Fei Waniniaa Jesus
2
I aꞌa ei arewaa ei, Caesar Augustus na fatalainaa fei wareana ba ronei wareinaa puduu ei ramaꞌaa minaa ei gufu i Rome. 2 (Fei, fei rawarawa wawarei ramaꞌa rona utonia aꞌa fei au Quirinius mei gavanaa yei Syria.) 3 Ma hememea na hadiweꞌidinaa gufuna ba i augaa fei harana. 4 Ma Joseph na diꞌininaa Nazareth i Galilee ma dinaa Bethlehem, fei gufuu David i Judea, uaa hia noranamai aꞌa fei gufuu David ma hia hemea upuna. 5 Ina dinaa yei ba i au haraa lagua Mary, mei na ugainia ba i lalainia ma na paꞌi iana. 6 Ei lagua yei, na fiꞌi uguna 7 ma na wanininaa mei umaꞌua naꞌuna, baduu wawane. Na fahawainia aꞌa ei lawalawa ma fudugia laloo hepalo udeꞌudee hanaa ei manulelele uaa fei humuu maꞌigua na pepesu.
Ei Omaꞌamaꞌaa ei Sipsipi ma ei Aloꞌalo
8 Ma na paꞌi hefiꞌa omaꞌamaꞌaa sipsipi i podu bamai, roi omaꞌamaꞌaa ei hapee roꞌou poi. 9 Hemea aloꞌaloo mei Fasu na faꞌarewa aꞌa roꞌou ma fei haweraa mei Fasu namina weꞌainaa roꞌou ma ronamina maꞌaufafelo. 10 Maꞌuaa na ware mei aloꞌalo, “Apuna maꞌau. Guainau! Yau na notonamii fei rawaniꞌa warea, fei i fani baua niꞌeniꞌea aꞌa minaa ei ramaꞌa. 11 Wagieni i aꞌa fei gufuu David, hemei Fatelaꞌana na wanini aꞌa hamuꞌodu; hia Christ,a mei Fasu. 12 Sifei, fei lalana aꞌa hamuꞌou: hamowe bapaꞌaa hemea baduu na hawai aꞌa hefiꞌa lawalawa ma na haino aꞌa fei udeꞌudee hanaa ei manulelele.”
13 Ana ei ua fei baua gupuu aloꞌalo pafea, rona faꞌarewafipuimai aꞌa mei aloꞌalo ma rona uduginaa mei Haidaa. Rona ware,
14 “Uduginaa mei Haidaa, mei na pafeai,
ma yeni malagufu i fani gutafarawania aꞌa ei ramaꞌa, ei ina niꞌeniꞌe aꞌa roꞌou.”
15 Roꞌaa diꞌininaa roꞌou ei aloꞌalo ma dinaa pafea, ei omaꞌamaꞌaa, rona fiwarewarei, “O dii. O dinaa Bethlehem ma re maꞌa fei manumanu fei, fei na warefanaa oꞌou mei Fasu.”
16 Siꞌei rona aunubatafalao ma maꞌapaꞌaa Mary, Joseph ma mei baduu, mei i haino aꞌa fei udeꞌudee hanaa manulelele. 17 Roꞌaa maꞌadigia, rona fatalainaa fei uꞌugaa mei baduu, fei rona guainia aꞌa ei aloꞌalo. 18 Ma minaa ei rona guainia, namina nanawala pudaa roꞌou aꞌa ei uꞌugaa ei omaꞌamaꞌaa ei sipsipi. 19 Maꞌuaa Mary na aunaa naranarana ei manumanu ei ma gutafiloginia iana. 20 Ei omaꞌamaꞌaa, rona hadiweꞌai ma laugiꞌuduginaa mei Haidaa uaa minaa ei manumanu rona guainia ma fanunuia, ana aleꞌei roꞌaa warefanaa roꞌou.
Rona Poronaa Jesus i Humuu mei Haidaa
21 Aꞌa fei fafainaroaa arewaa, aꞌa fei au ba roꞌaa moroꞌaa fei hudii wawaneina, rona roroinia Jesus, fei hara mei aloꞌalo na fania ei atawe toro.
22 I pedu fei nunufaꞌaraiaa roꞌou aleꞌei fei wareaa fei Law Moses, Joseph ma Mary, laguna noduginaa hia Jerusalem ba laguꞌaa fania panii mei Fasu 23 (aleꞌei fei neꞌiaa fei Law mei Fasu, “Minaa ei umaꞌua wawane hamonei apunainaa roꞌou aꞌa mei Fasu”), 24 ma ana laguna dii ba laguꞌaa fani fanaa lagua ba i neneraa fei Law mei Fasu ba lagunei fani: “guapalo pune, o guapalo naꞌuu padu.”
