞌou David na maꞌe ma na iꞌifai ma fei huapuna ana yeni nopaꞌamii wagieni. 30 Maꞌuaa, hia hemea mamamaꞌa ma na aida ba mei Haidaa na faꞌunai aꞌana ba i fagutanaa nemea upuna aꞌa fei gutanana, guta hapara. 31 Na apaꞌidigia ba tamanu i nomai maꞌa na warewareaa fei asiꞌanaa mei Christd ba mei Haidaa, lomi i rawafanaa fei huapu ma ana lomi i wafuu fei hudi ununa. 32 Mei Haidaa na famamaꞌaa meni Jesus. Ma minaa oꞌou na fanunupaꞌia ba paꞌaa faꞌua fei. 33 Mei Haidaa na poroꞌaunaa hia i pepei maꞌauna ma mei Ama na fania fei Spiriti Apuna, fei ina faꞌunainia ma ipia aleꞌeni hamona fanunuia ma guainia eꞌeni. 34 Uaa, David lomi na dinaa pafea, maꞌuaa ana na ware,
“‘Mei Fasu na warenaa aꞌa mei Fasuu:
“Guta i pepei maꞌauu
35 nopaꞌaloo fei ba unawe aunaa ei bidibidii unumu
lalabenii pinemu.” ’
36 “Siꞌei, minaa ei Israel, roneipaꞌaa aida feni, ba: mei Haidaa na faꞌoanaa meni Jesus meni, meni hamona fatawaia ba hia Fasu ma Christ.”
37 Roꞌaa guainaa fei ei ramaꞌa, namina nafaꞌaa paruu roꞌou ma rona warenaa aꞌa Peter ma hefiꞌadiai apostle, “Ena lofu, oꞌaa bigiꞌaa tamanu wagii fei?”
38 Na ware Peter, “Minaa hamuꞌou nei filoginaa naranaraa hamuꞌou ma pudugufai aꞌa fei haraa Jesus Christ ba i futo ei hafeloꞌaa hamuꞌou. Ma hamoꞌaa tonaa fei Spiriti Apuna. 39 Fei faꞌunaia, manumanuu hamuꞌou ma ei naꞌuu hamuꞌou mawe minaa ei rona raua—aꞌa minaa ei na lalaꞌaa roꞌou mei Fasu, mei Haidaniaa oꞌou.”
40 Aꞌa wataudadiai warea, na aweinaa roꞌou ma iꞌigifaweꞌi aꞌa roꞌou ba, “Hamonei fawalaꞌanaa hamuꞌou aꞌa eni mau hafeloꞌaa feni tawe feni.” 41 Ei roꞌaa guaitonaa uꞌugana, rona pudugufai ma aleꞌei odufua pufabaꞌa na rarafiaa fei puduu roꞌou fei arewaa fei.
Fei Gutafipuiaa ei Narafaweꞌia
42 Rona fafefenaa roꞌou aꞌa ei feroiaa ei apostle, fei gutafipuia, fei hananafipuia ma lafulafua. 43 Minaa roꞌou na fani maꞌaua uaa ei watauda fananawalaa puda ma ei hilalaa foigia bigiꞌaa ei apostle. 44 Minaa ei narafaweꞌia na gutafipui ma tamanu hememea na paꞌi, manumanuu minaa roꞌou. 45 Rona aloaa ei hape ma ei finefinee roꞌou ma fanaa hini lomi na paꞌi manumanuna. 46 Minaa ei arewaa ronaꞌaida figupui i malalaa fei humuu mei Haidaa. Rona hananafipui faraa pidaua laloo humuu roꞌou ma wagii hepalo ua niꞌeniꞌeaa naranara, 47 rona uduginaa mei Haidaa. Ma minaa ei ramaꞌa, rona niꞌeniꞌe aꞌa roꞌou. Ma aꞌa ei rona tela, mei Fasu na fahonoꞌaa puduu roꞌou laloo hepapalo arewaa.