Fei Farawaniana mei Ramaꞌa na Waduꞌia Pigea
wa Jesus, na dinamii aꞌana hemea ramaꞌa na waduꞌia hefaa spiriti hafelo,b noranamai aꞌa ei huapu. 3 Ma inafane guta i aꞌa ei huapu. Lomi na hawia ba hemea i roroꞌipaꞌia. Ana lomi na hawia ei alatai pidaua. 4 Ronamina boboꞌinaa pinena ma panina wataua au maꞌuaa namina baꞌamoroꞌaa ei alatai pidaua ma ei wao. Paꞌaa lomi hemea ramaꞌa ba i panarofitanipaꞌia. 5 Poi ma arewaa, i dupuaa ei huapu ma ei maugeni, imina aiharoharo ma hawihawiꞌaa ununa aꞌa ei mugoo.
6 I fanunupaꞌaa Jesus rauaa, na ponifaꞌunaa duꞌuna i maꞌana. 7 Namina aiharoharopararai ba, “Tamanu ei nunumiamu aꞌau, Jesus, mena Naꞌuu mei Haidaa, mei napaꞌaa Pafeai? Aꞌa fei haraa mei Haidaa oneipaꞌaa warefaꞌuai ba lomi o fagianainau!” 8 Uatani, Jesus na waredii aꞌana ba, “Walaꞌamai aꞌa mena ramaꞌa mena, yoi, fena spiriti hafelo!”
9 Siꞌei, na iꞌiginia Jesus ba, “Hini haramu?”
Na ware ba, “Harau, Watauda, uaa haiꞌodu watauda.” 10 Ma na iꞌigai watauda aꞌa Jesus ba apuna alofatatalainaa roꞌodu fawelei.
11 Abaa poꞌo maꞌida moimoi roꞌei hanana papaa fei maugeni. 12 Ma ei spiriti hafelo, rona iꞌiginaa Jesus, “Onei alonaa haiꞌodu dupuaa ei moimoi; uga ba haiꞌou waduꞌaa roꞌou.” 13 Siꞌei, Jesus na ugainaa ei hafeloꞌa spiriti ma rona asiꞌadiꞌininaa mei ramaꞌa ma waduꞌinaa ei moimoi. Puduu ei moimoi, aleꞌena heguai pufabaꞌa. Rona poniꞌuꞌupu papaa fei maugeni, pepei imina faroꞌai ma pasinaa laloo fei ranu ma wawauꞌumaꞌe.
14 Ei omaꞌamaꞌaa ei moimoi, rona ponibagua ma warefanaa ei ramaꞌaa gufu ma ei gufu sugatataꞌaia ma ei ramaꞌa, rona aunu ba roꞌaa maꞌa. 15 Roꞌaa nomai aꞌa Jesus, rona fanunupaꞌaa mei na waduꞌia watauda pigea na guta lalawai ma namina rawanidiai; ma ronamina maꞌau. 16 Ei rona fanunuia, rona uꞌufanaa ei ramaꞌa tamanu bigiꞌaa Jesus aꞌa mei i waduꞌia pigea ma ana rona uꞌufanaa roꞌodu tamanu na paꞌaa ei moimoi. 17 Siꞌei, ei ramaꞌa rona iꞌigaifaweꞌi aꞌa Jesus ba inei diꞌininaa fei gufuu roꞌodu.
18 Ma ei ba i hugi pafoo fei wa Jesus, mei ramaꞌa, mei roꞌaa waduꞌia ei pigea, na iꞌiginaa Jesus ba ana i aunuhugia. 19 Lomi na ugainia Jesus, maꞌuaa na ware ba, “Baguanaa gufu ma warefanaa ena gufumu ena bigiꞌaa mei Fasu aꞌamu ma fei faloloaꞌiana yoi.” 20 Siꞌei, mei ramaꞌa mei, na aunu ma uꞌu yei Decapolisc tamanu na bigiꞌia aꞌana Jesus. Ma minaa ei ramaꞌa, rona baꞌarofo.
