Jesus na Aloaa Oloromfua ma Helagui
10
Nenee fei, mei Fasu na rafeinaa oloromfua ma helaguidiaia ma alofahelalaguinaa roꞌou ba roneidoꞌo nonoo dinaa aꞌa minaa ei gufu ba i waduꞌai. 2 Ina warefanaa roꞌou, “Namina watauda ei fua, maꞌuaa, maꞌida ua hufuꞌa. Siꞌei, hamonei iꞌiginaa mei Fasuu ei hufuꞌa ba nei alo bigibigiꞌa aꞌa fei peꞌihapena. 3 Aunu! A aloaa hamuꞌou aleꞌei naꞌuu sipsipi dupuaa ena ponotoo podu. 4 Hamoneiꞌaa notoo mugoo poꞌi, raba, hafena pine o warewarenaa aꞌa nemea i tala.5 “Ena hamona waduꞌaa hepalo humu, hamoneidoꞌo ware, ‘Fei gutafarawania aꞌa hamuꞌou ena laloo feni humu feni.’ 6 Nabaa nemea rawaniꞌa ramaꞌa yei, fei rawaniꞌaa hamuꞌou i pasinaa pafona; nabaa lomi, i hadiweꞌinaa aꞌa hamuꞌou. 7 Guta laloo fei humu fei. Hanana ma hunumaa tamanu rona fanaa hamuꞌou uaa na rawani ba mei bigibigiꞌa i to ponoꞌana. Apuna guta aꞌa watauda humu.
8 “Ena hamona dinaa aꞌa hepalo gufu ma rona taufaꞌugaa hamuꞌou, hamonei hanaiaa tamanu rona fanaa hamuꞌou. 9 Fapedugaa funuaa ei ramaꞌa yei ma warefanaa roꞌou, ‘Fei haparaiaa mei Haidaa na rafiꞌinaa hamuꞌou.’ 10 Maꞌuaa ena hamona dinaa hepalo gufu ma lomi rona taufaꞌugaa hamuꞌou, dinaa aꞌa ei talaa roꞌou ma ware, 11 ‘Haiꞌouna foifoiaa ei piyee gufuu hamuꞌou aꞌa ei pinee haiꞌou uaa hamona bigifatata. Ma hamonei aida ba fei haparaiaa mei Haidaa na rafiꞌi.’ 12 A warefanaa hamuꞌou ba na siagigii fagianaa Sodom laraa fei gufu fei.
Ei Gufu Lomi na Paꞌi Narafaweꞌia
13 “Hamona fagiana hamuꞌou ena Korazin! Hamona fagiana hamuꞌou ena Bethsaida! Uaa, nabaa Tyre ma Sidon na maꞌa ei foigia mina, ei foigia hamona maꞌaia eꞌeni, ei ramaꞌaa guapaloei gufu guapaloei, roꞌaa filogidigaa naranaraa roꞌou ma gutarafeaa ei madigedigeaa lawalawa ma haguguinaa tabaa roꞌou maduhafi. 14 Maꞌuaa aꞌa fei dududua na siagigii fagianaa Tyre ma Sidon laraa hamuꞌou. 15 Ma hamuꞌou ena Capernaum, naraa hamuꞌou ba hamoꞌaa diꞌuanaa gufu pafea? Paꞌaa lomi. Hamowe diꞌuanawii fena walaloa.b
16 “Hini i guainaa hamuꞌou na guainau; hini i ofadugaa hamuꞌou na ofadugau; maꞌuaa, hini i ofadugau na ofadugaa mei i aloagiau.”
17 Ei oloromfua ma helagui, ronawe hadiweꞌaimai ma wareniꞌeniꞌe, “Mena Fasu, ei pigea ana na neneraa wareaa haiꞌou aꞌa fei haramu.”
18 Ina ware, “Una fanunupaꞌaa Satan na pasirai yei pafea aleꞌei usida. 19 Una fanidii faufau hamuꞌou ba hamonei hapuninaa ei hafeloꞌa waꞌa, ei difowai ma muainaa minaa ei faufau mei ba i foꞌafamaꞌeaa hamuꞌou. 20 Hamoneiꞌaa niꞌeniꞌe ba rona neneraa wareaa hamuꞌodu ei spiriti hafelo. Maꞌuaa hamonei niꞌeniꞌe aꞌa fei ba ei haraa hamuꞌou na pana i gufu pafea.”
Jesus na Niꞌeniꞌe
21 Aꞌa fei au fei, siꞌei ba fei Spiriti Apuna namina faniꞌeniꞌeaa ununa, Jesus na ware, “Una uduginio, Oꞌama, mena Fasu, mena ona pafeainaa fei haroo pafea ma feni ano, uaa ona opaꞌainaa eni manumanu eni aꞌa ena rona paꞌi apaꞌa ma feroiaa roꞌou ma ona faꞌarewaia aꞌa ei baduu pusuꞌo. Hiꞌi, Oꞌama, uaa ona niꞌeniꞌe ba na aleꞌei.
