Fei Feroiaa Jesus Wagii fei Lafulafua
11
Heai arewaa, Jesus fi lafulafu hefawala. I lafulafudii, hemea otalai nenerana na warenaa aꞌana, “Mena Fasu, feroinaa haiꞌodu lafulafua ana aleꞌei John na feroinaa ei otalai nenerana.”2 Ina warenaa aꞌa roꞌou, “Ena hamona lafulafu, hamonei ware aleꞌei:
“‘Oꞌama,a
fei haramu na apunai
ma fei haparaiamu nei nomai.b
3 Fani hanaa haiꞌou aꞌa hepapalo arewaa.
4 Futoaa ei hafeloꞌaa haiꞌou,
uaa haiꞌouna futoaa hafeloꞌaa ei rona fafeloaa haiꞌou.c
Ma oneiꞌaa faꞌaunuaa haiꞌou aꞌa ei manimania.’”d
5 Ma ina warenaa aꞌa roꞌou, “Nabaa nemea hamuꞌou na paꞌi tafina ma ona dinaa aꞌana poi difaꞌuꞌu ma warenaa aꞌana, ‘Otafi, fanau odumanu faraa pidaua, 6 uaa hemea tafiu noramiana rauaa ma na nomai aꞌau maꞌuaa, lomi na paꞌi duꞌua ba a fania.’
7 “Ma mei laloo humuna i ware, ‘Apuna funiau hamatee na fawidii fei gigei. Ma rona maꞌigudii aꞌau ei naꞌuu. Lomi a asiꞌadiai ba a fanio hepalo manumanu.’ 8 A warefanaa hamuꞌou ba faꞌua hia paꞌaa tafina, maꞌuaa abaa ei i fani hanana uaa ba hia tafina, hamatee siꞌei ba lomi ina nomaꞌaulaoe iꞌigiana, ipowe asiꞌafania tamanu nunumiana.
9 “Siꞌena, a warefanaa hamuꞌou: Iꞌigai ma oꞌaa tonia; labarai ma oꞌaa paꞌia; fabaꞌabaꞌa ma fei gigei i gigi. 10 Uaa hini i iꞌigai, i tonia; hini i labarai, i paꞌia; hini i fabaꞌabaꞌa, i gigi fei gigei aꞌana.
11 “Ena ama, hini hamuꞌou, nabaa mei naꞌumu i iꞌiginio ba fani hananaf nia, o fania hepalo waꞌa? 12 O, nabaa i iꞌigai ba hanana haꞌodu, o fani ua hanana difowai? 13 Faꞌua ba hamuꞌou hafeloꞌa, maꞌuaa, ana hamonaꞌaida fani rawaniꞌa manumanu aꞌa ei naꞌuu hamuꞌou. Ma nabaa aleꞌei, hamonei aida ba mei Amaa hamuꞌou pafea, iwe aloarai fei Spiriti Apuna aꞌa ei rona iꞌiginia!”
Jesus ma Beelzebub
14 Jesus na fawalaꞌanaa hepalo pigea umuloo. Ei i walaꞌaa fei pigea, mei umuloo na wareware ma namina nanawala pudaa fei gupuu ramaꞌa. 15 Maꞌuaa hefiꞌa roꞌou, rona ware, “Aꞌa fei faufau Beelzebub,g mei haparaa ei pigea na fawalaꞌanaa ei pigea.” 16 Hefiꞌadiai, ba ro manimania, rona iꞌiginia ba nei famaꞌaiaa roꞌou hepalo hilala i norai pafea.
17 Jesus na apaꞌidigaa ei naranaraa roꞌou ma na warenaa aꞌa roꞌou, “Nabaa ei ramaꞌa wagii hefaa baua gufuu hapara ro fifalagii, fei gufu fei i fagiana. Ma ei ramaꞌaa hepalo humu, nabaa lomi rona firawanii, fei humu fei, i pasilogu. 18 Nabaa Satan na figitataa anaia, batanai ba fei haparaiana i udemai? Una ware aleꞌei uaa hamona ware ba una fawalaꞌanaa ei pigea aꞌa fei faufau Beelzebub. 19 Nabaa faꞌua ba una fawalaꞌanaa ei pigea aꞌa fei faufau Belzebub, ei rona neneraa hamuꞌou, rona fawalaꞌanaa ei aꞌa fei faufau hini? Ma siꞌei ana ei neneraa hamuꞌou, roꞌawe wareia ba afaia faꞌua. 20 Maꞌuaa nabaa una fawalaꞌanaa ei pigea aꞌa fei faufau mei Haidaa, fei haparaiaa mei Haidaa na nodigimai aꞌa hamuꞌou.
