Rona Fiwarei ba Roꞌaa Panarofaa Jesus
14
Eni, dufu guai arewaa ba i nomai fei Talai Falogia ma fei Hananaa fei Faraa Pidaua Lomi Fafuafua. Ma ei famamoaa humuu mei Haidaa ma ei feroiaa law, rona lalabaginaa hefiꞌa manitoai ba roꞌaa panarofaa Jesus ma foꞌafamaꞌeia. 2 Rona ware, “Maꞌuaa, oneiꞌaa bigiꞌia wagii fei au Hananaa, uaa ei ramaꞌa, roꞌamina fisisibai.”Fei Dufaa Pao Tabaa Jesus i Bethany
3 Ma yei Bethany, ei i gutafapalagi aꞌa fei tawa laloo fei humuu hemea, harana Simon mei Watawatai, ina nomai hemea pifine na notonamii hepalo peꞌii fei paꞌaa pao dufa, bauana ponoꞌana ma fei pao fei, hepalo paꞌaa guana peꞌihape. Ina baguꞌuia ma na iginaa fei pao dufa tabaa Jesus.
4 Hefiꞌa yei, rona siba ma fiwarewarei ba, “Tani i peduꞌuaiaa feni pao dufa? 5 Nabaa o aloia, ponoꞌana i puduaa ponoꞌaa hemea laloo heꞌai igisimasia ma ei mugoo poꞌi, i dinaa aꞌa ei lomi manumanuu roꞌou.” Ma rona sibahotaꞌia.
6 Na ware Jesus, “Apuna papaꞌana. Tani hamoꞌaa faꞌuduguguaa ununa? Ina bigiꞌaa hepalo paꞌaa rawaniꞌa manumanu aꞌau. 7 Ena lomi manumanuu roꞌou, hamoꞌaa oa aꞌa roꞌodu ranimai ma hamoꞌaa hadumaa roꞌou aꞌa tamanu au hamona nunuminia maꞌuaa yau, lomi a oa aꞌa hamuꞌou ranimai. 8 Mei pifine na bigiꞌaa tamanu na hawia. Na igiaa fei pao dufa unuu ba i pagipagiꞌaugau aꞌa fei iꞌifaia. 9 A warefaꞌuai aꞌa hamuꞌodu ba roꞌamina wareaa fei rawaniꞌa warea hitani tadiweꞌaiaa malagufu, tamanu na bigiꞌia, ana rowe uꞌugia aleꞌei hanununa.”
Judas na Uga ba i Aloaa Jesus
10 Judas Iscariot, hemea ei hefua ma helagui na dinaa aꞌa ei famamoaa humuu mei Haidaa ba i aloaa Jesus aꞌa roꞌodu. 11 Ronamina niꞌeniꞌe ei roꞌaa guainia ma rona faꞌunai aꞌana ba roꞌaa fani mugoo poꞌi aꞌana. Siꞌei, ifi farerefai rawaniꞌa au ba i fifaninia panii roꞌou.
Fei Hananaa fei Talai Falogia
12 Aꞌa fei rawarawa arewaa fei Hananaa fei Faraa Pidaua Lomi Fafuafua, fei maumau roꞌou ba roꞌaa apamoroꞌaa fei sipsipii fei Talai Falogia. Ma aꞌa fei arewaa fei, rona iꞌiginaa Jesus ei otalai nenerana, “Nunumiamu ba haiꞌou re pagiꞌaugaa gutanamu hitani ba oꞌaa hanana aꞌa fei Hananaa fei Talai Falogia?”
13 Siꞌei na aloaa helagui otalai nenerana ma na ware, “Waduꞌainaa aꞌa fena gufu ma hemea na poroporoꞌaa hepalo baraa ranu, iwe suafinaa hamugua. Nenegia. 14 Ware aꞌa mena amaa fena humu, fena hia i waduꞌia ba, ‘Mei Feroia na iꞌigai, “Hitani fei gutanau ba a hanana hugiaa ei otalai nenerau wagii fei Hananaa fei Talai Falogia?” ’ 15 Iwe famaꞌaa hamugua hepalo baua humu tare, na udeꞌaudii ena manumanu. Pagiꞌau gutanaa oꞌou yena.”
