MATTHEW
Fei Wawapugee Jesus
1
Fei waꞌafaꞌaiaa minaa fei wawapuge i nomai wagina Jesus Christ, mei pai David, mei pai Abraham:2 Abraham na fuainaa Isaac, mei amaa Jacob.
Jacob na fuainaa Judah mawe ei lofuna,
3 Judah na fuainaa Perez ma Zerah. Inaa lagua, Tamar.
Perez na fuainaa Hezron, mei amaa Ram.
4 Ram na fuainaa Amminadab.
Amminadab na fuainaa Nahshon.
Nahshon na fuainaa Salmon.
5 Salmon na fuainaa Boaz ma mei inaa Boaz, Rahab.
Boaz na fuainaa Obed ma mei inaa Obed, Ruth.
Obed na fuainaa Jesse
6 ma Jesse na fuainaa mei hapara David.
David na fuainaa Solomon. Mei inaa Solomon, hia doꞌo haroo Uriah.
7 Solomon na fuainaa Rehoboam.
Rehoboam na fuainaa Abijah.
Abijah na fuainaa Asa.
8 Asa na fuainaa Jehoshaphat.
Jehoshaphat na fuainaa Jehoram.
Jehoram na fuainaa Uzziah.
9 Uzziah na fuainaa Jotham.
Jotham na fuainaa Ahaz.
Ahaz na fuainaa Hezekiah.
10 Hezekiah na fuainaa Manasseh.
Manasseh na fuainaa Amon.
Amon na fuainaa Josiah.
11 Ma Josiah na fuainaa Jeconiaha mawe ei lofuna aꞌa fei au rona suganaa roꞌou Babylon.
12 Nenee fei roꞌaa suganaa roꞌou Babylon:
Jeconiah na fuainaa Shealtiel.
Shealtiel na fuainaa Zerubbabel.
13 Zerubbabel na fuainaa Abiud.
Abiud na fuainaa Eliakim.
Eliakim na fuainaa Azor.
14 Azor na fuainaa Zadok.
Zadok na fuainaa Akim.
Akim na fuainaa Eliud.
15 Eliud na fuainaa Eleazar.
Eleazar na fuainaa Matthan.
Matthan na fuainaa Jacob.
16 Ma Jacob na fuainaa Joseph mei haroo Mary, mei i wanininaa Jesus, mei rona roroinia Christ.
17 Siꞌei, puduu ei tawe watolaa Abraham ma David, hefua ma obao. Ina paꞌi hefua ma obao watolaa David ma fei ba hefiꞌa na suganaa roꞌou Babylon ma hefua ma obao watolaa fei gutaa roꞌou i Babylon ma fei waniniaa mei Christ.b
Fei Waniniaa Jesus Christ
18 Fei waniniaa Jesus Christ na nomai aleꞌei: mei inana Mary na tamaꞌaiꞌau ba i lalainaa Joseph, maꞌuaa ana lagutawe hainofipui ma na paꞌidii iana aꞌa fei Spiriti Apuna. 19 Siꞌei ba mei harona, Joseph, hia hemea wanewane ramaꞌa, lomi na nunumiai ba i famamafaia pudaa ramaꞌa, ina nara ba i fiꞌalagipaꞌai aꞌana.
20 Maꞌuaa nenee fei naranarana fei, hemea aloꞌaloo mei Fasu na faꞌarewa aꞌana laloo mefina ma na ware, “Joseph, mena naꞌuu David, apuna maꞌau ba o duginaa Mary humumu aleꞌei haromu, uaa fei na toro laloo iana, paꞌana aꞌa fei Spiriti Apuna. 21 I wanininaa hemea baduu wawane ma onei roroinaa harana Jesus,c uaa i fatelaꞌanaa ei ramaꞌaa gufuna aꞌa ei hafeloꞌaa roꞌou.”
22 Ei manumanu ei, paꞌafina ba i fafaꞌuainaa tamanu mei Fasu nadii wareia aꞌa mei mamamaꞌa: 23 “Mei nanao aꞌuꞌuanarai atawe dinaa aꞌa hemea wawane, i paꞌi iana ma i wanininaa hemea baduu wawane ma roꞌaa roroinia Immanuel”—hanuna ba “Mei Haidaa i aꞌa oꞌou.”