5 “Minaa ei manumanu rona bigiꞌia ba ronei maꞌaia ei ramaꞌa: Rona fadufabauaninaa ei bao ei neꞌiaa Buꞌu Apuna^a roꞌou ma famalaiaa ei wao supuu lawalawaa roꞌou; 6 ronamina nunuminaa ei gutanaa ei baua ramaꞌa aꞌa ei hananaa ma ei paꞌaa rawaniꞌa gutana i laloo ei synagogue; 7 ronamina nunuminia ba ei ramaꞌa, ronei famafufuoinaa roꞌou malalaa ei humuu aloꞌalo ma ba ei ramaꞌa nei harofaa roꞌou, ‘Rabbi.’

8 “Maꞌuaa abawe haronaa hamuꞌou ‘Rabbi,’ uaa hamona paꞌi hemea ua Fasu ma minaa hamuꞌou, filofui. 9 Ma apuna harofaa nemea yeni malagufu ‘Ama’, uaa hamona paꞌi hemea ua Ama ma hia, i pafea. 10 Ana abaa haronaa hamuꞌou ‘feroia,’ uaa hamona paꞌi hemea ua ‘Feroia’, mei Christ.^b 11 Mei na pafeai aꞌa hamuꞌou, hia i aleꞌei nafii hamuꞌou. 12 Uaa hini na poronaa hia pafea, i oanaa pu ma hini i fafafaunaa hia pu, iwe pafeai.

13 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamonaꞌu fareꞌaa fei gigei fei haparaia pafea i pudaa ei ramaꞌa. Lomi ba hamoꞌaa waduꞌai ma ana hamona lawaraa fei gigei aꞌa ei ba roꞌaa waduꞌai. 14\f + \fr 23:14 \ft Hefiꞌa neꞌia ba roꞌaa waduꞌai. 14 Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamona faꞌamoaa humuu ei maꞌesuabea ma lafulafufamalaa pudaa ramaꞌa. Siꞌei imina ratadiai ei fagianaa hamuꞌou.\f*

15 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamona tatalai yeni malagufu ma pafoo agi ba hamoꞌaa falosuinaa nemea ma iꞌa neneraa hamuꞌou, hamona fahafelodinia aleꞌei naꞌuu fei gufu hafelo ma imina hafeloꞌapoidiai laraa hamuꞌou.

16 “Hamona fagiana, hamuꞌou ena pudawerai talaiduga! Hamonaꞌu ware ba, ‘Nabaa nemea i faꞌunainaa fei humuu mei Haidaa, lomi hanuna; maꞌuaa hini na faꞌunainaa fei mugoo poꞌii humuu mei Haidaa na roroꞌai wagii fei faꞌunaiana.’ 17 Hamuꞌou ena poapoa pudawerai! Afaia guapaloeni na paꞌi hanuna, fei mugoo poꞌii laloo humuu mei Haidaa, o fei humuna, fei na faꞌapunainaa fei mugoo poꞌi lalona? 18 Ana hamonaꞌu ware ba, ‘Nabaa nemea i faꞌunainaa fei tawahafi na apunai laloo fei humuu mei Haidaa, lomi hanuna; maꞌuaa, hini i faꞌunainaa fei fanaa na ude pafona, ina roroꞌai wagii fei faꞌunaiana.’ 19 Hamuꞌou ena pudawerai! Afaia guapaloeni na paꞌi hanuna, fei fana, o fei tawahafi na apunai, fei na faꞌapunainaa fei fana pafona? 20 Siꞌei, hini i faꞌunainaa fei tawahafi na apunai, ana na faꞌunainaa minaa ei pafona. 21 Ma hini i faꞌunainaa fei humuu mei Haidaa ana na faꞌunainaa mei na oa lalona. 22 Ma hini i faꞌunainaa fei gufuu pafea na faꞌunainaa fei gutanaa mei Haidaa mawe mei na guta pafona.