16 Laguei otalai nenera na aunu, waduꞌainaa fei gufu ma fanunupaꞌaa ei manumanu ana aleꞌei wareaa Jesus aꞌa lagua. Siꞌei, laguna pagiaa minaa ei manumanuu fei Hananaa fei Talai Falogia.
17 I fafilao, Jesus na sufudaifipuimai aꞌa ei hefua ma helagui. 18 Roꞌaa gutafapalagi aꞌa fei tawa, ina ware, “A warefaꞌuai aꞌa hamuꞌodu ba hemea hamuꞌou i aloau, hemea fi hanana aꞌau.”
19 Ronamina faloloaꞌi ma hememea na ware aꞌana, “Aꞌa ba yau?”
20 Ina ware, “Hia, hemea ei hefua ma helagui. Hemeni i pudigaa feni faraa pidaua laloo feni lopi i aꞌau. 21 Mei Naꞌuu Ramaꞌa i aunu ana aleꞌei rona neꞌinaa uꞌugana maꞌuaa, napaꞌaa fagiana mena i aloaa mei Naꞌuu Ramaꞌa! Na rawaninia nabaa lomi na wanini.”
Fei Finei mei Fasu
22 Roꞌei hanana, Jesus na tonaa fei faraa pidaua, ware ‘ta’, bidigeia, fanaa ei otalai nenerana ma ware, “Tonia; feni, hudi unuu.”
23 Ma na tonaa fei bara, ware ‘ta’, fanaa roꞌodu ma minaa roꞌou, rona hunu wagina.
24 Na warenaa aꞌa roꞌodu, “Feni, namou, feni i hupuꞌinaa fenib fiꞌugaia, feni i wigii aꞌa watauda. 25 A warefaꞌuai aꞌa hamuꞌodu ba lomi a hunudinaa fei ranuu grape hawina fena arewaa na hunumanufaudinia wagii fei haparaiaa mei Haidaa.”
26 Roꞌaa laugidigaa hepalo lauga, rona asiꞌaa ma aununaa fei Maugeni Olive.
Jesus na Wareꞌaugaa fei Waresuabaduaa Peter
27 Jesus na warefanaa roꞌou, “Minaa hamuꞌou, hamoꞌaa ofadugau, uaa na neꞌidii ba:
“‘Uꞌa foꞌafamaꞌeaa mei omaꞌamaꞌaa sipsipi,
ma ei sipsipi, roꞌaa talanenei.’
28 Maꞌuaa nenee fei una asiꞌadii, awe oꞌaꞌaununaa maꞌaa hamuꞌodu dinaa Galilee.”
29 Peter na ware, “Naꞌaa minaa ei roꞌaa ofadugio, yau, paꞌaa lomi.”
30 Jesus na ware, “A warefaꞌuai aꞌamu ba wagieni, hiꞌi, poi wagieni, atawe faguapoaic aigaa fei aꞌaroo, idoꞌo odupoai waresuabaduamu yau aꞌa hefiꞌa.”
31 Maꞌuaa Peter namina warefaweꞌi ba, “Nabaa ana a maꞌefipui aꞌamu, paꞌaa lomi awe ofadugio.” Ma ana aleꞌei wareaa minaa roꞌou.
Yei Gethsemane
32 Rona dinaa aꞌa hepalo peꞌihape, harana Gethsemane ma Jesus na warenaa aꞌa ei otalai nenerana, “Guta yeni ena na lafulafu.” 33 Ina dugiꞌuaiaa Peter, James ma John ma nawemina awata ununa. 34 Ma na warenaa aꞌa roꞌou, “Namina muainau fei faloloaꞌiau ma ba apoꞌo bimaꞌe ua. Oa yeni ma omaꞌamaꞌa.”
