Jesus na Fawanewaneaa Mei i Maꞌe Ununa
9
Jesus na hugi pafoo hepalo wa, dinaa pepei ma suafatetenaa yei piye gufuna. 2 Hefiꞌa ramaꞌa, rona notabeamii aꞌana hemea na maꞌe ununa, na haino pafoo fei hafenaa ununa. Iꞌa fanunupaꞌaa fei weꞌiaa naranaraa roꞌou Jesus, na warenaa aꞌa mei na maꞌe ununa, “Guta farawani mena naꞌuu; ena hafeloꞌamu una futoia.”3 Aꞌa fei, hefiꞌa ei feroiaa law ronaꞌu fiwarewarei, “Mei ramaꞌa mei, ina warefafeloaa mei Haidaa!”
4 Jesus na aidadii ei naranaraa roꞌou ma na ware, “Tani hamuꞌou narafafelo? 5 Afaia na maduta: fei ba una ware, ‘Na futo ei hafeloꞌamu,’ o, fei ba, ‘Asiꞌaa ma talai’? 6 Maꞌuaa, siꞌei ba hamonei aida ba mei Naꞌuu Ramaꞌa na paꞌi faufauna yeni malagufu ba i futoaa ei hafeloꞌa...” ina warenaa aꞌa mei na maꞌe ununa ba, “Asiꞌaa, tonaa fei hafenaa unumu ma dinaa humumu.” 7 Ma mei ramaꞌa na asiꞌaa ma aununaa humuna. 8 Fei gupuu ramaꞌa, roꞌaa fanunupaꞌaa fei, ronamina hawainaa poaa roꞌou ma rona uduginaa mei Haidaa, mei i fani faufau aꞌa ei ramaꞌa aleꞌei.
Jesus na Dugaa Matthew
9 Ei i talaidiꞌininaa yei, ina maꞌapaꞌaa hemea ramaꞌa, harana Matthew, hemea otonaa mugoo poꞌii gavaman na guta wagii fei palee fei bigiꞌana. Ina warenaa aꞌana, “Nenerau,” ma Matthew na asiꞌaa ma nenegia.
10 Ei fi hanana i humuu Matthew Jesus, watauda otonaa mugoo poꞌii gavaman mawe ei “ramaꞌa hafelo”, rona nomai ma hananafipui aꞌana ma ei otalai nenerana. 11 Roꞌaa fanunupaꞌaa fei ei Pharisee, rona iꞌiginaa ei otalai nenerana, “Tani i hananafipui aꞌa ei otonaa mugoo poꞌii gavaman mawe ei ‘hafeloꞌa ramaꞌa’ mei feroiaa hamuꞌou?”
12 Iꞌa guainaa fei Jesus, ina ware, “Aꞌa ba ei rona rawani ei rona nunuminaa hemea loꞌotaa uaa ei rona funu. 13 Maꞌuaa nowau ma labarainia ba tamanu hanuu feni: ‘Una nunuminaa faloloaꞌia laraa ei fana.’ Uaa eni a nomai, aꞌa ba uꞌamii dugaa ei wanewanea ramaꞌa, maꞌuaa ei ramaꞌa hafelo.”
Rona Haninaa Jesus aꞌa fei Fabaoa
14 Siꞌei, ei otalai neneraa John, rona nomai ma iꞌiginia, “Tani ipoꞌo biyei ba haiꞌou mawe ei Pharisee, haiꞌouna fabao ma ei otalai neneramu, lomi ronaꞌo fabao?”
15 Na ware Jesus, “Batanai ba ei maroaa mei wawane lalaia, roꞌaa faloloaꞌi ei ifi gutafipui aꞌa roꞌou? Iwe nomai fei au ba mei lalaia, hefiꞌa, rowe dugipaꞌainia aꞌa ei maroana; ma aꞌa fei au fei, roꞌawe fabao.
16 “Lomi hemea i tawiꞌaa hepalo maninii manufau lawalawa aꞌa hepalo watanai lawalawa, uaa fei manufau maninii lawalawa i rapudigeaa fei lawalawa ma fawaraꞌaꞌapoidinia. 17 Ana lomi ba ei ramaꞌa, roꞌaa igiaa ei manufau wine aꞌa ei watanai peꞌii wine. Nabaa roꞌaa bigiꞌia aleꞌei, ei peꞌii wine ei bigiꞌaa roꞌou hudii manulelele i baꞌawaraꞌa, ei wine i wigibeu ma ei peꞌina ana i hafelo. Agia, ronaꞌo igiaa ei manufau wine aꞌa ei manufau peꞌii wine ma minaa lagua, laguꞌaa udefarawani.”
