Fei Noramiaa ei Anoꞌano
2
Aꞌa fei au haparaiaa Herod, Jesus na wanini yei Bethlehem fawelei Judea. Nenee fei waniniana, ei anoꞌano,a noramiaa roꞌou pepei anaa halo, rona nomai Jerusalem 2 ma iꞌigai, “Amaia mei ina wanini ba haparaa ei Jew? Haiꞌouna fanunupaꞌaa fei piꞌuna pepei anaa halob ma ba haiꞌou losuinia.”3 Iꞌa guainaa fei mei hapara Herod, hia ma minaa ei ramaꞌaa Jerusalem, ronamina naranara watauda. 4 Iꞌa harofigupuinaa minaa ei famamoaa humuu mei Haidaa mawe ei feroiaa law, na iꞌiginaa roꞌodu ba i wanini hitani mei Christ.c 5 Rona ware, “Yei Bethlehem, i fawelei Judea, uaa sifeni, feni neꞌiaa mei mamamaꞌa:
6 “‘Maꞌuaa yoi, Bethlehem, yena malalaa Judea,
faꞌua ba onamina pusuꞌoroi maꞌuaa, ana ona bauana aꞌa ei bauaniaa Judah;
uaa, i aꞌamu iwe nomai hemea hapara
ma i omaꞌaa ei maroau, ramaꞌaa Israel aleꞌei hemea omaꞌaa ei sipsipi.’”
7 Siꞌei, Herod na haroꞌuꞌugainaa ei anoꞌano ma iꞌigifagiginaa roꞌou fei paꞌaa au roꞌaa fanunupaꞌaa fei piꞌu. 8 Ma ina ware, “Hamonei aunu ma labagifarawaninaa mei baduu. Hamona labagipaꞌia, mi warefanau ma ana uꞌaree losuinia.” Ma ina alonaa roꞌou yei Bethlehem.
9 Roꞌaa guaidigaa wareaa mei hapara, rona aunulao ma fei piꞌu, fei fanunupaꞌaa roꞌou pepei anaa halo,d na nolao i maꞌaa roꞌou ma noꞌulao fawelei i wagina mei baduu. 10 Roꞌaa fanunupaꞌaa fei piꞌu, ronamina niꞌeniꞌe. 11 Roꞌaa nopaꞌaloo fei humu, rona maꞌapaꞌaa mei baduu mawe mei inana Mary ma rona faꞌunaa duꞌuu roꞌou ma losuinia. Siꞌei, rona gigiaa ei pa roꞌou ma fania ei fanaa roꞌou—ei gold ma ei manumanu dufaa ma hefiꞌadiai ranuu ei haihai na dufa. 12 Ma siꞌei ba rona apaꞌidigia laloo ei mefii roꞌou ba roneiꞌaa hadiweꞌainaa aꞌa Herod, rona tonaa hepalodiai tala ma hadiweꞌidinaa gufuu roꞌou.
Ponipaꞌainaa Egypt
13 Roꞌaa aunudii, hemea aloꞌaloo mei Fasu na faꞌarewa aꞌa Joseph laloo fei mefi. Ina ware, “Asiꞌadugaa mei baduu mawe mei inana ma ponipaꞌainaa Egypt. Guta yena hawina na warefaꞌaio, uaa Herod fi labaginaa mei baduu ba i foꞌafamaꞌeia.”
14 Siꞌei, i nopoilao Joseph na asiꞌadugaa mei baduu ma mei inana ma rona aununaa Egypt 15 ma ina guta yei nopaꞌaloo fei maꞌeaa Herod. Ma siꞌei, napaꞌaa faꞌuai tamanu inadii wareia mei Fasu aꞌa mei mamamaꞌa: “Una harofaꞌasiꞌanamii mei naꞌuu, baduu wawane, yei Egypt.”
16 Iꞌa narapaꞌia Herod ba rona sifiꞌia ei anoꞌano, namina sibafafelo ma na faniwarea ba ronei foꞌafamaꞌeaa minaa ei baduu wawane yei Bethlehem ma yei aꞌa ei gufu i malalana, ei rona paꞌi guai igisimasi mawe ei rotaa paꞌi guai igisimasi, aleꞌei fei au i guainia aꞌa ei anoꞌano. 17 Siꞌei ba ei wareaa mamamaꞌa Jeremiah napaꞌaa faꞌuai:
18 “Rona guainaa hepalo lao yei Ramah,
aiꞌaiga ma baua faloloaꞌia,
Rachel na aigaa ei naꞌuna;
ma lomi na nunuminaa nemea ba i faloloaꞌinia,
uaa lomi rona oadiai.”
Rona Hadiweꞌidinaa Nazareth
19 I maꞌedii Herod, hemea aloꞌaloo mei Fasu na faꞌarewa aꞌa Joseph laloo fei mefi yei Egypt 20 ma na warenaa aꞌana, “Asiꞌaa, dugaa mei baduu mawe mei inana ma dinaa fei gufu Israel, uaa ei ba roꞌaa foꞌafamaꞌeaa mei baduu, rona maꞌedii.”
21 Siꞌei, na asiꞌaa, dugaa mei baduu mawe mei inana ma rona dinaa fei gufu Israel. 22 Maꞌuaa iꞌa guainia ba Archelaus na tonaa fei haparaiaa mei amana Herod yei Judea, ina maꞌau ba i dinaa yei. Siꞌei ba laloo fei mefina na tonaa hefaa warefaꞌaia, na momoꞌainaa Galilee 23 ma naree guta laloo hefaa gufu, harana Nazareth. Siꞌei, nawe paꞌaa faꞌuai ei wareaa ei mamamaꞌa: “Roꞌawe ware ba hia, hemea Nazareth.”