Mei Ramaꞌa na Maꞌe Hepapa Panina
3
Hefaranidiai Jesus na waduꞌainaa fei synagogue ma na paꞌi hemea na maꞌe hepapa panina. 2 Hefiꞌa ei roꞌeifane lalabaginaa ei tataa Jesus, roꞌou yei. Ronamina pupudainaa Jesus, ba i farawaninia laloo fei Sabbath, o? 3 Jesus na warenaa aꞌa mei ramaꞌa, “Mi ufalarai i maꞌaa roꞌou.”4 Ma na iꞌiginaa ei ramaꞌa Jesus ba, “Fei law na ware ba tamanu na rawani aꞌa fei Sabbath? Fei ba o bigiꞌaa ei rawaniꞌa, o ei hafeloꞌa? Ba o hadumaa ramaꞌa, o fafeloaa ramaꞌa?” Maꞌuaa lomi ronaꞌu ware.
5 I fanunuaa ei maumau roꞌou aleꞌei Jesus, namina sibafafelo maꞌuaa ana namina faloloaꞌinaa roꞌodu, uatani, namina waiwai tabaa roꞌodu ma ana ronamina tata. Siꞌei na warenaa aꞌa mei ramaꞌa, “Roainamai panimu.” Na roainaa panina mei ramaꞌa ma fei panina na rawanidiai. 6 I dii, ei Pharisee, rona asiꞌaa aꞌa fei synagogue ma re gutafipui aꞌa ei maroaa Herod ma pagipagiaa hefiꞌa tala ba roꞌaa foꞌafamaꞌeaa Jesus.
Ei Gupuu Ramaꞌa, Rona Neneraa Jesus
7 Jesus ma ei otalai nenerana, rona aununaa agi. Ma hefaa baua gupuu ramaꞌa, noramiaa roꞌou Galilee, rona talaineneraa Jesus. 8 Roꞌaa guainaa minaa ei bigiꞌaa Jesus, rona nomai aꞌana. Gufuu hefiꞌa, Judea, Jerusalem ma Idumea; ma gufuu hefiꞌa, yei pepei anaa halo i Jordan ma hefiꞌa, fawelei Tyre ma Sidon. Minaa eni ramaꞌa eni, rona nomai aꞌa Jesus, uatani ronamina guainaa tamanu ina bigiꞌia. 9 Ei ramaꞌa, ronamina watauda. Siꞌei ba namina rata fei gupuu ramaꞌa, ina ware aꞌa ei otalai nenerana ba ronei rapuꞌaugamiaa hepalo wa, ba roneiꞌaa puroroinia ei ramaꞌa. 10 Uaa namina farawanidigaa watauda ramaꞌa aꞌa ei funuaa roꞌodu. Ei funua, roꞌei nigo talaa roꞌodu ba roꞌaa dinaa aꞌa Jesus ma idoia. 11 Ei ronaꞌo fanunupaꞌaa Jesus ei spiriti hafelo,a ronaꞌo fapasinaa pu i maꞌana ma aiharoharo, “Yoi, mena Naꞌuu mei Haidaa.” 12 Maꞌuaa Jesus na warefaweꞌi aꞌa ei spiriti hafelo ba apuna warefanaa nemea ba hia hini.
Fei Rafeiana ei Hefua ma Helagui Apostle
13 Jesus na dinaa papaa hepalo maugeni ma harofaa ei nunumiana ma rona dinaa aꞌana. 14 Ina rafeinaa hefua ma helagui—ma roroinaa roꞌodu apostleb — ba ronei oafipui aꞌana. Ma ba i aloaa roꞌodu ba ronei wareaa fei rawaniꞌa warea 15 ma roꞌaa paꞌi faufau ba roꞌaa faꞌasiꞌanaa ei pigea. 16 Siꞌeni, eni rafeiaa Jesus: Simon (Jesus na roroinia Peter); 17 James ma mei lofuna John, laguei naꞌuu Zebedee (Jesus na roroinaa lagua Boanerges, hanuna ba laguei Naꞌuu Parara); 18 Andrew, Philip, Bartholomew, Matthew, Thomas, James mei naꞌuu Alphaeus, Thaddaeus, Simon mei Zealot (hanuna ba na haguaa gufuna), 19 ma Judas Iscariot, mei i aloaa Jesus.
Jesus ma Beelzebub
20 I dii, Jesus na waduꞌainaa hepalo humu ma wataudadiai, rona figupui yei. Siꞌei Jesus ma ei otalai nenerana, loꞌe rona hawia ba roꞌaa hanana. 21 Roꞌaa guainia ei maroana, rona aunu ba roꞌaa dugia, uaa rona ware ba, “Ina poapoai tabana.”
22 Ma ei feroiaa law, ei noramiaa roꞌodu Jerusalem, rona ware ba, “Ina waduꞌia Beelzebub.c Aꞌa fei faufau mei fafasui ei pigea, inafane faꞌasiꞌanaa ei pigea.”
23 Siꞌei na harofaa roꞌodu Jesus ma warehanunuinia ba, “Batanai Satan i faꞌasiꞌanaa Satan? 24 Nabaa hepalo gufu i fifalagii, fei gufu fei, loꞌe i ufalarai. 25 Nabaa hepalo humu i fifalagii, fei humu fei, loꞌe i ufalarai. 26 Nabaa Satan na ofadugaa anaia ma hia i fifalagii, lomi i ufalarai ma fei auna na pedudii. 27 Paꞌaa faꞌua, lomi hemea i waduꞌinaa humuu hemea faufau ramaꞌa ma topaꞌainaa ei manumanuna. Ineidoꞌo roroꞌinaa mei faufaua ma hinene iwe topaꞌainaa ei manumanu humuna. 28 Apaꞌaa warefaꞌuai aꞌa hamuꞌodu ba minaa ena hafeloꞌa ma ei rona warefafeloaa mei Haidaa, hia, i futoia. 29 Maꞌuaa hini i warefafeloaa fei Spiriti Apuna, fei hafeloꞌana lomi i futo. Ina bigiꞌaa hefaa hafeloꞌa lomi i pedutoo.”
30 Ina wareaa feni, uaa roimina wareware ba, “Ina taoia hefaa hafeloꞌa spiriti.”
Mei Ina Mawe ei Lofuu Jesus
31 Siꞌei rona nomai, mei inaa Jesus ma ei lofuna. Rona u yei ano ma aloaa hemea ba neiree dugamii Jesus. 32 Watauda ronamina guta hoaninaa Jesus ma warefania ba, “Mei inamu ma ei lofumu, roꞌou i ano ma roi lalabaginio.”
33 Na iꞌigai Jesus ba, “Hini mei inau ma ei lofuu?”