22 “Minaa ei manumanu nadii fifaninaa paniu mei Amau. Lomi hemea na aida ba mei Naꞌu, hia hini, maꞌuaa, uniaa mei Ama. Ma lomi hemea na aida ba mei Ama, hia hini, maꞌuaa, uniaa mei Naꞌu mawe ei hia na nunumiai ba i famaꞌaia aꞌa roꞌou.”
23 Siꞌei, ina momoꞌinaa aꞌa ei otalai nenerana ma na warefagigii aꞌa roꞌou, “Na paꞌi hawegia aꞌa ena puda na fanunuaa tamanu hamona fanunuia. 24 Uaa a warefanaa hamuꞌou ba watauda mamamaꞌa ma hapara, nunumiaa roꞌou ba roꞌaa fanunuaa tamanu hamona fanunuia, maꞌuaa lomi rona fanunupaꞌia ma ba roꞌaa guainaa tamanu hamona guainia, maꞌuaa lomi rona guaipaꞌia.
Fei Warea Hanunuu mei Rawaniꞌa Samaria
25 Heai arewaa hemea na apaꞌifarawaninaa fei law, na ufalarai ba i maniaa Jesus. Ina iꞌigai, “Feroia, a bigiꞌaa tamanu ba a to harenua lomi i pedutoo?”
26 Ina ware, “Tamanu neꞌia wagii fei Law? Ma ona igobatanainia?”
27 Ina ware: “‘Haguaa mei Haidaa, mei Fasumu aꞌa minaa fei haꞌemu ma minaa fei fawewenimu ma minaa fei faufaumu ma minaa ei naranaramu’; ma ‘Haguaa mei gufumu ana aleꞌei ona haguio.’”
28 Jesus na ware, “Ona warepaꞌia. Bigiꞌia ma oꞌaa gutalao.”
29 Maꞌuaa ba i fawanewaneaa anaia, na iꞌigai aleꞌei, “Ma, hini mei gufuu?”
30 Jesus na ware: “Hemea fi talailao diꞌininaa Jerusalem ba i dinaa Jericho ma rona panarofia ei fafanao. Rona forabaininiꞌaa susuna, foꞌaia ma anaa i maꞌe ma rona diꞌininia. 31 Hemea bauaniaa humuu mei Haidaa ana fi aunulao aꞌa fei tala fei ma na fanunupaꞌaa mei ramaꞌa mei, na farapa ma aunudiꞌininia. 32 Hemea Levi ana aleꞌei, i nopaꞌamii fawelei ma fanunupaꞌia, na talai fipepei ma aunudiꞌininia. 33 Maꞌuaa hemea Samaria fi tatalailao na nopaꞌamii fawelei na haino mei. I fanunupaꞌia, na faloloaꞌinia. 34 Ina nolao aꞌana ma boboꞌinaa ei loralorana. Na ipinaa ununa pao ma wine. Ma fahuginia pafoo fei hapena donkey ma noduginaa hia aꞌa hepalo humuu maꞌigua ma roiroinia. 35 Iree arewadiai, ina fanaa mei omaꞌamaꞌaa fei humuu maꞌigua guapalo mugoo poꞌic ma warenaa aꞌana, ‘Roinia ma ena una hadiweꞌaimai, awe ponoꞌaa tamanudiai ona bigiꞌia aꞌana.’
36 “Aꞌa oꞌoduei, hini aleꞌei gufuu mei rona foꞌaia ei fafanao?”
37 Mei na paꞌi baua apaꞌana aꞌa fei law na ware, “Mei na faloloaꞌinia.”
Jesus na warenaa aꞌana, “Onei aunu ma bigi ana aleꞌena.”
I aꞌa fei Humuu Martha ma Mary
38 Ei roi tatalailao Jesus ma ei otalai nenerana, ina nopaꞌamiaa hepalo gufu i guta wagina hemea pifine harana Martha, mei na fagutania humuna. 39 Na paꞌi hemea tafina, harana Mary, ma na guta igoaa mei Fasu ma guainaa uꞌugana. 40 Maꞌuaa Martha, namina nifi rawana uaa ifi bigiꞌaa ei duꞌua. Ina nomai aꞌana ma iꞌigai, “Mena Fasu, haa, lomi ona fanunupaꞌia ba unaa yau fimina bigiꞌaa ei bigiꞌa ma mei tafiu, na aida ma fi guta ua? Ware aꞌana ba inei hadumau!”