Ei Pifine na Talaihugiaa Jesus
8
Nenee fei, Jesus na tatalai aꞌa hepapalo gufu ma uꞌugaa fei rawaniꞌa wareaa fei haparaiaa mei Haidaa. Ei hefua ma helagui, roꞌou aꞌana 2 ma hefiꞌa pifine anaa, ei ina fawalaꞌanaa ei spiriti hafelo aꞌa roꞌou ma fapedugaa funuaa roꞌou: Mary (hepalo harana Magdalene), mei na walaꞌaa oloromeai pigea aꞌana; 3 Joanna mei haroo Cuza mei omaꞌamaꞌaa humuu Herod; Susanna; ma wataudadiai. Eni pifine eni, rona hadumaa roꞌou ana aꞌa ei paꞌaa manumanuu roꞌou. Fei Warea Hanunuu mei Faroa
4 Roꞌaa figupuimai aꞌa Jesus ei ramaꞌa noramiaa roꞌou aꞌa hepapalo gufu, ina uꞌufanaa roꞌou feni warea hanunu: 5 “Hemea diapodu na aunu ba i faroaa ei lau. I larosiminaa ei lau, hefiꞌa na pasi papaa tala ma rona talaiꞌapuninia ma ei manufidufidu pafea, rona hanaia. 6 Hefiꞌa na pasi pafoo ei mugoo ma i nusu, rona hole ua, uaa lomi ranu. 7 Hefiꞌa lau na pasi dupuaa ei wowoꞌii na hogia, rona nusufipui aꞌa ei wowoꞌii, ei na fifigifamaꞌeaa roꞌou. 8 Maꞌuaa hefiꞌa na pasi aꞌa fei rawaniꞌa piye. Ma namina habefarawani ma ei fuaa roꞌou na onaꞌonaidiai aleꞌei hefa puꞌudiai aꞌa ei faroana lau.”
I waredigaa fei, na warefabauana, “Hini na paꞌi adiana, nei guainia.”
Tani i Warehanunui Jesus
9 Ei otalai nenerana na iꞌiginia fei hanuu fei warea hanunu. 10 Ina ware, “Fei apaꞌa wagii ei manumanu i udeꞌopaꞌai aꞌa fei haparaiaa mei Haidaa, hamona todigia, maꞌuaa, aꞌa hefiꞌa una warehanunuinia, ba,
“‘Rona fafanunu ma lomi roꞌaa fanunupaꞌi;
rona guguai ma lomi roꞌaa apaꞌia.’
Ina Piguaa Hanuu fei Warea Hanunuu mei Faroa
11 “Sifeni, feni hanuu feni warea hanunu: ei lau, aleꞌei fei wareaa mei Haidaa. 12 Ei lau na pasi papaa tala, aleꞌei ei rona guguai ma mei haniꞌu na nomai ma fufusiminaa fei wareaa mei Haidaa aꞌa ei naranaraa roꞌou ba roneiꞌaa narafaweꞌi ma lomi roꞌaa tela. 13 Ei lau na pasi pafoo mugoo, aleꞌei ei ronadoꞌo niꞌeniꞌe ei roꞌaa guainia, maꞌuaa, lomi na gugu waraa roꞌou. Ronadoꞌo narafaweꞌi maꞌida, maꞌuaa, i nomai fei au nueia, rona wataꞌadudu. 14 Ei lau na pasi dupuaa ei wowoꞌii na hogia, aleꞌei ei ronadoꞌo guguai, maꞌuaa, na fifigifatemuaa fei naranaraa roꞌou wagii eni manumanuu feni ano, ei mugoo poꞌi ma ei roꞌoo feni ano, siꞌei lomi rona habepaꞌi. 15 Maꞌuaa ei lau na pasi aꞌa fei rawaniꞌa piye aleꞌei ei na paꞌi rawaniꞌa maumau roꞌou, ei rona guainaa fei warea, panarofia ma ufaweꞌi, siꞌei rona fuaa.
Fei Weꞌai aꞌa fei Udeꞌudena
16 “Lomi hemea ba i faguꞌaa fei weꞌai ma opaꞌainia haroo hepalo hagi, o augia haroo tawa, maꞌuaa, i augia pafoo fei udeꞌudena ba ei rona waduꞌai, ronei fanunupaꞌi aꞌa fei weꞌai. 17 Uaa lomi hepalo manumanu na udeꞌopaꞌai ba i opaꞌaiꞌualao. Ma ei manumanu rona opaꞌainia iwe lelefo ma udeꞌareꞌare. 18 Siꞌei, onei naramaꞌaia ba batanai fei mau guguaiamu. Uaa hini na paꞌi, iwe paꞌi hefiꞌadiai; hini lomi na paꞌi, tamanu fei ina nara ba na paꞌi, iwe paꞌai aꞌana.”
