Jesus na Wareaa fei Wataꞌoꞌoaa fei Humuu mei Haidaa
13
Ei i asiꞌadiꞌininaa fei humuu mei Haidaa Jesus, hemea ei otalai nenerana na warenaa aꞌana, “Mena feroia, fanunulao! Poꞌo baua mugoo bata ei! Ana ronamina fananamai ei humu!”2 Jesus na ware, “Maꞌa, ena baua humu ena, paꞌaa lomi i ufalarai hepalo mugoo pafoo hepalodiai. Minaa ena mugoo ena, hefiꞌa ramaꞌa, roꞌawe fawataꞌoꞌonaa roꞌou pu.”
Ei Hafeloꞌa Manumanu ma ei Haperaraia
3 Ma i guta pafoo fei Maugeni Olive Jesus, i omaꞌanaloo fei humuu mei Haidaa, Peter, James, John ma Andrew, rona iꞌigifagiginia, 4 “Warefanaa haiꞌodu ba i nomai nahaiga ei manumanu ei ma tamanu lalana ba na rafiꞌi fei au ba ei manumanu ei, ana i sufudaimai.”
5 Jesus na warenaa aꞌa roꞌodu, “Omaꞌamaꞌa ba lomi nemea i sifiꞌaa hamuꞌou. 6 Watauda, roꞌaa nomai aꞌa fei harau ma ware ba, ‘Yau hia,’ ma roꞌaa sifiꞌaa watauda. 7 Ena hamona guainia ba i paꞌi fifoꞌaia ma ena uꞌuga ba roꞌei fifoꞌai, apuna maꞌaua. Ei manumanu aleꞌei nei paꞌaa nomai, maꞌuaa fei iaꞌiana ataa nomai. 8 Ei baua gufu roꞌaa fifadugei ma hefiꞌa hapara anaa. I rerere feni malagufu ma i paꞌi mouabiabia aꞌa watauda gufu. Ena manumanu ena, aleꞌei ei rawarawa fiꞌiaa waninia.
9 “Hamonei ofaweꞌi. Roꞌawe fifaninaa hamuꞌou aꞌa ei bauaniaa gufu ma roꞌaa hafugaa hamuꞌou laloo ei synagogue. Siꞌei ba hamona nenerau, hamowe ufalarai pudaa ena bauana ma ena hapara aleꞌena uꞌugaa hamuꞌou aꞌa roꞌodu. 10 Fei rawaniꞌa warea idoꞌomina dipedunaa ena gufu. 11 Ma ena rona panarofaa hamuꞌodu ma notonaa hamuꞌodu dududua, apuna naranara watauda ba hamoꞌaa wareaa tamanu. Wareꞌuaiaa tamanu na nomai naranaraa hamuꞌodu aꞌa fena au fena. Uaa, abaa hamuꞌodu ena hamona wareware, uaa fena Spiriti Apuna.
12 “Hemea i aloaa mei lofuna aꞌa hefiꞌa ba ronei foꞌafamaꞌeia. Mei ama ana i bigiꞌia aleꞌei aꞌa mei naꞌuna. Ei baduu, roꞌaa unaꞌaa ma fadugeaa ei ama ma inaa roꞌodu ma aunaa roꞌou maꞌea. 13 Minaa ei ramaꞌa, i bidibidi unuu roꞌodu aꞌa hamuꞌodu uaa yau ma hini i narafaweꞌi aꞌau nopaꞌaloo fei iaꞌiana, i tela.
