Fei Wareaa Stephen aꞌa ei Sanhedrin
7
Siꞌei, mei paꞌaa bauaniaa humuu mei Haidaa na iꞌiginia, “Faꞌua, eꞌei warea eꞌei?”2 Aꞌa fei ina ware, “Ena lofu ma ena ama, guainau! Mei Haidaniaa fei hawera na faꞌarewa aꞌa mei amaa oꞌou Abraham ei hia yei Mesopotamia ma atawe guta Haran. 3 Mei Haidaa na ware, ‘Diꞌininaa gufumu ma ei ramaꞌaa gufumu ma dinaa aꞌa fei gufu yau a famaꞌaio.’
4 “Siꞌei, ina diꞌininaa fei gufuu ei Chaldea ma naree guta i Haran. I maꞌedii amana, mei Haidaa na alonaa hia aꞌa feni gufu hamoꞌei guta wagina. 5 Lomi na fania hepalo manumanu yei ana paꞌaa lomi maꞌida malagufu. Maꞌuaa, mei Haidaa na faꞌunai ba hia mawe ei paina nefarani, ropowe tonaa fei malagufu, maꞌuaa, aꞌa fei au faꞌunaia atawe paꞌi naꞌuna Abraham. 6 Mei Haidaa na warenaa aꞌana aleꞌei: ‘Ena paimu, roꞌaa aleꞌei ramaꞌa rauaa laloo hefaa gufu abaa gufuu roꞌou ma oa aleꞌei humuwa ma tonaa haperaraiaa roꞌou laloo gunaroa puꞌu igisimasi. 7 Maꞌuaa, a fanimaꞌaiaa fena baua gufu, fena roꞌaa humuwai wagina. Ma hinene, roꞌaa walaꞌamai wagina ma losuinau faweleni.’ 8 Ma ina fanaa Abraham fei fiꞌugaiaa fei moroꞌaa hudii wawanei. Ma Abraham nawe oanaa amaa Isaac ma moroꞌaa hudii wawaneina laloo fei fafainaroaa arewaa nenee fei waniniana. Hinene, Isaac nawe oanaa amaa Jacob ma Jacob na oanaa amaa ei hefua ma helagui ama mina.
9 “Siꞌei ba ei ama mina, rona punepune aꞌa Joseph, rona alonaa hia Egypt aleꞌei humuwa. Maꞌuaa, mei Haidaa na oafipui aꞌana 10 ma hadumia aꞌa minaa ei hafeloꞌana. Ina fani apaꞌaa Joseph ma farawaninia i pudaa Pharaoh, mei haparaa Egypt; siꞌei, ina fagutania ba hia haparaa Egypt ma fei humuna, humuu hapara.
11 “I dii, na nomai fei au mouabiabia wagii minaa ei gufu laloo Egypt ma Canaan, nofininamii baua fiꞌia ma ei amaa oꞌou, lomi rona paꞌi duꞌua. 12 I guainia Jacob ba na paꞌi lau guana i Egypt, na aloaa ei amaa oꞌou aꞌa fei rawarawa aunuaa roꞌou. 13 Aꞌa fei faguapoaa aunuaa roꞌou, Joseph na warefanaa ei lofuna ba hia hini ma Pharaoh nawe apaꞌaa ei maroaa Joseph. 14 Nenee fei, Joseph na apainamii amana Jacob mawe minaa ei maroana; puduu roꞌou, oloromfua ma haipani. 15 Siꞌei, Jacob na dinaa Egypt ma hia mawe ei amaa oꞌou, rona maꞌe yei. 16 Ei hudi unuu roꞌou, rona porohadiweꞌidinaa Shechem ma na fahainopaa roꞌou laloo fei huapu naꞌanaꞌa, fei i pononaa hefiꞌa mugoo poꞌii Abraham aꞌa ei naꞌuu Hamor yei Shechem.
17 “I nofarafiꞌimai fei au mei Haidaa ba i bigiꞌaa fei faꞌunaiana aꞌa Abraham, fei puduu ei gufuu oꞌou yei Egypt nawemina rata. 18 Ma hemeadiai na tonaa fei hapara yei Egypt, hemea lomi na apaꞌaa Joseph. 19 Ina haperararaiaa ei maroaa oꞌou ma humuwainaa ei upuu oꞌou ba ronei siminaa ei baduu we waniniꞌuaa ba ronei maꞌe.