Ei Lofu ma mei Inaa Jesus
19 Ei lofu ma mei inaa Jesus, rona nomai ba roꞌaa maꞌaia, maꞌuaa lomi rona nitopaꞌilao aꞌana uaa fei gupuu ramaꞌa. 20 Hemea na warefania, “Mei inamu ma ei lofumu, rona ufalarai ano ba roꞌaa maꞌa yoi.”
21 Ina ware, “Siꞌeni eni inau ma eni lofuu, eni rona guainaa fei wareaa mei Haidaa ma bigiꞌia.”
Jesus na Famadinoaa fei Lama
22 Heai arewaa, Jesus na warenaa aꞌa ei otalai nenerana, “O dii. Oꞌadinaa fipepei adii fei ranu.” Siꞌei, rona hugi aꞌa fei wa ma sua. 23 Roꞌaa sualao, na maꞌigu Jesus. Fei lalarena na asiꞌaa ma fei lama na tomesunaa laloo fei wa ma ronawemina fagiana.
24 Ei otalai nenerana, rona nolao ma funia. Rona ware, “Mena Fasu, mena Fasu. Oꞌapaꞌaa wawauꞌu!”
Ina asiꞌaa ma warefaweꞌi aꞌa fei lalare ma fei agi; ina pedu towetana ma namina madino. 25 Ina iꞌiginaa ei otalai nenerana, “Hitani fei weꞌiaa naranaraa hamuꞌou?”
Aꞌa fei maꞌauaa roꞌou ma fei nanawalaa pudaa roꞌou, rona fiꞌiꞌigii, “Ramaꞌa bata meni? Te, namina warefaweꞌi aꞌa fei lalarena ma fei lama ma lagunamina guainaa wareana.”
Fei Walaꞌanaa ei Pigea aꞌa Hemea
26 Rona tamanaa suwidei i Gerasene,a opaꞌaloo fei ranu Galilee. 27 I wanomai Jesus, na nomai aꞌana hemea ramaꞌaa fei gufu, mei na waduꞌia pigea. Namina madimai fei gutaꞌalaꞌalana ma lomi na u guta laloo humu, maꞌuaa na guta aꞌa ei huapuu ei maꞌea. 28 I fanunupaꞌaa Jesus, ina aimemewai ma fapasi igoaa Jesus ma harofabauana, “Tamanu nunumiamu aꞌau Jesus mena Naꞌuu mei Haidaa, mei na Pafeai? Uꞌamina iꞌiginio, oneiꞌaa haperaraiau!” 29 Uaa Jesus na warefaweꞌi ba fei hafeloꞌab spiriti nei walaꞌaa aꞌa mei. Uaa, inaꞌaida panarofia. Ma ronaꞌaida roroꞌinaa panina ma pinena aꞌa ei alatai ma hefiꞌa, rona omaꞌamaꞌaia, maꞌuaa, inafane bimoroꞌaa ei alatai ma ei pigea na faponinaa hia fawelei lomi ramaꞌa.
30 Jesus na iꞌiginia, “Hini haramu?”
Ina ware, “Legion,” uaa watauda pigea na waduꞌia. 31 Ma rona iꞌigai ma iꞌigaidiai ba neiꞌaa aloaa roꞌou aꞌa fei walaloa lomi iaꞌiana.
32 Hepalo baua gupuu moimoi roi hanana papaa fei maugeni. Ei pigea na iꞌigifaweꞌi aꞌa Jesus ba nei uga ba roꞌaa waduꞌaa ei moimoi ma ina ugainaa roꞌou. 33 Ro walaꞌamai aꞌa mei ramaꞌa ei pigea, rona waduꞌaa ei moimoi ma poniꞌupulao pepei na faroꞌai adii fei ranu, rofonaa lalona ma wawaꞌumaꞌe.
