Ei Rawarawa Otalai Nenera
5
Heai arewaa, na u adii fei ranuu Gennesareta ma ronamina hoaninia ei ramaꞌa ba roꞌaa guainaa ei wareaa mei Haidaa. 2 Ina fanunupaꞌaa guapaloei wa didipisii dii augaa ei diaꞌagi, ei roi fesuaa ei lepoo roꞌou. 3 Ina hugi aꞌa hepalo wa, fei waa Simon ma iꞌiginia ba nei faraualao maꞌida aꞌa fei didipisii. Ma na gutaferoimai pafoo wa aꞌa ei ramaꞌa.4 I pedudii wareana, na warenaa aꞌa Simon, “Suanaa fawelei na walalo ma siminaa ei lepoo hamuꞌou ba oꞌaa udii nia.”
5 Simon na ware, “Mena Fasu, haiꞌounamina bigifaweꞌi fei poi ma lomi hepalo, maꞌuaa, hamatee ona ware aleꞌei, nadii, a siminaa ei lepo.”
6 Roꞌaa bigiꞌia aleꞌei, rona udiaa watauda nia ma naꞌaa i waraꞌa ei lepoo roꞌou. 7 Ma rona alofamai ei tafii roꞌou aꞌa hepalodiai wa ba ronei nomai mi hadumaa roꞌodu ma rona nomai ma guapaloei wa namina pepesufafelo, anaa roꞌaa lolo.
8 I fanunuaa fei, Simon Peter na fapasi i maꞌaa Jesus. Ma na ware, “Aunufaraua aꞌau mena Fasu; yau paꞌaa hafeloꞌa ramaꞌa!” 9 Uaa hia mawe ei maroana na nanawala pudaa roꞌou aꞌa ei udiaa roꞌou nia. 10 Ma ana na nanawala pudaa James ma John, laguei naꞌuu Zebedee, laguei rarafii Simon.
Ma Jesus na warenaa aꞌa Simon, “Apuna maꞌau. Eꞌeni opowe udilao ramaꞌa.” 11 Siꞌei, rona rapiꞌaunaa piye ei waa roꞌou, diꞌininaa minaa ei manumanuu roꞌou ma nenegia.
Mei na Watawatai
12 I guta aꞌa hepalo gufu Jesus, hemea watawataib na nomai. I fanunupaꞌaa Jesus, na fapasiꞌoꞌoꞌuinaa pu ma ware, “Mena Fasu nabaa o nunuminia, fafafaꞌarainau.”
13 Jesus na roainaa panina ma idoia. Ina ware, “Una nunuminia. Fafaꞌarai!” Ana ei, na mafo ei watawatana.
14 Ma Jesus na warefaweꞌi aꞌana, “Oneiꞌaa warefanaa nemea, maꞌuaa wi famaua aꞌa mei bauaniaa humuu mei Haidaa ma fanaa tamanu Moses na ware ba onei fani nabaa na mafo unumu, aleꞌei famaꞌamaꞌamu aꞌa roꞌou ba ona rawani.”
15 Maꞌuaa fei uꞌugana namina talaidiai. Siꞌei, ei gupuu ramaꞌa, rona nomai ba roꞌaa guainia ma ba nei fapedugaa funuaa roꞌou. 16 Maꞌuaa inaꞌo aununaa yei fawelei lomi ramaꞌa ba i lafulafu.
Jesus na Fawanewaneaa mei na Maꞌe Ununa
17 Heai arewaa ei fi feferoi, rona gutaguainia ei Pharisee ma ei feroiaa law, ei noramiaa roꞌou aꞌa minaa ei gufu i Galilee ma hefiꞌa noramiaa roꞌou, Judea ma Jerusalem. Ma fei faufau mei Fasu na ude i aꞌana ba i fapedugaa ei funua. 18 Na paꞌi hemea na maꞌe ununa. Hefiꞌa wawane, rona notabeiamai pafoo fei hafenaa ununa ba roꞌaa waduꞌainaa fei humu ma fahainopia i maꞌaa Jesus. 19 Siꞌei ba namina watauda ei ramaꞌa, lomi rona labagipaꞌi talaa roꞌou. Rona tafaneꞌuanaa pupuaa fei humu ma faꞌasisiarai pu pafoo fei hafena ununa i dupuaa ei ramaꞌa, i maꞌaa Jesus.
