3 Iꞌa guta pafoo Maugeni Olive Jesus, ei otalai nenerana, rona nofagigimai aꞌana ma ware, “Warefanaa haiꞌou ba nahaiga i nomai fei manumanu fei ma tamanu fei hilala i unifanaa haiꞌou ba opowe nomai ma ipowe pedu fei au.”

4 Jesus na ware, “Omaꞌamaꞌa ba lomi nemea i sifiꞌaa hamuꞌou. 5 Uaa watauda, rowe nomai aꞌa fei harau ma ware ba, ‘Yau, mei Christ,’^a ma roꞌaa sifiꞌaa watauda. 6 Hamowe guainia ba ei gufu, rona fifoꞌai ma hamowe guainia ba na paꞌi fifoꞌaia, maꞌuaa hamoneiꞌaa naranara watauda wagii ei. Ei manumanu ei, roꞌapowe nomai, maꞌuaa atawe pedu fei au. 7 Hefiꞌa baua gufu, rowe asiꞌaa fasibanaa aꞌa hefiꞌadiai baua gufu ma ei hapara, rowe asiꞌaa fasibanaa aꞌa hefiꞌadiai hapara. Iwe moubiabia ma rerere hefiꞌa gufu yeni malagufu. 8 Minaa ei manumanu ei, neidoꞌo nomai aleꞌei nemea pifine ba i doꞌo tonaa fiꞌina ma hinene i wanini.

9 “Ma nenee fei, hefiꞌa, roꞌaa fifaninaa hamuꞌou panii hefiꞌadiai ba roꞌaa haperararaiaa hamuꞌou ma foꞌafamaꞌeaa hamuꞌou ma minaa ei gufu i bidibidi unuu roꞌou aꞌa hamuꞌou uaa yau. 10 Aꞌa fei au fei, watauda i asisi ei naranaraa roꞌou aꞌau ma roꞌaa fiꞌufadugii ma fibidibidii unuu roꞌou. 11 Rowe nomai watauda mamamaꞌa sifisifi ma sifiꞌaa watauda. 12 Siꞌei ba namina rata ei hafeloꞌa, fei haguaa watauda i paꞌai, 13 maꞌuaa hini i ofafaufau nopaꞌaloo fei pedupeduu fei au, i tela. 14 Ma feni rawaniꞌa wareaa fei haparaia, iwe talepedunaa minaa ei gufu tadiweꞌaia ba minaa ei, ronei guainia ma ipowe nomai fei pedupeduu fei au.

15 “Siꞌei, ena hamona fanunupaꞌaa ‘mei hafeloꞌa, mei ba i fafeloaa fei humuu mei Haidaa’ ba na ufalarai fawelei na apunai, mei nadii uꞌugia mei mamamaꞌa Daniel—mei igoa nei apaꞌia— 16 ma ei roꞌou yei Judea, ronei ponipaꞌainaa aꞌa ei maugeni. 17 Nemea pafoo pupuaa humuna neiꞌaa upu ba i to neꞌaa manumanu laloo humuna. 18 Nemea pifine i peꞌihape neiꞌaa bagua ba i to hawaa uguna. 19 Aꞌa ei arewaa ei, iwemina hafeloinaa ei wareu mawe ei roi fasususuu baduu. 20 Lafulafu ba fei ponipaꞌaiaa hamuꞌou neiꞌaa nomai aꞌa fei au lalare ma maunu, o laloo fei Sabbath. 21 Uaa iwe nomai fei paꞌaa baua au hafelo, fei lomi na hawawagia hepalo hafeloꞌa wagii fei mamaraiamii feni ano nopaꞌamii wagieni ma nefarani, ana lomi ba i paꞌi hepalo au hafeloꞌa aleꞌei fei. 22 Nabaa lomi i pedu ei arewaa ei, lomi nemea i tela maꞌuaa, siꞌei ba ei rafeiana ana rona guta wagina, i faweleguinaa ei arewaa ei. 23 Aꞌa fei au fei, nabaa nemea i ware aꞌamu ba, ‘Fanunu, simeni meni Christ!’ o, ‘Simei, hia yei!’ apuna guaiana. 24 Uaa, rowe nomai ei sifisifi Christ ma ei sifisifi mamamaꞌa ma ro bigiꞌaa ei rawaniꞌa hilala ma ei foigia ba roꞌaa sifiꞌaa ei rafeiaa mei Fasu. Maꞌuaa lomi ba roꞌaa sifipaꞌaa roꞌou. 25 Maꞌaia, unadii warefaꞌaidigaa hamuꞌou.

