Ananias ma Sapphira
5
Hemea ramaꞌa, harana Ananias fipuinaa mei harona, Sapphira, ana laguna aloaa hepalo anoo lagua. 2 Mei wawane na utofeꞌinaa maꞌida mugoo poꞌi ma mi augaa ei dufuna igoaa ei apostle ma mei harona na aida fei.3 Ma na ware Peter ba, “Ananias, tani i forapaꞌaa naranaramu Satan ma ona warefasifi aꞌa fei Spiriti Apuna ma ona utofeꞌinaa maꞌida mugoo poꞌi aꞌa fei aloamu anomu? 4 Haa, aꞌa ba manumanumu ei ana otawe aloia? Ma o alodigia, aꞌa ba mugoo poꞌimu? Tamanu na foraa naranaramu ba o bigiꞌia aleꞌei? Abaa oi sifiꞌaa ei ramaꞌa, maꞌuaa, mei Haidaa.”
5 I guainaa fei Ananias, na pasimaꞌe. Ma minaa ei rona guainaa fei, ronamina maꞌaufafelo. 6 Ma siꞌei, ei baubara, rona nomai, sumaa fei hudi ununa ma poronaa hia ano ma iꞌifinia.
7 Nenee aleꞌei oduai hour, mei harona na waduꞌaimai ma lomi na aida ba tamanu napaꞌaa mei harona. 8 Na iꞌiginia Peter, “Warefanau, sifeni feni ponoꞌaa feni ano hamugua Ananias na tonia?”
Ina ware ba, “Hiꞌi. Sifena fena ponoꞌana.”
9 Peter na warenaa aꞌana, “Tani hamuꞌaa fiꞌuꞌugai ba hamuꞌaa maniaa fei Spiritii mei Fasu? Maꞌaia! Ei pinee ei roꞌaa iꞌifinaa mei haromu na nofarafiꞌidigimai papaa fei gigei. Ma ana roꞌaa notabeio aleꞌei.”
10 Ana ei ua, ina pasimaꞌe i igoana. Siꞌei, roꞌaa waduꞌaimai ei baubara ma fanunupaꞌia ba ina maꞌe, rona tabenaa hia ano ma iꞌifinia papaa mei harona. 11 Minaa ei losuia mawe ei rona guainaa fei, ronamina maꞌau.
Ei Apostle, Rona Farawaninaa Watauda
12 Ei apostle, rona bigiꞌaa watauda ei hilalaa foigia ma fananawalaa puda dupuaa ei ramaꞌa. Ma wagii hepalo ua naranara, minaa ei, ronaꞌaida figupui i Palee Solomon. 13 Faꞌua ba ei ramaꞌa yei na nara ba ei apostle ma ei narafaweꞌia, rona raraba, maꞌuaa, lomi hemeadiai na nomai aꞌa roꞌou. 14 Maꞌuaa, wataudadiai wawane ma pifine, rona narafaweꞌi aꞌa mei Fasu ma pafoinaa fei puduu roꞌou. 15 Siꞌei, ei ramaꞌa, rona dugamii ei funua i maꞌaa tala ma fudigaa roꞌou pafoo tawa ma hafenaa unu ba fei hanunuu Peter nei pasi pafoo roꞌou ena na talaifalogilao. 16 Rona figupuirai ei gupuu ramaꞌa laloo ei pusuꞌo gufu na rafiꞌinaa Jerusalem ma nodugaree ei funua mawe ei na waduꞌaa roꞌou ei spiriti hafeloa ma minaa roꞌou, na rawani.
Rona Haperararaiaa ei Apostle
17 Ma mei paꞌaa bauaniaa humuu mei Haidaa mawe minaa ei paniaa panina, ei roꞌou maroaa ei Sadducee, ronamina punepune. 18 Rona panarofaa ei apostle ma augaa roꞌou laloo humuu boboꞌaiaa fei gufu. 19 Maꞌuaa laloo fei poi, hemea aloꞌaloo mei Fasu na gigiaa ei gigei fei boboꞌaia ma duginaa roꞌou i ano. 20 Ina ware, “Hamowii ufalarai i malalaa fei humuu mei Haidaa ma uꞌufanaa ei ramaꞌa minaa fei uꞌuga wagii feni manufau harenua.”
21 I baꞌamai panii fei arewaa, rona waduꞌainaa malalaa fei humuu mei Haidaa ana aleꞌei guaiaa roꞌou ma feroinaa ei ramaꞌa.