35 I nofaraualao maꞌida, na fapasinaa malagufu ma lafulafu ba naꞌaa na hawia, fei au neipoꞌo falogii aꞌana. 36 Ina ware, “Abba,d Oꞌama. Minaa ei manumanu na maꞌatalaa aꞌamu. Tonaa feni bara aꞌau maꞌuaa oneiꞌaa bigiꞌaa nunumiau, uaa nunumiamu.”
37 Na hadiweꞌinamii aꞌa ei otalai nenerana ma bapaꞌaa roꞌodu, rona maꞌigu. Na warenaa aꞌa Peter, “Simon. Haa, ona maꞌigu? Ana lomi ba opoꞌo omaꞌamaꞌa aleꞌena heai hour? 38 Omaꞌamaꞌa ma lafulafu ba lomi oꞌaa pasinaa laloo ei manimania. Fei spiriti na nunuminia maꞌuaa fei hudi unu na rafilele.”
39 Na aunudiai ma lafulafunaa ana fei. 40 I hadiweꞌidimai, na bapaꞌidinaa roꞌou, rona maꞌigu, uaa ei pudaa roꞌou na awata. Lomi rona aida ba roꞌaa wareaa tamanu aꞌana.
41 I hadiweꞌidimai fei faꞌodupoana, na warenaa aꞌa roꞌodu, “Ana hamoꞌei maꞌigu ma fawenai ua? Na haꞌiai! Fei auu nawe nomai. Maꞌa, mei Naꞌuu Ramaꞌa, rona alodigia panii ei hafeloꞌa. 42 Asiꞌaa! Odii! Simena fi nomai mena i aloau!”
Rona Patarofaa Jesus
43 Ana fi wareware, Judas, hemea ei hefua ma helagui na sufudaimai. Rona nofipuimai aꞌana hefaa baua gupuu ramaꞌa, notonamii ei wadu ma ei hafuhafu. Eꞌei, aloamii ei famamoaa humuu mei Haidaa, ei feroiaa law ma ei bauaniaa gufu.
44 Ma mei i aloia nadii ware aꞌa roꞌodu ba aleꞌei uniꞌunina, “Mena una hatofaa pudana, simena; patarofia, nodugia ma omaꞌafarawaninia.” 45 Ana ei i nolao aꞌa Jesus, Judas na ware, “Rabbi!” ma na hatofaa pudana. 46 Ei ramaꞌa, rona patarofaa Jesus ma panarofia. 47 Ma hemea aꞌa ei rona ufalarai na rapuꞌaa waduna ma lafigifamosuꞌaa adiaa mei nafii mei paꞌaa bauaniaa humuu mei Haidaa.
48 Na ware Jesus, “Haa, una famamoaa ei hafeloꞌa ramaꞌa, te hamoꞌaa notomai wadu ma hafuhafu ba hamoꞌamii panarofau? 49 Minaa ei arewaa, yau i aꞌa hamuꞌodu, feferoi malalaa fei humuu mei Haidaa ma lomi hamona panarofau maꞌuaa fei Buꞌu Apuna neipaꞌaa faꞌuai.” 50 Ma minaa ei aꞌana, rona ponipaꞌaidiꞌininia.
51 Maꞌuaa hemea baubara na papai ua lawalawa, na neneraa Jesus. Roꞌaa patarofia, 52 na poniꞌalawata ua, na ponidiꞌininaa fei lawalawana.
I Pudaa ei Bauaniaa ei Jew
53 Rona nodugaa Jesus i maꞌaa mei paꞌaa bauaniaa humuu mei Haidaa. Ma minaa ei famamoaa humuu mei Haidaa ma ei bauaniaa gufu mawe ei feroiaa law, rona figupuimai. 54 Peter na nenegia, maꞌuaa na raua maꞌida aꞌana. Namina waduꞌaiꞌaunulao malalaa fei humuu mei paꞌaa bauaniaa humuu mei Haidaa. Na guta yei aꞌa ei omaꞌamaꞌaa ma fi fanaꞌa aꞌa fei hafi.