Mei Hafeloꞌa
14 “Ma ena hamona fanunupaꞌaa mei ‘hafeloꞌa, mei ba i fafeloaa fei humuu mei Haidaa’ baa na oa laloo fei humu apuna—mei igoa nei apaꞌia—ena roꞌou yena Judea, ronei ponipaꞌainaa aꞌa ei maugeni. 15 Nabaa nemea i pafoo humuna, ineiꞌaa uꞌupuwaduꞌai ba i to manumanu. 16 Naꞌaa nemea yei laloo peꞌihape, ineiꞌawe bagua ba i tonaa fei hawaa uguna. 17 Aꞌa ena arewaa ena, paꞌaa famamaꞌau aꞌa ena wareu ma ena roi fasusu baduu! 18 Lafulafu ba fei au ponipaꞌaia neiꞌawe nomai laloo fei au baua maunu o lalarena, 19 uaa laloo ena arewaa ena, i paꞌi baua hafeloꞌa. Ena baua hafeloꞌa ena, lomi na u paꞌi ei i famamaraa feni malagufu mei Haidaa nopaꞌamii wagieni ma loꞌe i fai paꞌidiai. 20 Nabaa lomi i faweleguinaa ei arewaa ei mei Fasu, lomi nemea i tela maꞌuaa, siꞌei ba rona guta ei rafeiana, mei Fasu i faweleguinaa ei arewaa. 21 Aꞌa fena au fena, nabaa i nomai nemea ma i ware aꞌamu ba, ‘Maꞌa, Christ,b hia yeni,’ o ‘Hia simei’ apuna guainia. 22 Uaa ena sifisifi Christ ma sifisifi mamamaꞌa, roꞌawe nomai ma bigiꞌaa ei hilala ma foigia ba roꞌaa sifiꞌaa ei apunaia naꞌaa na maꞌatalaa. 23 Hamonei ofafaufau, uaa na warefanidigaa hamuꞌodu ei manumanu rotawe nomai.
Fei Noramiaa mei Naꞌuu Ramaꞌa
24 “Nenee fei hafeloꞌa aꞌa ena arewaa ena,
“‘fei halo i roroma,
fei puda, lomi i fanaa fei weꞌaina;
25 ei piꞌu, roꞌaa pasigai pumanugawe,
ei manumanuu haroo pafea, roꞌaa rerere.’c
26 “Aꞌa fena au fena, ei ramaꞌa, roꞌawe fanunupaꞌaa mei Naꞌuu Ramaꞌa i norai pafoo ei papalei fininaa baua faufau ma hawera. 27 Ma iwe aloaa ei aloꞌalona ma roꞌawe dugifipuipuinaa ena rafeiana aꞌa feni tadiweꞌaiaa feni malagufu, Rai, Hafaa, Oala ma Haraꞌuu aꞌa fena iaꞌiaa feni malagufu ma ena haroo pafea.
To Feroia aꞌa fei Haihai Figi
28 “Hamonei to feroia aꞌa fei maumau fei haihai figi: ena na sunaimai ei nusuna ma na paꞌi rauna hamona aidadii ba fei rai na rafiꞌi. 29 Ana aleꞌena, hamona fanunupaꞌaa ena manumanu ena na sufudai, hamonei aida ba, na rafiꞌi, ana paꞌaa papaa fei gigei. 30 A warefaꞌuai aꞌa hamuꞌou ba eni ramaꞌaa tawenid paꞌaa lomi roꞌaa maꞌepedu, roꞌaa maꞌa minaa eni manumanu eni rona sufudai. 31 Fei haroo pafea ma feni malagufu, laguꞌawe paꞌai, maꞌuaa fei wareau, paꞌaa lomi iwe paꞌaitoo.
Lomi Ona Aida fei Arewaa ma fei Au Noramiana
32 “Lomi hemea na apaꞌaa fei arewaa ma fei au. Ei aloꞌalo yei pafea ma mei Naꞌu, ana lomi rona aida, maꞌuaa uniaa mei Ama. 33 Ofafaufau ma omaꞌamaꞌa.e Lomi hamona aida ba fei au fei, i nomai nahaiga. 34 Aleꞌei hemea ba i tatalai rauaa. Na augaa ei nafina omaꞌamaꞌaa fei humuna. Na fani bigiꞌaa hememea ei nafina. Na warenaa aꞌa mei omaꞌaa fei gigei ba nei ofafaufau.
35 “Siꞌei ba hamonei omaꞌamaꞌa, uaa lomi hamona aida ba nahaiga na hadiweꞌimai mei amaa fei humu, i nomai na fafi, o difaꞌuꞌu, na aꞌaroi fena aꞌaroo, o baꞌapanii arewaa. 36 Nabaa i noꞌamai, lomi na rawani ba i nopoponinamii hamuꞌou fi maꞌigu. 37 Tamanu ena na wareia aꞌa hamuꞌodu, ana fi warenaa aꞌa roꞌodu: ‘Ofafaufau!’”