John, mei Pudugufaia i Raꞌaꞌaugaa fei Tala
3
Aꞌa ei arewaa ei, John, mei Pudugufaia na nomai ma na uꞌu yei Judea fawelei abaa wawawau ramaꞌa 2 ma na ware, “Filoginaa naranaraa hamuꞌou, uaa fei haparaiaa mei Haidaa na rafiꞌi.” 3 Simeni, meni idii wareia mei mamamaꞌa Isaiah: “Fei lao hemea i haroharomai fawelei abaa wawawau ramaꞌa,
‘Raꞌaꞌaugaa fei talaa mei Fasu,
fawanewaneaa ei talana.’”
4 Fei susuu John, bigiꞌaa roꞌou hugoo camel ma fei adii walana, hudii manulelele. Ei hanana, teraupu ma musilao podu. 5 Ei ramaꞌa noramiaa roꞌodu Jerusalem ma minaa ei gufu i Judea ma fawelei Jordan, rona dinaa aꞌana. 6 Rona warefania ei hafeloꞌaa roꞌodu ma ina pudugufinaa roꞌodu laloo fei Ranu Jordan.
7 Maꞌuaa iꞌa fanunupaꞌaa watauda Pharisee ma Sadducee ba rona nomai fawelei ifi pudugufainaa ei ramaꞌa, ina warefanaa roꞌou, “Hamuꞌou ena naꞌuu waꞌawaꞌa! Hini mei i warefaꞌaiaa hamuꞌou ba hamonei ponipaꞌai aꞌa fei au sibaa, fei ba i nomai? 8 Ei maumau hamuꞌou nei famaꞌaia ba hamona filogidigaa naranaraa hamuꞌou. 9 Apuna naranara aleꞌei ba ‘amaa haiꞌou, Abraham.’ Uꞌei warefanaa hamuꞌodu ba mei Haidaa na hawia ba i faꞌasiꞌafani naꞌuu Abraham aꞌa ei mugoo. 10 Fei poa na udedii wagii ei waraa ei haihai ma tamanu haihai lomi na fuafarawani, i reresuminaa hafi.
11 “A pudugufinaa hamuꞌou ranua wagii fei filogiaa naranara. Maꞌuaa neneu, iwe nomai hemea na faufaudiai laraa yau ma yau ana lomi na rawani ba a talaitonaa ei hafenaa pinena. I pudugufinaa hamuꞌou Spiriti Apuna fininaa hafi. 12 Fei nuenueina na udedii i panina ba i famamaꞌaa fei eꞌeaa nuenueina ma i tolafuiꞌaugaa ei wheat laloo fei udeꞌudee roꞌou ma ei meme, i siminaa fei hafi lomi i peretoo.”
Fei Pudugufaiaa Jesus
13 Jesus noranamai Galilee ma na dinaa yei Jordan ba nei pudugufinia John. 14 Maꞌuaa John ba i pauninia ma na ware, “Yoi nei pudugufinau. Tani o nomai aꞌau?”
15 Jesus na ware, “Agunei bigiꞌia aleꞌeni eꞌeni. Ina wanewane ba agua bigiꞌaa feni ba i fafaꞌuainaa ei diwareꞌaugaa mei Haidaa.” Ma siꞌei, John na ugainia.