26 “Siꞌei, nabaa nemea i warefanaa hamuꞌou ba, ‘Simei, hia yei, fawelei lomi guana ma haihai,’ apuna nolao; o, ‘Simeni, yeni, laloo eni humu,’ apuna guaiana. 27 Uaa minaa ei, rowe aida ba fi nomai mei Naꞌuu Ramaꞌa, ana aleꞌei ba nabaa fei usida na gimeꞌaimai pepei anaa halo dinaloo loloaa halo, minaa ei roꞌaa fanunupaꞌia. 28 Ma nabaa rona fanunuaa ei roꞌudo rona fidulao hitani, minaa ei, rona aida ba na paꞌi wafuu maꞌea yei.

29 “Inaꞌaa pedulao ei hafeloꞌa wagii ei arewaa ei

30 “Aꞌa fei au fei, fei hilalaa mei Naꞌuu Ramaꞌa i faꞌarewamai i haroo pumanugawe ma minaa ei gufupedu yeni malagufu, roꞌaa faloloaꞌi. Rowe fanunupaꞌaa mei Naꞌuu Ramaꞌa fi nomai pafoo ei papalei pafea nofininamii ei faufauna ma hawerana. 31 Ma iwe aloaa ei aloꞌalona fininaa aigaa fei maniwa ma rowe figupuinaa ei rafeiana, noramiaa roꞌou laloo minaa ei gufu tadiweꞌaiaa feni malagufu ma i pafea.

32 “Hamonei to apaꞌaa hamuꞌou wagii fei haihai figi: ena hamona fanunupaꞌia ba ei rau mamarawii na sunaimai, hamona aida ba fei au rawani ipowe nomai. 33 Ana aleꞌei, ena hamona fanunupaꞌaa ei manumanu ei, hamonei aida ba ina^b rafiꞌi, i poaa fei gigei. 34 A warefaꞌuai aꞌa hamuꞌou ba ei ramaꞌaa feni taweni,^c paꞌaa lomi ba roꞌaa paꞌai hawina na nomai minaa ei manumanu ei. 35 Fei haroo pumanugawe ma feni ano, laguwe apaꞌai, maꞌuaa ei wareau lomi rowe apaꞌaitoo.

36 “Lomi nemea na aida ba paꞌaa nahaiga fei arewaa o fei au, ana lomi rona aida ei aloꞌalo pafea o mei Naꞌu,^d maꞌuaa uniaa mei Ama. 37 Aꞌa ei arewaa Noah, ana aleꞌei fei au noramiaa mei Naꞌuu Ramaꞌa. 38 Uaa aꞌa ei arewaa itawe nomai fei lamalamana, ei ramaꞌa, rona hanana ma hunu, lalai ma falalai nopaꞌaloo fei arewaa ba Noah na waduꞌainaa laloo fei baua wa. 39 Ma lomi rona aida ba tamanu i nomai nopaꞌaloo fei ba na nomai fei lamalamana ma na lafenotonaa minaa roꞌou. Ana aleꞌei aꞌa fei au noramiaa mei Naꞌuu Ramaꞌa. 40 Helagui wawane, lagua i peꞌihape; hemea i apaꞌai ma hemea, lomi. 41 Helagui pifine, laguꞌei harara duꞌua; hemea i apaꞌai ma hemea, lomi.

42 “Siꞌei, hamonei omaꞌamaꞌa, uaa lomi hamona aida fei arewaa na nomai mei Fasuu hamuꞌou. 43 Maꞌuaa hamonei apaꞌimaꞌaiaa feni: Nabaa mei amaa fei humu na aidadii ba paꞌaa nahaiga laloo fei poi i nomai mei fafanao, i omaꞌa ma lomi i waduꞌaipaꞌi mei. 44 Siꞌei, ana aleꞌei, hamonei ofafaufau, uaa mei Naꞌuu Ramaꞌa i nomai aꞌa fei au lomi hamona nara ba i nomai.

45 “Mei fasu i aunaa hini nafi na oafagugu ma na paꞌi apaꞌana ba nei omaꞌaa ei hefiꞌadiai nafi laloo humuna ma fani hanaa roꞌou aꞌa fei au hananaa? 46 Na rawaninaa mei nafi nabaa i hadiweꞌimai mei fasuna ma fanunupaꞌia ba mei nafi mei, na bigiꞌaa ei nunumiana. 47 A warefaꞌuai aꞌa hamuꞌou ba iwe aunaa hia omaꞌamaꞌaa minaa ei manumanuna. 48 Maꞌuaa, nabaa mei nafi na hafelo ma na nara ba, ‘Mei fasuu, namina madii gutanana hefawala,’ 49 ma na foꞌaa ei nafi, ei rafirafina ma hanana ma hunufapoapoai, 50 mei fasuna, ipowe nomai wagii hepalo arewaa ma au lomi na nara mei nafi ba i nomai mei fasuna. 51 Iwe walawalainia ma augia i aꞌa ei wareꞌoni, yei fawelei na paꞌi aiꞌaiga ma fiꞌuꞌuiaa difo.