Rona Rafeinaa ei Oloromeai
6
Aꞌa ei arewaa ei, ei ipowe gipelao fei puduu ei otalai nenera, ei Greece Jew dupuaa roꞌou, rona bababauꞌunaa ei Hebrew Jew, uaa, lomi rona omaꞌafarawaninaa ei pifine maꞌesuabea aꞌa roꞌou. Lomi rona fafanunuaa roꞌou wagii fei alagiaa duꞌua hepapalo arewaa. 2 Siꞌei, ei Hefua ma Helagui, rona apaifigupuinaa ei otalai nenera ma ware, “Lomi na rawaninaa oꞌou ba oꞌaa baꞌofaa fei bigiꞌaa fei uꞌugaa fei wareaa mei Haidaa wagii fei alagiaa duꞌua. 3 Ena lofuu, hamonei rafeinaa oloromeai i dupuaa hamuꞌou, ena rona pepesu aꞌa fei Spiriti ma fei apaꞌa. Ma oꞌaa fifaninaa feni bigiꞌa aꞌa roꞌou 4 ma oꞌou, o lafulafu ma uꞌugaa fei warea. 5 Fei naranara fei, na rawani ua aꞌa minaa fei gupuu roꞌou. Rona rafeinaa Stephen, hemea namina weꞌi naranarana ma pepesu aꞌa fei Spiriti Apuna; ma Philip, Procorus, Nicanor, Timon, Parmenas ma Nicolas, mei Antioch, hemea na filoginaa losuna ba hia Jew. 6 Rona faꞌugaa ei ramaꞌa i aꞌa ei apostle. Ma ei apostle, rona augaa panii roꞌou pafoo ei oloromeai ma lafulafu.
7 Ma fei wareaa mei Haidaa na tale. Ma na apoidiai fei puduu ei otalai nenera yei Jerusalem ma watauda ei bauaniaa humuu mei Haidaa nawe neneraa fei mau weꞌiaa naranara.
Rona Panarofaa Stephen
8 Stephen, hia hemea na pepesu aꞌa fei rawaniꞌa ma faufau mei Haidaa ma na bigiꞌaa hefiꞌa baua fananawalaa puda ma hilalaa fogia i pudaa ramaꞌa. 9 Maꞌuaa, rona fiharei aꞌana ei maroaa fei Synagogue ei Rona Ala (hara fei). Fei maroa fei, roꞌou Jew Cyrene ma Alexandria fipuinaa ei Jew yei laloo guei baua gufu fawelei Cilicia ma Asia. Rona fiharei aꞌa Stephen, 10 maꞌuaa, lomi rona hawiaa fei apaꞌana o fei Spiriti, fei na umuinaa hia.
11 Ma rona fiwareiꞌopaꞌai ma uꞌugainaa hefiꞌa ba ronei ware aleꞌei ba, “Haiꞌouna guainaa Stephen na warefafeloaa Moses ma mei Haidaa.”
12 Siꞌei, rona fababainaa iaa ei ramaꞌa ma ei bauaniaa gufu mawe ei feroiaa law. Rona panarofaa Stephen ma faꞌugia pudaa ei Sanhedrin. 13 Rona dugamii hefiꞌa rona uꞌufasifi aleꞌei ba, “Meni ramaꞌa meni, lomi na fafaa warefafeloaa feni apunaia humu ma fei law. 14 Uaa, haiꞌouna guainia na ware ba Jesus, mei Nazareth i fawataꞌoꞌoaa feni humu feni ma filoginaa ei maumau, ei na fanaa oꞌou Moses.”
15 Minaa ei rona guta aꞌa ei Sanhedrin, rona fanunufaꞌuꞌuaa Stephen ma fanunupaꞌaa fei mau pudana ba aleꞌei pudaa hemea aloꞌalo.