3 I aꞌana minaa ei manumanu na mamaramai. Lomi hepalo manumanu na mamaramai ba abaa famamarana. 4 I aꞌana na paꞌi harenua ma fei harenua fei, weꞌai ramaꞌa. 5 Fei weꞌai na weꞌa laloo fei roromaa, maꞌuaa fei roromaa lomi na apaꞌia.^a

6 Ina nomai hemea ramaꞌa, aloamiaa mei Haidaa; harana, John. 7 Fei paꞌafina ba i nomai, sifei ba i uꞌugaa fei weꞌai ba minaa ei ramaꞌa, ronei narafaweꞌi. 8 Ana hia, abaa fei weꞌai; na noꞌuamai ba i uꞌugaa fei weꞌai. 9 Fei paꞌaa weꞌai, fei ba i weꞌainaa minaa ei ramaꞌa fi nomai yeni malagufu.^b

10 Ina guta i malagufu ma ana hia na famamaraiaa feni malagufu maꞌuaa, feni malagufu, lomi na fanunuꞌapaꞌia. 11 Ina dinamii aꞌa ei gufuna maꞌuaa, lomi rona taufagutania. 12 Maꞌuaa minaa ei rona taufagutania, ei rona narafaweꞌi aꞌa fei harana, ina uga ba roꞌou, naꞌuu mei Haidaa— 13 maꞌuaa abaa naꞌu aleꞌei pai ramaꞌa,^c o nunumiaa helagui fiharoi, uaa waniniaa mei Haidaa.

14 Fei Warea nawe pigioa ma na pagi gutanana i dupuaa oꞌou. Ona maꞌadigaa fei hawerana, fei haweraa mei Hemea Ua,^d mei noramiana aꞌa mei Ama, nofininamii fei rawaniꞌa ma fei faꞌuaia.

15 John fi uꞌugia. Ina haroharo ma ware, “Simeni, meni unadii uꞌugia ba, ‘Mei i nomai neneu na muainau, uaa hia, rawarawaa haigua.’” 16 Aꞌa fei baua rawaniꞌana, minaa oꞌou na todigaa watauda hawegia. 17 Uaa, ina fanamiaa Moses fei law. Fei rawaniꞌa ma fei faꞌuaia noranamai aꞌa Jesus Christ. 18 Lomi hemea na fanunupaꞌaa mei Haidaa maꞌuaa, mei Naꞌuu mei Haidaa, mei Hemea Ua,^e mei na oafipui aꞌa mei Ama, hia na famaꞌaia.

19 Ei Jew, rona aloaa ei bauaniaa humuu mei Haidaa ma ei Levi ba ronei iꞌiginaa John ba hia hini. Sifeni, feni uꞌugana aꞌa roꞌou yei Jerusalem. 20 Lomi na ufamadumu ua, maