John, mei Pudugufaia na Raꞌaa fei Tala
3
I laloo fei hefua ma fahaipaniaa igisimasi haparaiaa Tiberius Caesar—aꞌa fei au Pontius Pilate mei gavanaa Judea, Herod, hia haparaa obao gufu yei Galilee ma mei lofuna Philip, hia haparaa obao gufu fawelei Iturea ma Traconitis. Ma Lysanias, hia haparaa obao gufu yei Abilene. 2 Aꞌa fei au laguei paꞌaa bauaniaa humuu mei Haidaa, Annas ma Caiaphas, fei wareaa mei Haidaa na nomai aꞌa John mei naꞌuu Zechariah, yei fawelei lomi haihai o guana. 3 Ina aunupedunaa aꞌa minaa ei gufu yei Jordan ma uꞌu ba ronei filoginaa naranaraa roꞌou ma pudugufai ba i futo ei hafeloꞌaa roꞌou. 4 Ana aleꞌei fei neꞌiaa mei mamamaꞌa Isaiah laloo fei buꞌu: “Fei lao hemea na haroharo yei fawelei loꞌe haihai o guana,
‘Raꞌafanaa fei talaa mei Fasu,
fawanewaneaa ei talana.
5 Minaa ei walefoa hamonei raupaduia,
minaa ei maugeni hamonei agifamatalaia.
Ei tala na wawadi hamonei fawanewaneia,
ei tala na eraꞌeraa, hamonei famareꞌaia.
6 Ma minaa ei ramaꞌaa ano rowe fanunuaa fei talaa telaꞌanaa mei Haidaa.’”
7 John na warenaa aꞌa fei gupuu ramaꞌa rona nomai aꞌana ba roꞌaa pudugufai, “Hamuꞌou ena naꞌuu waꞌa hafelo! Hini na faꞌaiaa hamuꞌou ba hamonei ponipaꞌai aꞌa fei sibana, fei fi nomai? 8 Ei maumau hamuꞌou nei famaꞌaia ba na filogidii ei naranaraa hamuꞌou. Hamoneiꞌawe nara ba, ‘Hamatee haiꞌouna paꞌaa Abraham, amaa haiꞌou. Uaa a warefanaa hamuꞌodu ba nabaa i nunumiai mei Haidaa, i faꞌasiꞌanaa eni mugoo ba naꞌuu Abraham. 9 Fei poa na udedii aꞌa ei waraa ei haihai ma hepapalo haihai lomi na paꞌi rawaniꞌa fuana, i rereia ma siminaa hafi.”
10 Fei gupuu ramaꞌa, rona iꞌigai, “Nabaa aleꞌei, haiꞌou bigiꞌaa tamanu?”
11 John na ware, “Mei na paꞌi guapalo susuna nei alaginia aꞌa mei lomi na paꞌi ma mei na paꞌi duꞌua ana nei bigiꞌia aleꞌei.”
12 Ei otonaa mugoo poꞌii gavaman, ana rona nomai ba roꞌaa pudugufai. Rona iꞌigai, “Feroia, haiꞌodu batanai?”
13 “Hamoneiꞌawe to hefiꞌadiai mugoo poꞌi na muainaa puduu fei ba hamoꞌaa tonia.”
14 Ma hefiꞌa foꞌaa, rona iꞌiginia, “Ma haiꞌodu batanai?”
“Apuna foꞌaa ramaꞌa ba hamoꞌaa tonaa mugoo poꞌii roꞌou ma apuna warefasifi ba mei na tata ma hamonei wawanene ua aꞌa ei ponoꞌaa hamuꞌou.”
15 Ei ramaꞌa, rona u omaꞌa ua ma naranara laloo iaa roꞌou ba woro John mei Christ.a 16 John na warefanaa roꞌodu, “Yau na pudugufainaa hamuꞌou ranu.b Maꞌuaa hemea na faufaudiai aꞌau iwe nomai, hemea yau lomi na rawani ba a fabalouꞌalaraa wao hafena pinena. Iwe pudugufainaa hamuꞌou wagii fei Spiriti Apuna ma fei hafi. 17 Ina paꞌi waduu panina ba i nueitonaa ei rawaniꞌa wheat aꞌa ei meme. Iwe augaa ei wheat laloo palena, maꞌuaa ei meme, i siminaa fei hafi lomi i peretoo.” 18 Aꞌa wataudadiai warea, John na warefaweꞌi aꞌa ei ramaꞌa ma uꞌugaa fei rawaniꞌa warea aꞌa roꞌodu.
19 Maꞌuaa, John na hotaꞌaa Herod mei haparaa obao gufu, uaa na tafitafiaa Herodias, mei haroo lofuna ma na paꞌidiai watauda hafeloꞌa bigiꞌana. 20 Siꞌei, Herod na fahonodiai hepalo hafeloꞌana: Ina fawiꞌaa John humuu boboꞌaia.
Fei Pudugufaiaa Jesus
21 Ei roi pudugufai minaa ei ramaꞌa, Jesus ana na pudugufai. Ma ei fi lafulafu, na gigi fei gufu pafea 22 ma fei Spiriti Apuna, maumauna aleꞌei pune, na pasigio pafona. Ma hepalo lao na warerai gufu pafea: “Yoi mena Naꞌuu, mena una haguio; Unamina niꞌeniꞌe aꞌamu.”
Ei Upuu Jesus
23 Ma Jesus na paꞌi aleꞌei odufua paꞌania igisimasina ei i faꞌasiꞌanaa fei bigiꞌana. Ei ramaꞌa na nara ba hia mei naꞌuu Joseph,
mei naꞌuu Levi, mei naꞌuu Melki,
mei naꞌuu Jannai, mei naꞌuu Joseph,
25 mei naꞌuu Mattathias, mei naꞌuu Amos,
mei naꞌuu Nahum, mei naꞌuu Esli,
mei naꞌuu Mattathias, mei naꞌuu Semein,
mei naꞌuu Josech, mei naꞌuu Joda,
27 mei naꞌuu Joanan, mei naꞌuu Rhesa,
mei naꞌuu Zerubbabel, mei naꞌuu Shealtiel,
mei naꞌuu Addi, mei naꞌuu Cosam,
mei naꞌuu Elmadam, mei naꞌuu Er,
29 mei naꞌuu Joshua, mei naꞌuu Eliezer,
mei naꞌuu Jorim, mei naꞌuu Matthat,
mei naꞌuu Judah, mei naꞌuu Joseph,
mei naꞌuu Jonam, mei naꞌuu Eliakim,
31 mei naꞌuu Melea, mei naꞌuu Menna,
mei naꞌuu Mattatha, mei naꞌuu Nathan,
mei naꞌuu Obed, mei naꞌuu Boaz,
mei naꞌuu Salmon,c mei naꞌuu Nahshon,
33 mei naꞌuu Amminadab, mei naꞌuu Ram,d
mei naꞌuu Hezron, mei naꞌuu Perez,
mei naꞌuu Isaac, mei naꞌuu Abraham,
mei naꞌuu Terah, mei naꞌuu Nahor,
35 mei naꞌuu Serug, mei naꞌuu Reu,
mei naꞌuu Peleg, mei naꞌuu Eber,
mei naꞌuu Arphaxad, mei naꞌuu Shem,
mei naꞌuu Noah, mei naꞌuu Lamech,
37 mei naꞌuu Methuselah, mei naꞌuu Enoch,
mei naꞌuu Jared, mei naꞌuu Mahalalel,
mei naꞌuu Seth, mei naꞌuu Adam,
mei naꞌuu mei Haidaa.