Peter na Farawaninaa mei Noinoi Ibaꞌiba
3
Heai arewaa Peter ma John, laguꞌei dinaa humuu mei Haidaa aꞌa fei au lafulafua aleꞌei oduai idoꞌo fafi. 2 Ma hemea ramaꞌa, hemea na torotonamii fei ibaꞌibana, rona poronaa hia poaa fanefanee fei humuu mei Haidaa, fei rona roroinia Fananamai, fawelei rona fagutania hepapalo arewaa ba i noinoi aꞌa ei rona waduꞌainaa malalaa fei humuu mei Haidaa. 3 I fanunupaꞌaa Peter ma John ba ana laguꞌaa waduꞌai, ina iꞌiginaa lagua ba fani mugoo poꞌina. 4 Peter ma John, laguna fanunufawanewanenaa aꞌana. Ma na ware Peter ba, “Fanununamii aꞌa haigua!” 5 Siꞌei, ina fanununaa aꞌa lagua hamatee na nara ba laguꞌaa fani manumanuna.6 Ma na ware Peter ba, “Silver o gold lomi una paꞌi, maꞌuaa tamanu na paꞌi a fanio. Wagii fei haraa Jesus Christ mei Nazareth, talai.” 7 Ina tauaa fei panina pepei maꞌau, faꞌasiꞌania ma ana ei ua, ei pinena na aloeloe ma nawe paꞌi faufauna. 8 Inaꞌaa ufalarainaa pinena ma talai. Ma na nogiaa lagua dinaa i malalaa fei humuu mei Haidaa. Na tatalai, palapala ma uduginaa mei Haidaa. 9 Roꞌaa fanunupaꞌia ei ramaꞌa ba na tatalai ma uduginaa mei Haidaa, 10 rona fanunuꞌapaꞌia ba ana mei naꞌaida guta noinoi i poaa fanefanee fei humuu mei Haidaa, fei rona roroinia Fananamai. Ma ronamina naranara watauda ma maduofo aꞌa fei rawaniꞌana.
Peter na Warenaa aꞌa ei Ofafanunua
11 Ei fi panarofaa Peter ma John mei noinoi, minaa ei, ronamina baꞌarofo ma ponimai aꞌa roꞌou fawelei rona roroinia ba Palee Solomon. 12 I fanunupaꞌaa fei Peter, na warenaa aꞌa roꞌou ba: “Ena Israel, tani i fabaꞌarofoaa hamuꞌou feni? Tani hamoꞌaa fanunufaꞌuꞌuaa haigua banaꞌaa aleꞌei ei faufau haigua o fei nenegifarawaniaa haigua mei Fasu na fatalainaa meni ramaꞌa meni? 13 Mei Haidaniaa Abraham, Isaac mawe Jacob, mei Haidaniaa ei amaa oꞌou, hia na fani hawera aꞌa mei nafina Jesus. Hamona fifaninia panii hefiꞌa ba ronei foꞌafamaꞌeia ma ware ba lomi hamona nunuminia i pudaa Pilate, ei i nara ba i alagia. 14 Lomi hamona nunuminaa mei Apunaia, mei Wanewanea ma hamona iꞌigai ba ronei alafanaa hamuꞌou mei na foꞌafamaꞌe ramaꞌa. 15 Hamona foꞌafamaꞌeaa mei fafasui fei faweweni, maꞌuaa, mei Haidaa na faꞌasiꞌania aꞌa fei maꞌea. Ona fanunudigaa fei manumanu fei. 16 Aꞌa fei narafaweꞌia wagii fei haraa Jesus, meni hamona fanunuia ma apaꞌia, hia na to faufau. Aꞌa fei narafaweꞌia wagii fei haraa Jesus, meni ramaꞌa meni namina rawaniꞌapoi ma minaa hamuꞌou na fanunuaa fei.
17 Siꞌei, ena lofuu, una aida ba lomi hamona apaꞌaa tamanu hamona bigiꞌia, ana aleꞌei ei bauaniaa hamuꞌou. 18 Maꞌuaa, sifei fei tala ba i bigiꞌaa tamanu nadii wareia aꞌa ei mamamaꞌa mei Haidaa ei i ware ba mei Christa i to fiꞌia. 19 Siꞌei, filoginaa naranaraa hamuꞌou ma momoꞌinaa aꞌa mei Haidaa ba ei hafeloꞌaa hamuꞌou i futo ma fei au gutafawenaia nei norai aꞌa mei Fasu 20 ma ba i aloaa Jesus mei Christ, mei na rafeinia uaa hamuꞌou. 21 Inei guta pafea nopaꞌaloo fei au ba mei Haidaa i auhadiweꞌinaa minaa ei manumanu aleꞌei fei faꞌunaiana mina aꞌa ei apunai mamamaꞌa. 22 Uaa, Moses na ware ba: ‘Mei Fasu, mei Haidaniaa hamuꞌou i faꞌasiꞌanaa nemea mamamaꞌa aleꞌei yau noramiana aꞌa fei maroaa hamuꞌou; hamonei guainaa minaa ei warefanana hamuꞌou. 23 Hini lomi i guainaa wareana ipowemina fiꞌalagii aꞌa ei maroana.’
24 “Hiꞌi. Minaa ei mamamaꞌa aꞌa fei au Samuel ma nolao, hini roꞌou na wareware, ronadii wareaa eni arewaa eni. 25 Ma hamuꞌou pai ei mamamaꞌa ma wagii fei fiꞌugaia watolaa mei Haidaa mawe ei amaa hamuꞌou. Ina warenaa aꞌa Abraham, ‘Aꞌa fei paimu, minaa ei ramaꞌaa feni malagufu, roꞌaa to hawegia.’b 26 Mei Haidaa na faꞌasiꞌanaa mei nafina ma nadoꞌo aloiamai aꞌa hamuꞌou ba i haweginaa hamuꞌou wagii fei ba i famomoꞌainaa hememea aꞌa ei hafeloꞌana.”