21 “Nabaa mei faufau ramaꞌa, mei na omaꞌaa fei humuna na paꞌipedu waduna, ei manumanu laloo humuna i udefarawani ua. 22 Maꞌuaa nabaa hemea na faufaudiai aꞌana, i panarofaa mei amaa fei humu, fugoinia ma tarafaa ei wadu, ei na nara mei amaa fei humu ba i hadupaꞌia, te, hemei na faufaudiai, i fiꞌalaginaa ei manumanu aꞌa ei tafina.
23 “Mei lomi na oa aꞌau na ofadugau ma hini lomi na hadumau fawaduꞌainaa ei sipsipi, ina fabaꞌautorainaa roꞌou.
Fei Hadiweꞌiaa fei Spiriti Hafelo
24 “Ei na walaꞌaa aꞌa hemea hepalo hafeloꞌah spiriti, i talainaa fawelei lomi ramaꞌa ma labarai gutafaweniana, maꞌuaa lomi iwe labagipaꞌia. Hee, i powe naranara, ‘Unei hadiweꞌainaa fei humu una faꞌaa wagina.’ 25 Ma i hadiweꞌailao, na fanunupaꞌaa fei humu ba na rodii ma ei manumanu na udelafui. 26 Ma siꞌei na dugamii olorompalodiai hafeloꞌa spiriti, hafeloꞌaa roꞌou na muainia ma rona waduꞌaiguta yei. Ma laloo iaa mei, nawemina hafelo apoidiai.”
27 Ei fi warewareaa fei Jesus, hemea pifine dupuaa ei ramaꞌa, na haroharo, “Hawegia aꞌa mei pifine, mei i waninio ma fagipeio.”
28 Ina ware, “Hiꞌi, maꞌuaa bauanadiai fei hawegia aꞌa ei rona guainaa fei wareaa mei Haidaa ma nenegia.”
Fei Hilalaa Jonah
29 Ei fimina wataudalao fei gupuu ramaꞌa, Jesus na ware, “Ei ramaꞌa aꞌa feni au feni, ronamina hafelo. Rona iꞌigai ba unei famaꞌaa roꞌou hepalo hilalaa foigia noranarai pafea maꞌuaa, lomi a famaꞌaa hepalo, ana fei hilalaa Jonah ua. 30 Jonah, hia aleꞌei hilala aꞌa ei Nineveh. Ana aleꞌei ba mei Naꞌuu Ramaꞌa, hia hilala aꞌa feni tawe feni. 31 Aꞌa fei au dududua, mei Hapara Pifine, mei noramiana haraꞌuu, iwe asiꞌafipui aꞌa ei ramaꞌaa feni au feni ma ware ba rona tata, uaa namina diꞌininaa gufuna i susuweꞌi ba i guainaa fei apaꞌaa Solomon maꞌuaa hemeai na muainaa Solomon, hia yeni eni. 32 Aꞌa fei au dududua, ei Nineveh rowe asiꞌafipui aꞌa ei ramaꞌaa feni au eꞌeni ma ware ba rona tata. Uaa rona filoginaa naranaraa roꞌou aꞌa fei uꞌugaa Jonah, maꞌuaa hemea na muainaa Jonah, hia yeni eni.
Fei Weꞌai fei Unu
33 “Lomi hemea i faguꞌaa fei weꞌai ba i auꞌopaꞌainia haroo hepalo hagi. Maꞌuaa i augia aꞌa fei udeꞌudena ba ei rona nomai roꞌaa fanunupaꞌaa fei weꞌai. 34 Fei pudamu aleꞌei weꞌai unumu. Nabaa na rawani pudamu, minaa fei unumu, ana i weꞌapedu. Maꞌuaa, nabaa na hafelo pudamu, ana i rorobadubadu unumu. 35 Omaꞌamaꞌa ba fei weꞌai laloo iamu lomi na roromapaꞌai. 36 Siꞌei, nabaa minaa fei unumu na weꞌapedu ma lomi maꞌida dufuu roromaa, imina weꞌafaꞌarai, ana aleꞌei weꞌaa fei ramai na weꞌainio.”