34 Ro fanunuia aleꞌei ei omaꞌamaꞌaa ei moimoi, rona ponibagua ma uꞌugia yei aꞌa fei baua gufu mawe ei gufu sugatataꞌaia. 35 Ma ei ramaꞌa na nolao ba roꞌaa maꞌa tamanu ina bigiꞌia. Roꞌaa nopaꞌaloo Jesus, rona fanunupaꞌaa mei na walaꞌaa ei pigea aꞌana, na guta igoaa Jesus, na paꞌi lawalawana ma fei naranarana na rawani ma rona maꞌau. 36 Ei rona fanunupaꞌia, rona uꞌufanaa ei ramaꞌaa gufu batanai i rawanidiai mei na waduꞌia pigea. 37 Ma minaa ei ramaꞌa fawelei Gadara na iꞌiginaa Jesus ba nei faꞌadiꞌininaa roꞌou, uaa ronamina maꞌaufafelo. Siꞌei, ina hugi aꞌa fei wa ma suaꞌaunu.
38 Mei ramaꞌa, mei na walaꞌaa ei pigea aꞌana na iꞌiginia ba i nogia, maꞌuaa Jesus na aloia ma ware, 39 “Hadiweꞌinaa gufumu ma uꞌugaa fei baua bigiꞌaa mei Haidaa aꞌamu.” Siꞌei, na hadiweꞌai ma uꞌufanaa minaa ei ramaꞌaa gufu ei baua bigiꞌaa Jesus aꞌana.
Mei Nanao Maꞌea ma Mei Pifine na Funu
40 I hadiweꞌimai Jesus, fei gupuu ramaꞌa na taufaꞌugia, uaa rona aida ba i nomai. 41 Ma hemea, harana Jairus, hemea bauaniaa fei synagogue na nomai ma fapasi igoaa Jesus ma iꞌigifaweꞌi aꞌana ba nei nomai aꞌa fei humuna 42 uaa mei naꞌuna, baduu pifine, aleꞌei hefua ma heguai igisimasina, ifi maꞌe.
Fi talailao Jesus, ei ramaꞌa na fihoroi aꞌana. 43 Ma na paꞌi hemea pifine yei na tomesumesu namoo ununa aleꞌei hefua ma heguai igisimasi,c maꞌuaa lomi hemea ba i fapedupaꞌaa funuana. 44 Na aunumai mugina ma idoaa supuu fei hawaa uguna. Ma ana ei, na pedu fei tomesuaa fei namo.
45 Jesus na iꞌigai, “Hini na idoau?”
Minaa roꞌou, rona ware ba lomi ma nawe ware Peter, “Mena Fasu, ei ramaꞌa rona fihoroi aꞌamu.”
46 Maꞌuaa Jesus na ware, “Na paꞌi hemea na idoau. Una aida ba na tonaa maꞌida faufau.”
47 Ma mei pifine nawe aida ba roꞌaa apaꞌia ba hia, siꞌei na nomaꞌaumai ma fapasi igoana. I pudaa minaa ei ramaꞌa, na warefanaa roꞌou ba na pedu funuana ana ei i idoia. 48 Ma ina warenaa aꞌana, “Mena naꞌuu, fei weꞌiaa naranaramu na farawaninio. Aunufaꞌaꞌa ua.”
49 Ana fi wareware ua Jesus, na nomai hemea noramiana humuu Jairus, mei bauaniaa fei synagogue. Ma na ware, “Mei naꞌumu na maꞌe. Oneiꞌaa fahaudinaa unuu mei feroia.”
50 I guainaa fei Jesus, na warenaa aꞌa Jairus, “Oneiꞌaa maꞌau, narafaweꞌi ua ma iwe mamaꞌa.”
51 I nopaꞌaloo fei humuu Jairus, na ware ba lomi hemea i waduꞌai uniaa roꞌou Peter, John, James mawe laguei ama ma inaa mei baduu. 52 Ma aꞌa fei, minaa ei ramaꞌa rona aiꞌai ma wawasusu aꞌana. Jesus na ware, “Hamoneiꞌaa aiꞌai. Lomi na maꞌe. Na maꞌigu ua.”
53 Rona fadinia uaa rona aida ba ina maꞌe. 54 Maꞌuaa ina tauaa panina ma ware, “Mena naꞌuu, asiꞌaa!” 55 Fei spiritina na hadiweꞌimai ma ana ei, ina ufalarai. Ma Jesus na warenaa aꞌa roꞌou ba ronei fani hanaa mei baduu. 56 Ma mei amana ma inana namina nanawala pudaa lagua, maꞌuaa ina warefaweꞌi aꞌa roꞌou ba roneiꞌaa uꞌufanaa nemea tamanu na bigiꞌia.