20 Jesus, i fanunupaꞌia ba rona narafaweꞌi, na ware ba, “Otafi, ena hafeloꞌamu na futo.”
21 Ei Pharisee ma ei feroiaa law, rona naranara aleꞌei ba, “Hia hini ba i warefafeloaa mei Haidaa? Hinidiai ba i futoaa ei hafeloꞌa? Mei Haidaa ua.”
22 Jesus na apaꞌidigaa ei naranaraa roꞌou ma na iꞌigai, “Tani hamuꞌou nara aleꞌei laloo iaa hamuꞌodu? 23 Tamanu na maduta—fei wareau ba: ‘Ena hafeloꞌamu na futo,’ o ‘Asiꞌaa ma talai’? 24 Maꞌuaa ba hamonei aida ba mei Naꞌuu Ramaꞌa na paꞌi forafora yeni malagufu ba i futoaa ei hafeloꞌa...” Ina ware aꞌa mei na maꞌe ununa, “A warenawii aꞌamu, asiꞌaa, tonaa fei hafena unumu ma dinaa gufumu.” 25 Ana ei ua, ina ufalarai i maꞌaa roꞌou, tonaa fei hafena ununa, fei na hainona ma dinaa gufuna ma uduginaa mei Haidaa. 26 Namina nanawala pudaa minaa ei ramaꞌa ma rona uduginaa mei Haidaa. Minaa roꞌou na maꞌaiaa fei ma fiwarewarei, “Oꞌouna fanunuaa hefiꞌa manumanu na fananawalaiaa pudaa oꞌou wagieni.”
Na Dugaa Levi
27 Nenee fei, Jesus na asiꞌanaa ano ma fanunupaꞌaa hemea otonaa mugoo poꞌii gavaman, harana Levi, na guta aꞌa fei palena toto mugoo poꞌi. Jesus na warenaa aꞌana, “Nenerau.” 28 Levi na asiꞌadiꞌininaa minaa ei manumanu ma nenegia.
29 I aꞌa fei humuna, Levi na bigiꞌaa hepalo baua hananaa aꞌa Jesus ma hepalo baua gupuu otonaa mugoo poꞌii gavaman ma hefiꞌadiai, rona hananafipui aꞌa lagua. 30 Maꞌuaa ei Pharisee mawe ei feroiaa law, ei ana maroaa ei Pharisee, rona ware watauda aꞌa ei otalai nenerana, “Tani hamuꞌou hanana ma hunufipui aꞌa ei otonaa mugoo poꞌii gavaman ma ei hafeloꞌa ramaꞌa?”
31 Jesus na warefanaa roꞌou, “Abaa ei rona rawani ba ronei paꞌi hemea loꞌotaa, maꞌuaa ei rona funu. 32 Paꞌafii fei noramiau, abaa a lalaꞌaa ei rona wanewane, maꞌuaa ei hafeloꞌa ba ronei filoginaa naranaraa roꞌou.”
Rona Haninaa Jesus wagii fei Fabaoa
33 Rona warenaa aꞌana, “Ei otalai neneraa John, ronaꞌaida fabao ma lafulafu ma ei otalai neneraa ei Pharisee anaa, maꞌuaa ei maroamu rona hanana ma hunu ua.
34 Jesus na ware, “Hamona nunuminia ba ei tafii mei wawane lalaia, ronei fabao ei roi gutafipui aꞌana? 35 Maꞌuaa iwe nomai fei au ba mei wawane lalaia, rowe rapunodugia aꞌa roꞌou ma laloo ei arewaa ei, rowe fabao.”
36 Ina uꞌufanaa roꞌodu feni warea hanunu: “Lomi nemea ba i tonaa fei maninii manufau lawalawa ma tawiꞌia aꞌa fei watanai lawalawa. Nabaa i bigiꞌia aleꞌei, i fawaraꞌaꞌapoinaa fei manufau lawalawa ma fei manufau maninii lawalawa lomi i fipupuduinaa fei watanai. 37 Ma lomi nemea i ipiaa fei manufau wine laloo fei watanai peꞌii wine, fei bigiꞌaa roꞌou hudii manulelele. Nabaa i bigiꞌia aleꞌei, fei manufau wine, i fawaraꞌaiaa fei peꞌi ma fei wine i wigii ma fei watanai peꞌii wine i hafelo. 38 Agia, ei manufau wine, ronei ipinaa fei manufau peꞌi. 39 Ma lomi hemea na hunudigaa fei watanai wine i nunuminaa fei manufau wine, uaa na ware aleꞌei, ‘Fei watanai na muainaa fei manufau.’”