55 Ei famamoaa humuu mei Haidaa ma minaa ei bauaniaa ei Jew, roꞌei lalabarainaa ei tataa Jesus ba roꞌaa foꞌafamaꞌeia maꞌuaa, lomi rona labagipaꞌaa hepalo. 56 Watauda na uꞌufasifi ba hia aleꞌei, maꞌuaa ei uꞌugaa roꞌou lomi na fiboꞌii.
57 Ma hefiꞌa, rona ufalarai ma fanaa eni sifisifi uꞌugaa roꞌou hia: 58 “Haiꞌouna guainaa wareana ba, ‘Awe fawataꞌoꞌoaa feni humuu mei Haidaa feni faduaa ramaꞌa ma laloo oduai arewaa a faduaa hepalodiai, abaa faduaa ramaꞌa.’” 59 Maꞌuaa, ana lomi na fiboꞌii ei uꞌugaa roꞌodu.
60 Siꞌei, mei paꞌaa bauaniaa humuu mei Haidaa na ufalarai maꞌaa roꞌodu ma na iꞌiginaa Jesus, “Haa, lomi ba o wareware? Tamanu feni uꞌugaa eni ramaꞌa eni, rona uꞌugio?” 61 Maꞌuaa Jesus na ufamadumu ua, lomi na wareware.
Na iꞌigaidinia mei paꞌaa bauaniaa humuu mei Haidaa, “Haa, yoi mei Christ,e mei Naꞌuu mei Hawegia?”
62 Na ware Jesus, “Yau ua. Ma owe fanunuaa mena Naꞌuu Ramaꞌa na guta pepei maꞌau Mei Faufaua, ena na nogio pafoo ei papalei pafea.”
63 Mei paꞌaa bauaniaa humuu mei Haidaa na foradigeaa ana fei susuna ma ware, “Tani o nunumidinaa hemeadiai i uꞌu? 64 Hamona guaidigia ba na warefafeloaa mei Haidaa. Tamanu naraa hamuꞌodu?”
Minaa roꞌou na ware ba na rawani ba inei maꞌe. 65 Ma hefiꞌa, rona unaꞌaa ma huwia; rona sumaa pudana, duꞌumaa panii roꞌodu, foꞌaia ma ware ba, “Ware unia!” Ma ei omaꞌamaꞌaa na dugia ma lapagia.
Peter na Ofadugaa Jesus
66 Peter yei fawelei pu ma hemea ei nanao nafii mei paꞌaa bauaniaa humuu mei Haidaa na nomai. 67 I fanunupaꞌaa Peter fi fanaꞌanaꞌaiaa ununa, na fanunufaꞌuꞌuia. Ina ware,
“Yoi ana aꞌa Jesus, mei Nazareth.”
68 Maꞌuaa ina waresuabadunia ba, “Lomi na apaꞌaa ena oi wareia,” ma na dinaa poaa humu.f
69 I fanunupaꞌia yei mei nanao nafi, na warediai aꞌa ei roꞌaa ufalarai yei, “Hia, hemea roꞌodu.” 70 Na suabadui-diai.
Madilao maꞌida, ei roꞌaa ufalarai papaa Peter, rona ware, “Paꞌaa faꞌua. Yoi hemea roꞌodu, uaa yoi hemea Galilee.”
71 Inawe umuaa anaia ma warefaꞌunai aꞌa roꞌodu ba, “Lomi na apaꞌaa mena hamoꞌei warewareia.”
72 Ana ei, fei aꞌaroo na aꞌaroi faguapoai.g Siꞌei, Peter na nonominaa fei wareaa Jesus aꞌana: “Nenee fei faꞌodupoaa ofadugamu yau, i guapoaih aꞌaroiaa fei aꞌaroo.” Ina narahadiweꞌinia ma na ai.