25 Ma na paꞌi hemea yei Jerusalem, harana Simeon. Na wanewane fei maumauna ma na maꞌauaa mei Haidaa. Ifi gutaꞌomaꞌaa fei au ba i pedu fei faloloaꞌiaa Israel. Ma fei Spiriti Apuna na oa i pafona. 26 Hefei Spiriti Apuna nadii faꞌarewaia aꞌana ba loꞌe i maꞌe hawina na fanunuaa mei Christ, mei apunaiaa mei Fasu. 27 Na fani naranarana fei Spiriti ma ina dinaa malalaa fei humuu mei Haidaa. Amana ma inana, laguꞌaa poroꞌamii mei baduu Jesus ba laguꞌaa bigiꞌaa tamanu na wareia fei Law, 28 Simeon na poroꞌia ma uduginaa mei Haidaa ma ware:
29 “Mena Bauana, mena Fasu, ana aleꞌei onadii faꞌunainia,
oneipowe alofatatalainaa mei nafimu uaa nawe rawani fei naranarau.
30 Uaa gueini pudau na fanunudigaa fei talaa telaꞌana,
31 fei ona raꞌaꞌaugia i pudaa minaa ei ramaꞌa,
32 hepalo weꞌai ba i faꞌarewainaa fei naranaraa ei Gentile
ma i fani hawera aꞌa ei gufumu Israel.”
33 Laguei amana ma inana, laguna maduofo aꞌa ei warewareana hia. 34 Ma Simeon na haweginaa roꞌou ma warenaa aꞌa Mary, mei inana, “Meni baduu meni, ipowe fapasiaa watauda ma faꞌasiꞌanaa watauda yeni Israel ma iwe aleꞌei hepalo lala aꞌa roꞌou ma rowe warefafeloia 35 ba ei naranaraa watauda ipowe arewa. Ma hepalo wadu iwe paugaa fei naranaramu anaa.”
36 Ana na paꞌi hemea pifine mamamaꞌa, harana Anna, mei naꞌuu Phanuel aꞌa fei maroaa Asher. Hia paꞌaa hopi; famaꞌa na gutafipui aꞌa mei harona oloromeai igisimasi nenee fei lalaiana 37 ma na guta unaia nopaꞌaloo fei ba na paꞌi fainaroa paꞌania ma obao igisimasina.b Lomi ba ina u diꞌininaa fei humuu mei Haidaa, maꞌuaa naꞌaida lolosui arewaa ma poi, naꞌo fabao ma lafulafu. 38 Ma i noꞌulao aꞌa roꞌou, na ware ‘ta’ aꞌa mei Haidaa ma uꞌugaa mei baduu aꞌa minaa ei roi gutaꞌomaꞌomaꞌaiaa fei ponohadiweꞌaiaa Jerusalem.
39 Joseph ma Mary, laguꞌaa bigidigaa minaa ei wareaa fei Law mei Fasu, laguna hadiweꞌinaa Galilee, dinaa gufuu lagua Nazareth. 40 Ma mei baduu fi gipelao, na nomaꞌualao raraa ununa. Namina bauana apaꞌana ma fei rawaniꞌaa mei Haidaa na oa i aꞌana.
Mei Baubara Jesus i Humuu mei Haidaa
41 Minaa ei igisimasi laguei amana ma inana, lagunaꞌaida dinaa Jerusalem aꞌa fei Hananaa fei Talai Falogia. 42 I nopaꞌaloo hefua ma guai igisimasina, rona tafanelao aꞌa fei Hananaa, aleꞌei fei maumau roꞌou. 43 I pedu fei hananaa, laguꞌei hadiweꞌinaa gufu amana ma inana, mei baubara Jesus na guta ua yei Jerusalem, maꞌuaa loꞌe laguna aida. 44 Laguna nara ba hia aꞌa lagua ma laguna talailao aleꞌei heai arewaa. Ma lagunawe labaginia dupuaa ei maroa ma tafii lagua. 45 Loꞌe laguna labagipaꞌia, laguna hadiweꞌinaa Jerusalem ba laguꞌaa labaginia. 46 Nenee oduꞌai arewaa laguna paꞌia malalaa fei humuu mei Haidaa. Ina guta dupuaa ei feroia. Ina guguainaa roꞌou ma iꞌiginaa ei iꞌigiana. 47 Ma minaa ei rona guainia, namina nanawala pudaa roꞌodu aꞌa fei apaꞌana ma ei wareana. 48 Amana ma inana, laguꞌaa maꞌapaꞌia, laguna baꞌarofo. Mei inana na warenaa aꞌana, “Onaꞌuu, tani o bigiꞌia aleꞌei aꞌa haigua? Haigua mei amamu, haiguna narafatemu ei haigua labaginio.”
49 Ina iꞌigai, “Tani hamugua lalabaginau? Lomi hamuna aida ba yau nei guta i humuu mei Amau?” 50 Maꞌuaa lomi laguna apaꞌia tamanu fi wareia aꞌa lagua.