I nodigimai mei paꞌaa bauaniaa humuu mei Haidaa mawe ei paniaa panina, rona lalaꞌifipuinamii ei Sanhedrin—minaa ei bauaniaa gufuu Israel—ma aloaa hefiꞌa ba ronei dugamii ei apostle yei boboꞌaia. 22 Maꞌuaa roꞌaa nosufudailao i boboꞌaia, lomi rona labagipaꞌaa roꞌou yei ei omaꞌamaꞌaa. Siꞌei, rona hadiweꞌai ma uꞌu ba, 23 “Haiꞌouna fanunupaꞌia ba ei gigei fei boboꞌaia napaꞌaa fawi ma rona ufalarai aꞌa ei gigei ei omaꞌamaꞌaa; maꞌuaa haiꞌouꞌaa gigiaa ei gigei yei, lomi hemea lalona.” 24 Mei bauaniaa ei oanananaa fei humu mawe ei famamoaa humuu mei Haidaa, roꞌaa guainaa fei uꞌuga, ronamina poapoai wagina ma naranara ba tamanudiai ba i nomai aꞌa feni.
25 Siꞌei, na nomai hemea ma ware, “Meꞌo! Ei hamona aunaa roꞌou boboꞌaia, roꞌou yei malalaa humuu mei Haidaa ma roi ufeferoinaa ei ramaꞌa.” 26 Aꞌa fei, mei bauana fipuinaa ei bauaniaa ei paniaa panina, rona dugamii ei apostle. Lomi rona foraneneinaa roꞌou, uaa rona maꞌau ba ro nafaꞌaa roꞌou ei ramaꞌa.
27 Roꞌaa dugidigamii ei apostle, rona faꞌufalarainaa roꞌou i maꞌaa ei Sanhedrin ba mei paꞌaa bauaniaa humuu mei Haidaa i iꞌigainaa roꞌou hefiꞌa iꞌigaia. 28 Ina ware ba, “Haiꞌouna apunainaa hamuꞌou ba hamoneiꞌaa feroi aꞌa fei hara fei. Maꞌuaa hamona fatalainaa fei feroiaa hamuꞌou yeni Jerusalem ba hamoꞌaa guguinaa unuu haiꞌou fei raraa mei ramaꞌa mei.”
29 Peter mawe ei apostle, rona ware, “Haiꞌounei guainaa wareaa mei Haidaa laraa ei ramaꞌa! 30 Mei Haidaniaa ei amaa oꞌou na faꞌasiꞌanaa Jesus wagii fei maꞌea, mei hamona foꞌafamaꞌeia ei hamoꞌaa fatawaia aꞌa fei haihai. 31 Mei Haidaa na poroꞌaunaa hia i pepei maꞌauna ba hia Hapara ma Fatelaꞌana ba i fani filogiaa naranara ma futoaa ei hafeloꞌaa ei Israel. 32 Oꞌou, ona fanunuaa eꞌei manumanu eꞌei ma fei Spiriti Apuna ana na faꞌarewaia ba faꞌua. Ma ei rona neneraa mei Haidaa, hia na fanaa fei Spiriti aꞌa roꞌou.”
33 Roꞌaa guainaa fei, namina fifiꞌi unuu roꞌou ma naꞌaa ro foꞌafamaꞌeaa roꞌou. 34 Maꞌuaa, hemea Pharisee, harana Gamaliel, hemea feroiaa law, mei rona maꞌauia minaa ei ramaꞌa, hia dupuaa ei Sanhedrin, ina ufalarai ma ware ba roneidoꞌo faꞌasiꞌanaa ei apostle ano. 35 Ma na warenaa aꞌa roꞌou: “Ena Israel, naramaꞌaia tamanu hamoꞌaa bigiꞌia aꞌa roꞌou. 36 Mina, Theudas na nomai ma ware ba hia hemea baua ramaꞌa ma aleꞌei gunaroa puꞌu ramaꞌa na nenegia. Rona foꞌafamaꞌeia ma ei nenerana na matala ma lomidiai manumanu wagina. 37 Nenena, Judas, mei Galilee na nomai aꞌa fei au wareiaa ramaꞌa ma famamotonaa hefiꞌa ma faꞌasiꞌanaa sibaa. Hia anaa, rona foꞌafamaꞌeia ma minaa ei nenerana na baꞌautorai. 38 Siꞌei, aꞌa fei manumanu eꞌeni, a warefanaa hamuꞌou ba: Apuna papaꞌaa roꞌou! Faꞌaunuaa roꞌou! Uaa, nabaa fei bigiꞌaa roꞌou, bigiꞌaa ramaꞌa ua, i paꞌai ua. 39 Maꞌuaa, nabaa noranarai aꞌa mei Haidaa, lomi ba hamowe paunaipaꞌaa roꞌou; hamowe nanamuiꞌuaia ba aleꞌei hamona fifoꞌai aꞌa mei Haidaa.” Na hafududumaa roꞌou ei warewareana.
40 Rona guainaa wareana ma fawaduꞌainamii ei apostle ma babuinaa roꞌou. Rona apunainaa roꞌou ba roneiꞌaa uꞌu aꞌa fei haraa Jesus ma faꞌaunuaa roꞌou.