6 “Na paꞌi hemea dufu ba i aloia, hemei naꞌuna, baduu wawane; mei paꞌaa haguna. Na aloia nenee minaa roꞌodu. Na ware aleꞌei ba, ‘Roꞌawe maꞌauaa mei naꞌuu.’

7 “Maꞌuaa rona fiwarewarei ei omaꞌamaꞌaa fei peꞌihape ba, ‘Simeni, meni i tonaa feni peꞌihapee amana nabaa i maꞌe mei amana. O dii, o foꞌafamaꞌeia ma fei peꞌihape, i udenaa peꞌihapee oꞌodu.’ 8 Siꞌei, rona panarofia, foꞌafamaꞌeia ma suminia auguu fei peꞌihape.

9 “Tamanu naraa hamuꞌodu ba i bigiꞌia mei amaa fei peꞌihape? I nomai ma foꞌafamaꞌeaa ei omaꞌamaꞌaa fei peꞌihape ma i fanaa fei peꞌihape aꞌa hefiꞌadiai. 10 Haa, loꞌe hamona igoaa feni neꞌia laloo fei Buꞌu Apuna ba:

12 Siꞌei, rona lalabaginaa hepalo tala ba roꞌaa panaroboboꞌinia, uaa rona aida ba ifi warehanunuinaa roꞌodu, maꞌuaa rona mamaꞌau aꞌa fei gupuu ramaꞌa. Siꞌei, rona diꞌininia ma aunu.

13 Hinene, rona aloaa hefiꞌa Pharisee ma ei maroaa Herod aꞌa Jesus ba ronei labaginaa tataa wareana. 14 Rona dinamii aꞌana ma ware, “Mena feroia, haiꞌouna aida ba yoi hemea wanewanea. Lomi ona fafefenaa wareaa ei ramaꞌa, uatani, lomi ona nara ba roꞌou, ramaꞌa bata; maꞌuaa ona feroinaa fei talaa mei Haidaa aꞌa tamanu na faꞌuai. Na rawani ba o fani mugoo poꞌii gavaman aꞌa Caesar, o lomi? 15 O fani, o, oneiꞌaa fani?”

Maꞌuaa Jesus na apaꞌidigaa ei wareꞌoniaa roꞌodu. Ina iꞌigai, “Tani hamuꞌou mania ba hamoꞌaa faꞌalabeꞌau? Tofanamiau hepalo denarius ma a maꞌaia.” 16 Rona tonamai fei mugoo poꞌi ma na iꞌigainaa roꞌodu, “Hanunuu hini feni? Ma feni neꞌia, haraa hini?”

Rona ware, “Caesar.”

17 Siꞌei, Jesus na warenaa aꞌa roꞌodu, “Fanaa Caesar ei manumanuna ma fanaa mei Haidaa ei manumanuna.”

Ma rona maduꞌofo aꞌana.

18 Siꞌei, ei Sadducee, ei rona ware ba lomi roꞌaa asiꞌaa ei maꞌea, rona nomai ma iꞌigainia hepalo iꞌigaia. 19 Rona ware, “Mena feroia, Moses na neꞌifanaa oꞌodu ba nabaa nemea lofuu hemea i maꞌediꞌininaa mei harona maꞌuaa lomi naꞌuna, mei lofuu mei maꞌea nei lalainaa mei haroo mei maꞌea ma nei fuaifani naꞌuu mei lofuna. 20 Te, na paꞌi oloromea filofui. Mei umaꞌua na lalai ma na maꞌe ma lomi naꞌuna. 21 Mei umugina na lalainaa mei pifine, mei maꞌesuabea ma mei umugina, ana na maꞌe, lomi naꞌuna. Ana aleꞌei aꞌa mei faꞌoꞌoduiaa roꞌodu. 22 Minaa ei oloromea, rona maꞌe ma lomi rona difuai baduu ma nene, ana nawe maꞌe mei pifine. 23 Aꞌa fei au asiꞌanab haroo hini roꞌodu mei pifine? Te, minaa ei oloromea, rona lalainia?”

24 Jesus na ware, “Tani, hamoꞌaa poapoai? Haa, lomi hamona apaꞌaa fei Buꞌu Apuna, o fei faufau mei Haidaa? 25 Ena rona asiꞌaa ei maꞌea, lomi roꞌaa lalai o falalai; rowe aleꞌena ei aloꞌalo pafea. 26 Ma aꞌa fei ba roꞌaa asiꞌaa ei maꞌea—haa, lomi hamona igoia aꞌa fei Buꞌuu Moses, ei i guꞌaguꞌa fei haihai, na warefania mei Haidaa, ‘Yau, mei Haidaniaa Abraham, mei Haidaniaa Isaac ma mei Haidaniaa Jacob’? 27 Abaa hia Haidaniaa ei maꞌea, uaa Haidaniaa ei rona werawera. Hamonamina tatafafelo!”