20 “Ma fei au fei, na wanini Moses ma abaa hia baduu ua.a Laloo oduai puda rona omaꞌaia yei humuu mei amana. 21 Ei ropowe poroꞌaunaa hia ano ma diꞌininia, mei pifine, naꞌuu Pharaoh, na poroꞌia ma omaꞌaia ba hia paꞌaa naꞌuna. 22 Rona feroinaa Moses aꞌa minaa ei apaꞌaa Egypt. Ei wareana ma bigiꞌana namina honua.
23 “Moses na paꞌi gunaroa paꞌania igisimasina ei i nara ba idoꞌo maꞌa ei gufuna Israel. 24 Ina fanunupaꞌaa hemea Egypt na fafeloaa hemea gufuna. Siꞌei, na nolao ba i hadumia ma foꞌafamaꞌeaa mei Egypt. 25 Naranaraa Moses ba ei gufuna, roꞌaa fanunuꞌapaꞌia ba mei Haidaa na rafeinia ba hia i alaraa roꞌou, maꞌuaa, lomi rona fanunuꞌapaꞌia. 26 Ma iree arewadiai, Moses na nobapaꞌamii helagui Israel, laguꞌei fifoꞌai. Ba i fawanewaneaa lagua ina ware aleꞌei, ‘Megu, hamugua filofui. Tani hamuꞌaa itainaa raraa unuu hamugua?’
27 “Maꞌuaa, mei i foꞌa, na susuninaa Moses ma ware ba, ‘Hini na augio ba bauana ma fawanewaneaa haigua? 28 Haa, ana ba o foꞌafamaꞌeau aleꞌei o foꞌafamaꞌeaa mei Egypt minoa?’ 29 I guainaa fei Moses, na maꞌau ponipaꞌainaa Midian ma naree guta yei aleꞌei ramaꞌaa gufu raua ma na paꞌi helagui naꞌuna, baduu wawane.
30 “I nodigilao gunaroa paꞌania igisimasi, hemea aloꞌalo na faꞌarewa aꞌa Moses laloo fei haihai na guꞌa fawelei lomi guana o hepalodiai manumanu papaa Maugeni Sinai. 31 I fanunupaꞌaa fei, na maduofo wagina. I nolao ba i fanunu, na guainaa fei lao mei Fasu: 32 ‘Yau mei Haidaniaa ena amamu. Mei Haidaniaa Abraham, Isaac ma Jacob.’ Namina maꞌaufunurere Moses ma ba lomi ipoꞌo fanunu.
33 “Ma mei Fasu na warenaa aꞌana, ‘Dudumaa ei hafenaa pinemu, uaa fawelena o u wagina na apunai. 34 Unapaꞌaa fanunupaꞌaa fei gutafafeloaa ei ramaꞌaa gufuu yei Egypt. Na guaidigaa ei aiꞌaigaa roꞌou ma na nogio ba a alaraa roꞌou. Nadii, nomai. Yau a alohadiweꞌinio Egypt.’
35 “Ana mei Moses mei, mei laguꞌaa fadugeia ma ware ba, ‘Hini na augio bauana ma fawanewaneaa haigua?’ Ana simei na faꞌarewa aꞌana mei Haidaa wagii fei haihai aleꞌei aloꞌalo ma na aloia ba hia bauaniaa roꞌou ma alaraa roꞌou. 36 Na dugamii roꞌou yei Egypt ma bigiꞌaa manumanuu fananawalaa puda ma ei hilalaa foigia yei Egypt aꞌa fei Roa Agib ma ana laloo gunaroa paꞌania igisimasi yei lomi guana ma haihai.
37 “Ana mei Moses, mei i ware aꞌa ei Israel ba, ‘Mei Haidaa, iwe aloaa hemea mamamaꞌa aleꞌena yau i tapuu ena ramaꞌaa gufuu hamuꞌou.’ 38 Hia hemea dupuaa fei gupuu ei ramaꞌa fawelei lomi haihai ma guana aꞌa mei aloꞌalo, mei i wareware aꞌana pafoo Maugeni Sinai ma aꞌa ei amaa oꞌou. Ma na tonaa ei warea na udelao ba i fifaninamai aꞌa oꞌou.