Oloroa Warea Fagianaa
37 I waredii Jesus, hemea Pharisee na ware aꞌana ba laguꞌaa hananafipui; siꞌei, ina waduꞌai ma fapalagi ditataa fei tawa. 38 Maꞌuaa mei Pharisee na baꞌarofo i fanunuia ba Jesus, lomi nadoꞌo huwe ma na hanana ua.
39 Ma mei Fasu na warenaa aꞌana, “Hamuꞌou ena Pharisee, hamona fesuꞌuaiaa auguu fei bara ma fei lopi, maꞌuaa laloo iaa hamuꞌou, namina pepesu ei bagito ma hafeloꞌa. 40 Hamuꞌou poapoa ramaꞌa! Haa! Abaa mei i bigiꞌaa fei augu ana mei i bigiꞌaa fei lalona? 41 Maꞌuaa hamonei fanaa ei lomi rona paꞌi tamanu na ude laloo fei lopi,j ma minaa ei manumanu i fafaꞌarai aꞌamu.
42 “Hamona fagiana hamuꞌou ena Pharisee, uaa hamona fanaa mei Haidaa hepalo aꞌa hefua mint, rue ma minaa ei mau manumanu peꞌihapee hamuꞌou, maꞌuaa hamona madiꞌinaa fei na wanewane ma fei haguaa mei Haidaa. Hamonei bigiꞌaa guapaloeni ma ana hamonei fani fanaa hamuꞌou.
43 “Hamona fagiana hamuꞌou ena Pharisee, uaa hamona nunuminaa ei gutanaa ei baua ramaꞌa laloo fei synagogue ma ba ronei famafufuoi ma fanunuꞌapaꞌaa hamuꞌou yei fawelei ronaꞌo alo manumanu ei ramaꞌa.
44 “Hamona fagiana hamuꞌou, uaa tawiꞌaa hamuꞌou aleꞌei fei huapu loꞌe lalana, fei lomi rona apaꞌia ramaꞌa ma rona tatalai pafona.”
45 Hemea na paꞌi baua apaꞌana aꞌa fei law na warenaa aꞌana, “Feroia, ena ona wareaa ena manumanu ena, ana oi warefafeloaa haiꞌou.”
46 Jesus na ware, “Ma hamuꞌou ena na paꞌi baua apaꞌa aꞌa fei law, hamona fagiana anaa, uaa hamona fani rarabaa ei ramaꞌa, ei namina rataiaa roꞌou ma ana lomi hamona fani maꞌida pani aꞌa roꞌodu.
47 “Hamona fagiana, uaa hamona fadufani humuu maꞌeaa ei mamamaꞌa, maꞌuaa ana ena upuu hamuꞌou, ena rona foꞌafamaꞌeaa roꞌodu. 48 Ma hamona ware ba na rawani fei bigiꞌaa ei upuu hamuꞌou; fei foꞌafamaꞌeaa roꞌou ei mamamaꞌa ma hamona faduaa ei humuu roꞌou, humuu maꞌea. 49 Aꞌa fei, mei Haidaa wagii fei apaꞌana na ware, ‘A aloawii ei mamamaꞌa ma apostle aꞌa roꞌou. Hefiꞌa roꞌaa foꞌafamaꞌeaa roꞌou ma hefiꞌadiai roꞌaa haperararaiaa roꞌou.’ 50 Siꞌei, i udenaa aꞌa eni ramaꞌaa feni au feni fei namoo minaa ei mamamaꞌa, fei wigianamai aꞌa fei mamaraiamii feni ano nopaꞌamii wagieni. 51 I aꞌa fei namoo Abel dinamii aꞌa fei namoo Zechariah, mei rona foꞌafamaꞌeia watolaa fei tawahafi na apunai ma fei humuu mei Haidaa. Hiꞌi, a warefanaa hamuꞌodu ba ei ramaꞌaa feni au feni roꞌaa tonaa fagianaa wagii minaa eꞌei.
52 “Hamona fagiana, ena hamona paꞌi baua apaꞌa aꞌa fei law, uaa hamona opaꞌainaa fei gigigii fei apaꞌa. Lomi hamona waduꞌai ma hamona lawaraa ei ba roꞌaa waduꞌai anaa.”