Fei Manimaniaa Jesus
4
I dii, fei Spiriti na noduginaa Jesus fawelei abaa wawawau ramaꞌa ba nei manimania mei haniꞌu. 2 Nenee fei i fabao laloo gunaroa paꞌaniaa arewaa ma poi, ina bao. 3 Mei manimania na nomai aꞌana ma na ware, “Nabaa yoi Naꞌuu mei Haidaa, ware aꞌa eni mugoo ba ronei filoginaa faraa pidaua.”4 Jesus na ware, “Rona neꞌidigia ba: ‘Ei ramaꞌa, lomi roꞌaa gutalao aꞌa ei faraa pidaua ua, maꞌuaa aꞌa minaa ei warea noranamai habaꞌumuu mei Haidaa.’”
5 I dii, mei haniꞌu na noduginaa hia aꞌa fei baua gufu na apunai ma na faꞌufalarainia pafoo fei sidesidee fei humuu mei Haidaa. 6 Ina ware, “Nabaa yoi Naꞌuu mei Haidaa, fapasinaa yoi pu. Uaa rona neꞌidigia:
“‘I ware aꞌa ei aloꞌalona
ba ronei hadumio
ma roꞌaa poronaa yoi pafea aꞌa ei panii roꞌodu
ba nepalo mugoo neiꞌaa biꞌaꞌainaa pinemu.’”
7 Jesus na warenaa aꞌana, “Ana na neꞌidii: ‘Apuna manimaniaa mei Fasu, mei Haidaniamu.’”
8 I didiai, mei haniꞌu na noduginaa hia aꞌa hepalo tarea maugeni ma famaꞌaia minaa ei gufuu ei hapara aꞌa feni ano ma ei fananamaiaa roꞌou. 9 Ina ware, “Minaa eꞌeni a fanio nabaa o faꞌunaa duꞌumu ma losuinau.”
10 Jesus na warefania, “Faraua aꞌau, Satan! Uaa na neꞌidii ba ‘Losuinaa mei Fasu, mei Haidaniamu ma biginenegiꞌuaia.’”
11 I dii, mei haniꞌu na diꞌininia ma ei aloꞌalo, rona nomai aꞌana ma hadumia.
Jesus fipowe Faꞌunaꞌanaa fei Uꞌuga
12 Iꞌa guainia Jesus ba rona aunaa John humuu boboꞌaia, na hadiweꞌinaa Galilee. 13 Na diꞌininaa Nazareth ma aunu, reguta Capernaum, yei papaa fei ranu fawelei Zebulun ma Naphtali— 14 ba i fafaꞌuainaa ei idii wareia mei mamamaꞌa Isaiah:
15 “Fei malalaa Zebulun ma fei malalaa Naphtali,
fei tala dinaa agi i papaa Jordan
ma fei gufu Galilee, fei gufuu ei Gentile—
16 ei ramaꞌa rona guta laloo fei roromaa,
rona fanunupaꞌaa hepalo baua weꞌai;
ma aꞌa ei rona guta i malalaa fei hanunuu fei maꞌea,
fei weꞌai na arewa.”
17 Aꞌa fei au fei ma nolao, Jesus nawe uꞌuꞌu, “Filoginaa naranaraa hamuꞌou, uaa fei haparaiaa mei Haidaa na rafiꞌi.”
Fei Harofana ei Rawarawa Otalai Nenera
18 Ei fi talailao piyee Agii Galilee, Jesus na fanunupaꞌaa laguei filofui, Simon, mei rona roroinia Peter ma mei lofuna Andrew. Laguꞌei sumai lepo laloo fei agi, uaa lagua diaꞌagi. 19 Na ware Jesus, “Nomai. Nenerau ma a feroinaa hamugua tonaa ramaꞌa aleꞌei hamunaꞌo to nia.” 20 Ana ei ua, lagunadii augaa ei lepoo lagua ma nenegia.
21 Iꞌa nodilao, na fanunupaꞌaa helaguidiai filofui, James ma John. Lagua, naꞌuu Zebedee. Lagua laloo fei wa aꞌa mei amaa lagua Zebedee ma laguꞌei hinuꞌaa ei lepoo lagua. Jesus na harofaa lagua 22 ma ana ei ua, laguna diꞌininaa fei wa mawe mei amaa lagua ma nenegia.
Jesus na Farawaninaa ei Funua
23 Jesus na tatalai yei Galilee ma feroi laloo ei synagogue roꞌou, na uꞌugaa fei rawaniꞌa warea wagii fei haparaia ma na fapedugaa minaa ei mau funua ma ei hafeloꞌaa unuu ei ramaꞌa. 24 Fei uꞌugana namina talaipedunaa Syria ma ei ramaꞌa, rona duginamii aꞌana minaa ei rona funu aꞌa watauda mau funua, ei naminapaꞌaa fiꞌi unuu roꞌou, ei rona waduꞌaa roꞌou ei pigea, ei ronaꞌo memeroi mawe ei na maꞌe unuu roꞌou ma ina farawaninaa roꞌou. 25 Hefiꞌa baua gupuu ramaꞌa, noramiaa roꞌou, Galilee, Decapolis,a Jerusalem, Judea ma ei gufu fipepei Jordan, rona nenegia.