39 “Maꞌuaa, ei amaa oꞌou, rona barafeia. Rona ofadugia ma ei naranaraa roꞌou na hadiweꞌidinaa Egypt. 40 Rona ware aꞌa Aaron, ‘Bigifani haidaniaa haiꞌou ba nei famamoaa haiꞌou. Uaa, meni Moses, meni i dugifaleleꞌanaa haiꞌou yei Egypt, lomi haiꞌouna aida ba hia batanai!’ 41 Ana fei au fei, rona bigiꞌaa fei haidaniaa roꞌou, maumauna aleꞌei naꞌuu budumaꞌao. Rona fani fanaa roꞌou aꞌana ma hamamani ma bigi baua duꞌua hamatee ba ro teninaa fei bigiꞌaa panii roꞌou. 42 Maꞌuaa, mei Haidaa na ofadugaa roꞌou ma rawaiaa panina aꞌa roꞌou ba roꞌaa losuinaa ei manumanu haroo pumanugawe. Hefeni ana aleꞌei fei neꞌia laloo fei buꞌuu ei mamamaꞌa:
“‘Haa, hamona fani fanaa hamuꞌou aꞌau ma mi au manumanu aꞌau
i aꞌa fei talaiaa hamuꞌou laloo gunaroa paꞌania igisimasi yei lomi haihai o guana, hamuꞌou ena Israel?
43 Hamona poroꞌaa fei palee Molech
ma fei piꞌuu mei haidaniaa hamuꞌou, Rephan,
ma ei bigiꞌaa hamuꞌou ba hamoꞌaa losuinia.
Siꞌei, a alonaa hamuꞌou suwidenaa Babylon aleꞌena ramaꞌa, lomi gufuu roꞌou.’
44 “Yei lomi haihai o guana, ei amaa oꞌou mina, rona paꞌi fei humuu mei Haidaa poroporo, fei na paꞌi bao fei law lalona. Rona bigiꞌia aleꞌei tamanu inadoꞌo fanunuia Moses ei i warefania mei Haidaa. 45 Roꞌaa todigaa fei humuu mei Haidaa poroporo ei amaa oꞌou aꞌa fei famamoaa Joshua, rona notofininia aꞌa roꞌou ei roꞌaa tonaa fei malalagufu aꞌa ei ramaꞌaa fei baua gufu, ei na teteaa roꞌou mei Haidaa. Fei humu fei, na oa aꞌa roꞌou nopaꞌaloo fei au David, 46 mei na niꞌeniꞌe aꞌana mei Haidaa, mei i iꞌigai ba i bigifani humuu mei Haidaniaa Jacob.c 47 Maꞌuaa, Solomon, hia mei i fadufani humuna.
48 “Maꞌuaa, mei na Paꞌaa Pafeai, lomi i guta laloo ei humu faduaa ramaꞌa. Aleꞌei i wareia mei mamamaꞌa:
49 “‘Na ware mei Fasu, fei gufu pafea, gutanau
ma feni malagufu, lalabenii pineu.
Humu bata fei ba oꞌaa bigifanau?
O i fawelei hitani ba a gutafawenai?
50 Haa, aꞌa ba eni manumanu eni, bigiꞌaa paniu?’
51 “Na paꞌaa waiwai tabaa hamuꞌou. Ei naranara ma adiaa hamuꞌou, tawiꞌana aleꞌei ei lomi na moro hudii wawanei! Hamuꞌou paꞌaa aleꞌena ena amaa hamuꞌou: Ranimai hamonaꞌaida fadugeaa fei Spiriti Apuna! 52 Ina paꞌi hemea mamamaꞌa mina ba lomi rona haperararaia ei amaa hamuꞌou? Ana ronamina foꞌafamaꞌeaa ei ronadii wareaa fei noramiaa mei Wanewanea. Ma eni, hamona aloia ma foꞌafamaꞌeia— 53 hamuꞌou ena na todigaa fei law, fei rona wareia ei aloꞌalo, maꞌuaa, lomi hamona nenegia.”
Rona Nafaꞌaa Stephen
54 Roꞌaa guainaa fei, rona sibafafelo ma fiꞌuꞌuinaa difoo roꞌou aꞌana. 55 Maꞌuaa fei Spiriti Apuna na didifaa Stephen ma ina aranaa gufu pafea, fanunupaꞌaa fei haweraa mei Haidaa ma Jesus na ufalarai i pepei maꞌau mei Haidaa. 56 Ina ware, “Fanunu. Una fanunupaꞌaa fei gufu pafea na baꞌagigi ma mei Naꞌuu Ramaꞌa fi ufalarai i pepei maꞌau mei Haidaa.”
57 Aꞌa fei, rona lotomaa adiaa roꞌou ma tomewai ma minaa roꞌou na ponifafifiꞌinaa aꞌana, 58 foraneneneinia, notonaa hia auguu fei gufu ma nafanaa hia mugoo. Ma ei ramaꞌa, ei roꞌaa haperararaia, rona augaa ei susuu roꞌou pinee hemea wawane harana Saul.