Rona Panarofaa Jesus
18
I lafulafudii Jesus, na aunufipui aꞌa ei otalai nenerana ma na dinaa yei fawelei aꞌa fei baua baroaa Kidron. Yei pepei na paꞌi hefawala na halaꞌai ei olive ma rona dinaa wagina.2 Ma Judas, mei i aloia, na apaꞌaa fawelei, uaa Jesus naꞌaida gutafipui aꞌa ei otalai nenerana yei. 3 Siꞌei, Judas na nomai fawelei ma nodugamii hefaa gupuu ramaꞌaa foꞌaa mawe hefiꞌa bauana maroaa ei famamoaa humuu mei Haidaa mawe ei Pharisee. Rona notonamiaa ei ramai, ei weꞌai ma ei hioo roꞌou.
4 Jesus na aidadii minaa ei manumanu ba roꞌaa bigiꞌia aꞌana ma na asiꞌalao ma iꞌiginaa roꞌou, “Hini nunumiaa hamuꞌou?”
5 Rona ware, “Jesus, mei Nazareth.”
Jesus na ware, “Yau, hia.” (Ma Judas, mei i aloia, na ufipui aꞌa roꞌou yei.) 6 I ware Jesus ba, “Yau, hia,” rona ugusue ma pasinaa malagufu.
7 Ina iꞌigidinaa roꞌou, “Hini nunumiaa hamuꞌou?”
Ma rona ware, “Jesus, mei Nazareth.”
8 Jesus na ware, “Na warefanidigaa hamuꞌou ba Yau, hia. Nabaa hamoꞌei labaginau, te, fatalainaa eni ramaꞌa eni.” 9 Fei paꞌafina i wareaa fei, sifei ba nei faꞌuai ei diwareana ba: “Lomi una fapaꞌainaa hemea eni ona fanau.”a
10 Simon Peter na paꞌi waduna ma na rapuꞌia ma lafigaa pepei maꞌau adiaa mei nafii mei paꞌaa bauaniaa humuu mei Haidaa. (Fei haraa mei nafi, Malchus.)
11 Jesus na warefaweꞌi aꞌa Peter, “Auhadiweꞌinaa fei wadumu! Haa, lomi ba a hunu aꞌa fei bara na fanau mei Ama?”
Rona Duginaa Jesus aꞌa Annas
12 Fei gupuu ramaꞌaa foꞌaa, mei bauaniaa roꞌou ma ei bauaniaa ei Jew, rona panarofaa Jesus. Rona fauroroꞌinia 13 ma doꞌo noduginaa hia aꞌa Annas, mei amaa haroo Caiaphas, mei paꞌaa bauaniaa humuu mei Haidaa wagii fei igisimasi fei. 14 Caiaphas, hia, mei nadii warefaꞌaiaa ei Jew ba na rawani hemea ua maꞌea laraa watauda.
Fei Rawarawaa Waresuabaduaa Peter
15 Simon Peter ma hemeadiai otalai nenera, laguna neneraa Jesus. Hamatee mei otalai nenera mei, na apaꞌia mei paꞌaa bauaniaa humuu mei Haidaa, ina waduꞌaihugiaa Jesus i malalaa fei gutanaa mei paꞌaa bauaniaa humuu mei Haidaa, 16 maꞌuaa Peter nadoꞌo omaꞌa poaa humu. Mei hemeadiai otalai nenera, mei na apaꞌia mei paꞌaa bauaniaa humuu mei Haidaa na hadiweꞌimai ma wareware aꞌa mei pifine, mei fi bigibigi yei ma dugifawaduꞌainaa Peter.
17 Mei pifine i poaa humu na iꞌiginaa Peter, “Haa, abaa yoi hemea otalai nenerana?”
Ina ware ba, “Lomi, abaa yau.”
18 Na fane fei hau ma ei nafi mawe ei bauana, rona ufarafiꞌi aꞌa fei hafi paꞌaa roꞌou ba fanaꞌaa roꞌou. Peter ana na ufipui aꞌa roꞌou ba i fanaꞌa.
Mei Paꞌaa Bauaniaa fei Humuu mei Haidaa na Iꞌiginaa Jesus
19 Mei paꞌaa bauaniaa humuu mei Haidaa fi iꞌiginaa Jesus ei otalai nenerana ma ei feroiana.
20 Jesus na ware, “Una wareware i pudaa minaa ei ramaꞌa. Unaꞌo feroi laloo ei synagogue ma i humuu mei Haidaa, fawelei ronaꞌo figupui minaa ei Jew. Lomi na opaꞌainaa hepalo wareau. 21 Tani o iꞌiginau? Iꞌiginaa ei rona guainau. Ronapaꞌaa aida tamanu ei wareau.”