28 Na nomai hemea feroiaa law ma na guainaa roꞌodu, roi fiharenii. Na fanunupaꞌia ba Jesus na fanifarawani warea aꞌa ei iꞌigaiaa roꞌodu ma iꞌigainia, “Aꞌa minaa ei law, afaia na pafeainaa roꞌou?”

29 Na ware Jesus, “Fei namina pafeai, sifeni: ‘Ena Israel, hamonei guainia, mei Fasu, mei Haidaniaa oꞌodu, hia hemea ua.^b 30 Haguaa mei Fasu, mei Haidaniamu aꞌa minaa ei naranaramu ma aꞌa minaa ei fawewenimu ma aꞌa minaa ei apaꞌamu ma aꞌa minaa ei faufaumu.’ 31 Fei faguapaloana, sifeni: ‘Haguaa mei gufumu ana aleꞌei ona haguio.’ Lomi hepalodiai law na muainaa guapaloeni.”

32 Na ware mei ramaꞌa mei, “Mena feroia, ona warepaꞌia. Na wanewane ei wareamu ba hemea ua Haidaa ma lomi hemeadiai maꞌuaa hia ua. 33 Fei ba onei haguia aꞌa minaa ei naranaramu ma minaa ei apaꞌamu ma minaa ei faufaumu ma fei ba onei haguaa mei gufumu ana aleꞌei ona haguio na mua laraa fei faguꞌamu minaa ei manulelele ma minaa ei fana aꞌa Mei Haidaa.”

34 I fanunuia Jesus ba mei ramaꞌa mei, na warepaꞌia aleꞌei ei iꞌigaiana, ina ware aꞌana, “Lomi ona raua aꞌa fei haparaiaa mei Haidaa.” Ma nenee fei, lomi nemea na lauguꞌai ba i iꞌiginia hefiꞌadiai iꞌigaia.

35 Ei fi wareware Jesus yei malalaa fei humuu mei Haidaa, na iꞌigainaa roꞌou ba, “Tani roꞌaa ware ei feroiaa law ba Christ,^c naꞌuu David? 36 David, aꞌa fei faufau fei Spiriti Apuna, ana na ware:

Fei baua gupuu ramaꞌa, rona guainia ma rona niꞌeniꞌe.

38 Ei fi feroinaa roꞌodu Jesus na ware ba “Omaꞌaa hamuꞌodu aꞌa ena feroiaa law. Ronafaneꞌaida fareaa ena maleaa susu ma tatalai fawelei ronaꞌo aloꞌalo manumanu ba ronei fafanununaa roꞌou ei ramaꞌa. 39 Ma tonaa ena gutaa ena bauana laloo ei synagogue ma aꞌa ena baua hananaa ronaꞌo guta aꞌa ei gutaa ena baua ramaꞌa. 40 Rona faꞌamoaa humuu ei pifine maꞌesuabea ma ronamina lafulafu famalaa ba ei ramaꞌa, ronei fanunuaa roꞌodu. Ei ramaꞌa aleꞌei, roꞌawemina paꞌi fagianaa roꞌodu.”

41 Jesus na gutaꞌomaꞌalao aꞌa fei bao mugoo poꞌi, fei ronaꞌo augaa ei fana lalona ma inaꞌo pupudainaa ei roꞌei au mugoo poꞌi aꞌa fei bao mugoo poꞌi i humuu mei Haidaa. Watauda, ei rona paꞌi watauda mugoo poꞌi, rona aufawatauda. 42 Ma hemea pifine maꞌesuabea na nomai, lomi na paꞌi watauda mugoo poꞌina. Ina nomai ma augaa guapalo pusuꞌoro mugoo poꞌi,^d puduna aleꞌena guapalo toea.^e

43 Jesus na harofamii ei otalai nenerana ma ware ba, “A warefaꞌuai aꞌa hamuꞌodu ba mei pifine mei, na watauda ei augana laraa ei augaa minaa ei ramaꞌa. 44 Minaa ei ramaꞌa ei, rona fani aꞌa ei watauda manumanu rona paꞌi. Ma hia na aupedugaa maꞌidei hodihodiana.”