Peter ma John i Maꞌaa ei Sanhedrin
4
Ei bauaniaa humuu mei Haidaa ma mei bauaniaa ei oanananaa fei humuu mei Haidaa mawe ei Sadducee, rona dinaa aꞌa Peter ma John ei laguꞌei warewarenaa aꞌa ei ramaꞌa. 2 Ronamina narafafelo hamatee ei apostle, roꞌei feroinaa ei ramaꞌa ma uꞌu ba ei maꞌea, roꞌaa asiꞌadiai uaa Jesus. 3 Rona panarofaa Peter ma John ma siꞌei ba na fafidii, rona auꞌuaa lagua humuu boboꞌaia nopaꞌaloo mafufuo. 4 Maꞌuaa, watauda ei rona guainaa fei uꞌuga nawe narafaweꞌi wagina ma puduu ei naweree aleꞌei haipani pufabaꞌa.5 I noꞌarewalao, ei hapara, ei bauaniaa gufu mawe ei feroiaa law, rona figupui i Jerusalem. 6 Annas, mei paꞌaa bauaniaa humuu mei Haidaa, hia yei ma ana Caiaphas, John, Alexander mawe ei wawane, maroaa mei paꞌaa bauaniaa humuu mei Haidaa. 7 Rona faꞌugaa Peter ma John i maꞌaa roꞌou ma iꞌiginaa lagua ba: “Aꞌa tamanu faufau o hara hamuna bigiꞌaa feni?”
8 I dii, fei Spiriti Apuna na didifaa Peter ma ina warenaa aꞌa roꞌou: “Hamuꞌou ena hapara ma bauaniaa ei ramaꞌa! 9 Nabaa hamoꞌaa labaginaa fei paꞌafii fei rawaniꞌa bigiꞌa aꞌa mei ibaꞌiba ba batanai i rawanidiai, 10 te, hamuꞌou mawe minaa ei Israel, hamonei apaꞌaa feni: Meni i ufalarai i maꞌaa hamuꞌou ina rawani uaa fei haraa Jesus Christ, mei Nazareth, mei hamona fatawaia ma na faꞌasiꞌania aꞌa fei maꞌea mei Haidaa. 11 Hia fei
“‘mugoo, fei rona siminia ei fadufadua
ma nawe oanaa fafasuia fei humu.’
12 Fei teleꞌana lomi aꞌa nemeadiai, uaa lomidiai hepalo hara yeni haroo pafea ba oꞌaa tela wagina.”
13 Roꞌaa fanunupaꞌaa fei lauguꞌaa Peter ma John ma apaꞌia ba lomi laguna dinaa feferoia ma lagua aleꞌei ramaꞌa ua, rona maduofo ma narapaꞌia ba laguna tatalaifipui aꞌa Jesus mina. 14 Maꞌuaa, siꞌei ba rona fanunupaꞌia ba na ufalaraifipui aꞌa lagua mei na pedu ibaꞌibana, lomi ba rona wareaa hepalo warea. 15 Siꞌei, rona ware ba laguneidoꞌo diꞌininaa ei Sanhedrin ba roꞌaa fiwarewarei. 16 Rona fiꞌiꞌigai: “O bigiꞌaa tamanu aꞌa lagua? Minaa ei ramaꞌa Jerusalem, rona aida ba lagunamina bigiꞌaa hepalo baua foigia ma lomi owe opaꞌaipaꞌaa fei. 17 Maꞌuaa, fapapaunii feni manumanu feni ba neiꞌaa talaidiai aꞌa ei ramaꞌa, o warefaweꞌi aꞌa lagua ba laguneiꞌaa waredinaa feni hara feni aꞌa nemea.”
18 Ma rona lalaꞌidinamii lagua ma warefaweꞌi aꞌa lagua ba laguneiꞌaa fai uꞌu o feroinaa fei haraa Jesus. 19 Maꞌuaa laguna ware Peter ma John ba, “Hamonei naramaꞌaia. I rawani i pudaa mei Haidaa ba haiguꞌaa guainaa hamuꞌou laraa hia? 20 Uaa, lomi ba haiguwe uꞌuꞌaupaꞌainaa tamanu haiguna fanunuia ma guainia.”