22 I wareaa fei Jesus, hemea ei bauana, mei na rafiꞌi na laparaa pudana. Ina warefasiba aꞌana, “Haa, aleꞌei mau wareamu aꞌa mei paꞌaa bauaniaa humuu mei Haidaa?”
23 Jesus na ware, “Nabaa una wareaa hepalo na tata, wareꞌunia. Maꞌuaa nabaa una warefafaꞌuai, tani o laparau?” 24 Ana yei ei boboꞌii panina ma Annas nawe alonaa hia aꞌa Caiaphas, mei paꞌaa bauaniaa humuu mei Haidaa.b
Ei Faguapoa ma Faꞌodupoaa Waresuabaduaa Peter
25 Ei fi fanaꞌanaꞌaiaa ununa Simon Peter, hemea na iꞌiginia, “Haa, abaa yoi hemea otalai nenerana?”
Ina warefasuabadui ba, “Lomi, abaa yau.”
26 Mei i lafigaa adiana Peter, gufuu hemea ei nafii mei paꞌaa bauaniaa humuu mei Haidaa, mei na naroaa Peter, “Haa, abaa una fanunupaꞌio aꞌana yei fasuu ei haihai olive?” 27 Peter na warefasuabaduidiai ma ana ei, na ai fei aꞌaroo.
Jesus i Maꞌaa Pilate
28 I dii, ei Jew rona talaiduginaa Jesus, diꞌininaa Caiaphas ma dinaa aꞌa fei baua humuu mei gavanaa Rome. Na mafufuoidii eni ma siꞌei ba ei Jew, lomi rona nunumiai ba roꞌaa loloa wagii ei mau losuiaa roꞌou, lomi rona waduꞌainaa fei humuu hapara uaa ba roꞌaa guta wagii fei hananaa fei Talai Falogia. 29 Siꞌei, Pilate na asiꞌanamii aꞌa roꞌou ma iꞌigai, “Tamanu ei tataa mei ramaꞌa mei?”
30 Rona ware, “Nabaa abaa hia hafeloꞌa, ana lomi haiꞌou fifaninia aꞌamu.”
31 Pilate na ware, “Anaa hamuꞌou nei dugia ma dududuia wagii fei law hamuꞌou.”
Ei Jew, rona ware, “Maꞌuaa lomi na rawani ba haiꞌou fadududu ma foꞌafamaꞌeaa hemea.” 32 Rona bigiꞌaa fei ba ei diwareaa Jesus ba batanai fei maꞌeana nei faꞌuai.
33 Pilate na waduꞌaidinaa fei baua humu, na lalaꞌaa Jesus ma iꞌiginia, “Haa, yoi mei haparaa ei Jew?”
34 Na iꞌigai Jesus, “Paꞌaa naranaramu, o hefiꞌadiai na uꞌugau aꞌamu?”
35 Pilate na ware, “Haa, yau hemea Jew? Ei gufumu mawe ei famamoaa humuu mei Haidaniaa hamuꞌou, ana roꞌou, ei roꞌaa fifaninio paniu. Tamanu ei bigiꞌamu?”
36 Jesus na ware, “Fei haparaiau, abaa manumanuu feni malagufu. Nabaa aleꞌei, ei nafiu, roꞌaa foꞌa ma lomi roꞌaa panaropaꞌau ei Jew. Maꞌuaa, eꞌeni, fei haparaiau, na ude hefawala.”
37 Pilate na ware, “Siꞌei ba yoi hapara, na?”
Jesus na ware, “Na wanewane fei wareamu ba yau hapara. Sifei fei paꞌafina a waninimai yeni malagufu ba unei uꞌugaa fei faꞌuaia. Mei na oa wagii fei faꞌuaia na guainau.”
38 Pilate na iꞌigai, “Tamanu fei faꞌuaia?”
Rona Ware ba Jesus Nei Maꞌe
Nenee fei, ina asiꞌadinaa ano aꞌa ei Jew ma ware, “Lomi na labagipaꞌi paꞌafina ba o ware ba hia na bigifata. 39 Maꞌuaa wagii fei maumau hamuꞌou, unei alaraa hemea boboꞌaia aꞌa fei au Talai Falogia. Nunumiaa hamuꞌou ba a alaraa ‘mei haparaa ei Jew’?”
40 Rona parararailao, “Lomi. Abaa hia! Fanaa haiꞌou Barabbas!” Barabbas, hemei nadoꞌo faꞌasiꞌanaa fei fisibaia aꞌa fei gavaman.