Mei Nanaoo Maꞌea ma mei Pifine na Funu
21 I hugidiai pafoo wa Jesus ma fatetediai pepei, abaa poꞌo maꞌida ei rona hoaninia piye. 22 Hemea ei bauaniaa fei synagogue, harana Jairus na nomai yei, fanunupaꞌaa Jesus ma fapasi oꞌigoana. 23 Ina iꞌigifininaa minaa ei naranarana aꞌa Jesus ba, “Mei naꞌuu, baduu pifine, anaa i maꞌe. Oneipoꞌo nomai ma augaa fei panimu pafona ba nei pedu fei funuana ma i gutadiai.” 24 Siꞌei, na aunuhugia Jesus.
Abaa poꞌo ramaꞌa, ei roꞌaa nenegia ma puroroinia. 25 Ma hemea pifine yei nafaneꞌo wigiwigii namona, aleꞌena hefua ma heguai igisimasi. 26 Watauda loꞌotaa, rona roinia maꞌuaa, ei fiꞌina na udeꞌualao. Namina pedu ei mugoo poꞌina, maꞌuaa fei funuana lomi na u pedu. Namina apoi ua. 27 I guainaa ei uꞌugaa Jesus aꞌa hefiꞌa, na talaimai nenee Jesus dupuaa ei watauda ramaꞌa ma na idoaa fei hawaa uguu Jesus. 28 Uatani na nara aleꞌei ba, “Nabaa a idoꞌuaiaa fei hawaa uguna, awe rawani.” 29 Ana ei ua, lomi na fai wigiwigidiai fei namona ma na nanamuinia ba nawe pedu fiꞌina.
30 Ana ei ma na nanamuinia Jesus ba maꞌida faufauna na diꞌininia ma na momoꞌai dupuaa ei ramaꞌa ma iꞌigai ba, “Hini na idoaa fei hawaa uguu?”
31 Rona ware ei otalai nenerana, “Ona fanunuia eni watauda ramaꞌa, rona puroroinio. Batanai ei o iꞌigai ba, ‘Hini na idoau?’”
32 Maꞌuaa Jesus fimina fanunula-barainia ba hini na bigiꞌaa fei. 33 Siꞌei, mei pifine na aida ba na hoto fei namo, na nomai ma fapasi i fasuu hunana ma namina maꞌaufunurere ma warefaꞌuai aꞌana. 34 Ina warenaa aꞌana ba, “Mena naꞌuu, fei weꞌiaa naranaramu na farawaninio. Aunufarawani ua. Ona ala aꞌa fena fiꞌiamu.”
35 Ana fi wareware ua Jesus, hefiꞌa noramiaa roꞌou humuu Jairus, mei famamoaa fei synagogue, rona warenaa aꞌa Jairus ba, “Mei naꞌumu baduu pifine na maꞌedii. Tani o faꞌudeguguaa unuu mei feroia?”
36 Na guaiꞌauꞌuaialao ei wareaa roꞌodu Jesus ma na ware aꞌa mei famamoaa fei synagogue, “Apuna maꞌau; onei narafaweꞌi ua.”
37 Lomi na ugainaa hemea ba i nenegia; uniaa Peter ma laguei filofui, James ma John. 38 Ma ei roꞌaa nosufudailao humuu Jairus, mei bauaniaa fei synagogue, Jesus na guaipaꞌaa ei ramaꞌa, ronamina waigi ma aimemewai. 39 Na waduꞌai ma iꞌigainaa roꞌodu ba, “Tani hamomina waigi ma aimemewai? Mei baduu, lomi na maꞌe. Na maꞌigu ua.” 40 Maꞌuaa rona fadinia.
I faꞌasiꞌadigaa ei ramaꞌa, na dugaa mei ama ma inaa mei baduu ma ei otalai nenerana, ei roꞌou aꞌana ma rona waduꞌainaa laloo humu aꞌa mei baduu. 41 Na tauaa panina ma na warenaa aꞌana, “Talitha koum!” (hanuna ba, “Mena baduu pifine, a warenaa aꞌamu, asiꞌaa!”). 42 Ana ei ua, mei baduu na ufalarai ma tatalai (igisimasina, hefua ma heguai). Aꞌa fei, ronamina baꞌarofo. 43 Ina warefaweꞌi aꞌa roꞌodu ba roneiꞌaa warewareaa feni aꞌa nemea ma ronei fani hanaa mei baduu.