21 Roꞌaa warefamamaꞌaudigaa lagua, ronawe rawaiaa lagua. Lomi rona narapaꞌi ba batanai roꞌaa fanimaꞌaiaa lagua, uaa, minaa ei ramaꞌa, rona uduginaa mei Haidaa aꞌa fei bigiꞌaa lagua. 22 Uaa, mei na pedu ibaꞌibana aꞌa fei foigia na muainaa gunaroa paꞌania igisimasi.
Fei Lafulafuaa ei Narafaweꞌia
23 Laguꞌaa aladii Peter ma John, laguna hadiweꞌinaa aꞌa ei maroaa lagua ma uꞌugaa minaa ei rona wareia aꞌa lagua ei famamoaa humuu mei Haidaa mawe ei bauaniaa gufu. 24 Roꞌaa guainaa fei, aꞌa hepalo ua naranara, rona lafulafunaa aꞌa mei Haidaa. Rona ware ba, “Mena Fasu, mena ona bigiꞌaa tamanu nunumiamu, ona famamaraa fei pafea, feni malagufu ma fei agi ma minaa ei manumanu wagii roꞌou. 25 Wagii fei Spiriti Apuna, mei nafimu David, mei amaa haiꞌou, na wareaa ei wareamu ba:
“‘Tani ei baua gufu, roꞌaa siba
ma ei ramaꞌa, rona naranara ba roꞌaa bigiꞌaa hefiꞌa hafeloꞌa manumanu?
26 Ei haparaa feni ano, rona ufaweꞌi
ma ei bauana, rona papaꞌifipui
ba roꞌaa fadugeaa mei Fasu
mawe mei Papaditaiana.’b
27 Herod ma Pontius Pilate, laguna maꞌadii ei Gentile mawe ei Israel yeni aꞌa feni baua gufu ma fiwarei ba batanai roꞌaa fadugeaa Jesus, mei apunai nafimu, mei papaditaiamu.’ 28 Rona bigiꞌuaiaa tamanu onadii naraia ba ronei bigiꞌia uaa fei faufaumu ma nunumiamu. 29 Siꞌei, mena Fasu, naramaꞌaiaa ei warefamaꞌauaa roꞌou haiꞌou ma hadumaa eni nafimu ba haiꞌounei wareaa ei wareamu fininaa baua lauguꞌa. 30 Roainaa panimu, farawaninaa ei funua, bigiꞌaa ei hilalaa foigia ma fananawalaa puda aꞌa fei haraa mei nafimu Jesus, mei na apunai.”
31 Roꞌaa lafulafudii, na rerere fawelei roꞌaa figupui wagina. Ma fei Spiriti Apuna na didifaa minaa roꞌou ma rona uꞌugaa fei wareaa mei Haidaa fininaa lauguꞌa.
Ei Narafaweꞌia, Rona Fifaninaa ei Manumanuu Roꞌou
32 Minaa ei narafaweꞌia, rona paꞌi hepalo ua paꞌafi ma naranaraa roꞌou. Lomi hemea na ware ba ei manumanuna ana paꞌaa manumanuna, maꞌuaa, rona fifaninaa ei manumanuu roꞌou. 33 Aꞌa fei baua faufau, ei apostle ronaꞌaida uꞌugaa fei asiꞌanaa mei Fasu Jesus ma fei baua rawaniꞌaa mei Haidaa na ude pafoo roꞌou. 34 Lomi hemea dupuaa roꞌou ba lomi manumanuna. Uaa, o nefarani, ei rona paꞌi ano ma humuu roꞌou, rona aloaa eꞌei, tonamai fei mugoo poꞌi wagina 35 ma augia i igoaa ei apostle ma rona fiꞌalaginia aꞌa ei lomi rona paꞌi.