Mei Baduu Pifine na Maꞌe ma Hemea Pifine na Funu
18 Ei ifi wareaa fei, hemea bauaniaa ei Jew na nomai ma faꞌunaa duꞌuna i maꞌana ma na ware, “Mei naꞌuu, baduu pifine, maꞌeana eꞌeni ua. Maꞌuaa mi augaa panimu pafona ma i fawenaidiai.” 19 Jesus mawe ei otalai nenerana, rona asiꞌaa ma nenegia.
20 Ana ei ua, hemea pifine, mei na udewigiwigii namona aleꞌena hefua ma guai igisimasi na nomai nenena ma idoaa fei supuu fei hawaa uguna. 21 Ma ina nara aleꞌei ba, “Nabaa a idoꞌuaiaa fei hawaa uguna, a rawani.”
22 Na diarai Jesus, na maꞌapaꞌia ma na ware, “Gutafarawani, mena naꞌuu. Fei weꞌiaa naranaramu na farawaninio.” Ma ana ei ua, ina rawani mei pifine.
23 Iꞌa waduꞌailao laloo fei humuu mei bauana Jesus ma maꞌapaꞌaa ei rona hugufaa ei flute ma ba fei gupuu ramaꞌa, rona wawaigi, 24 ina ware, “Hamuꞌou aunu. Lomi na maꞌe mei baduu pifine. Na maꞌigu ua.” Maꞌuaa rona fadinia. 25 Ei roꞌaa aunudiginaa ano fei gupuu ramaꞌa, ina waduꞌai, tauaa panii mei baduu pifine ma ina asiꞌaa. 26 Fei uꞌuga fei na talepedunaa minaa ei gufu fawelei.
Jesus na Fawanewaneaa Laguei Pudawerai ma mei Umuloo
27 Ei i talaidiꞌininaa yei, helagui pudawerai, laguna nenegia ma laguna haroharo, “Faloloaꞌinaa haigua, mena Naꞌuu David!”
28 Ei i waduꞌailao laloo humu, laguei pudawerai, laguna nomai aꞌana ma ina iꞌiginaa lagua, “Hamunapaꞌaa nara ba a bigipaꞌia?”
Laguna ware, “Hiꞌi, mena Fasu.”
29 Ina idoaa pudaa lagua ma na ware, “Ana aleꞌei fei weꞌiaa naranaraa hamugua, yau a bigiꞌia” 30 ma laguna fanunupaꞌi. Ma Jesus na warefaweꞌi aꞌa lagua, “Apuna uꞌu aꞌa nemea.” 31 Maꞌuaa laguna aunu ma fatalainaa fei uꞌugana i malalaa fei gufu fei.
32 Ei roi asiꞌalao, hefiꞌa, rona duginamii aꞌa Jesus hemea na waduꞌia pigea ma ana umuloo. 33 Iꞌa fawalaꞌadigaa fei pigea aꞌana, nawe wareware mei umuloo. Namina nanawala pudaa fei gupuu ramaꞌa ma rona ware, “Paꞌaa lomi ba ona fanunupaꞌaa heꞌa manumanu aleꞌeni yeni Israel.”
34 Maꞌuaa rona ware ei Pharisee ba, “Aꞌa fei faufau mei haparaa ei pigea, ina fawalaꞌanaa ei pigea.”
Maꞌida Ua Ramaꞌaa Bigiꞌa
35 Jesus na aunulao aꞌa minaa ei bauanai ma pusuꞌo gufu ma feferoi laloo ei synagogue roꞌou, wareaa fei rawaniꞌa wareaa fei haparaia ma na fapedugaa minaa ei hafeloꞌaa unuu ei ramaꞌa ma minaa ei funua. 36 Iꞌa fanunupaꞌaa ei gupuu ramaꞌa, ina faloloaꞌinaa roꞌou, uaa hefiꞌa, rona fagutafafeloaa roꞌou ma lomi na paꞌi haduma aꞌa roꞌou, aleꞌei ei sipsipi lomi omaꞌamaꞌaa roꞌou. 37 I dii, na warenaa aꞌa ei otalai nenerana ba, “Na weꞌidii ei duꞌua laloo fei peꞌihape maꞌuaa, maꞌida ua ei ramaꞌaa hufuꞌa. 38 Iꞌiginaa mei Fasuu fei peꞌihape ba inei aloaa ei ramaꞌaa bigiꞌa i peꞌihapena.”