23 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamona fani hepalo aꞌa hefua eꞌei dufaa duꞌua—mint, dill ma cummin. Maꞌuaa hamona fanunuꞌauꞌuaiaa ei rarabaa manumanu laloo fei law—aleꞌei tamanu na wanewane, ei faloloaꞌia ma fei mau oafagugua. Ina rawani nabaa hamona bigidigamai eꞌei ma lomi hamona madiꞌinaa fei hepalo aꞌa hefua. 24 Hamuꞌou ena pudawerai talaiduga, hamona nueisiminaa hepalo pugoꞌa, maꞌuaa hamona onomaa hepalo camel.

25 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamonaꞌu fesuaa fei auguu ei bara ma ei apia, maꞌuaa lalona na pepesu ei wawaꞌai poa ma fei naraꞌuaiaa ana hamuꞌou. 26 Hamuꞌou ena pudawerai Pharisee! Doꞌo fesuaa laloo ei bara ma apia ma fei augu ipowe fafaꞌarai anaa.

27 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamuꞌou aleꞌei ei humuu maꞌea na pomaifapoꞌi fei auguna, fei na fananamai, maꞌuaa, i lalona na pepesu aꞌa ei guii maꞌea ma minaa ei loloaa. 28 Ana aleꞌei, i pudaa ramaꞌa ba hamona wanewane, maꞌuaa laloo iaa hamuꞌou na pepesu aꞌa ei wareꞌonia ma ei naranaraa hafeloꞌa.

29 “Hamona fagiana, hamuꞌou ena feroiaa law mawe hamuꞌou ena Pharisee, gueina wareꞌoni! Hamonaꞌu wadufani humuu maꞌeaa ei mamamaꞌa ma haweginaa ei huapuu ei wanewanea. 30 Ma hamonaꞌu ware ba, ‘Nabaa haiꞌouna oa aꞌa fei au ei amaa haiꞌou mina, lomi ba haiꞌou rarafiaa roꞌou ei ro fawiginaa fei namoo ei mamamaꞌa.’ 31 Ma wagii fei, hamona uniaa ana hamuꞌou, uaa hamuꞌou pai ei rona foꞌafamaꞌeaa ei mamamaꞌa. 32 Eꞌeni hamopowe bigifaꞌapoinaa ei hafeloꞌa, ei di faꞌasiꞌanaa ei amaa hamuꞌou mina!

33 “Hamuꞌou ena waꞌa! Hamuꞌou ena naꞌuu ei waꞌa hafelo! Hamuꞌou ponipaꞌai batanai aꞌa fei waduhero? 34 Siꞌei, yau ba a aloawii ei mamamaꞌa, ei anoꞌano mawe ei feroia aꞌa hamuꞌou. Hamoꞌaa foꞌafamaꞌeaa hefiꞌa roꞌou ma fatawaa roꞌou aꞌa ei hawafolo ma hefiꞌadiai, hamoꞌaa babuinaa roꞌou i laloo ei synagogue hamuꞌou ma tetenaa roꞌou aꞌa hepapalo gufu. 35 Ma siꞌei, i pafoo hamuꞌou iwe wigimai fei raraa minaa ei wanewanea, ei rona maꞌe yeni malagufu aꞌa fei au wigiaa raraa Abel nopaꞌaloo fei au wigiaa raraa Zechariah, mei naꞌuu Berekiah, mei hamona foꞌafamaꞌeia watolaa fei humuu mei Haidaa ma fei tawahafi na apunai. 36 A warefaꞌuai aꞌa hamuꞌou ba minaa ei, iwe pasi pafoo taweni.

37 “O, Jerusalem, Jerusalem, mena, ona foꞌafamaꞌeaa ei mamamaꞌa ma nafafamaꞌenaa mugoo ena aloawiau aꞌamu, unaꞌaida nunuminia ba a fafigupuinaa ei naꞌumu aleꞌei hepalo inaa aꞌaroo na fafigupuinaa ei naꞌuna haroo pauna maꞌuaa, lomi ona nunumiai. 38 Maꞌa, na fawawadua fei humumu, fei na udenaa aꞌamu. 39 Uaa a warefanaa hamuꞌou ba lomi hamoꞌaa fanunupaꞌidinau hawina hamona ware ba, ‘Na paꞌi hawegiana mei fi nomai aꞌa fei haraa mei Fasu.’”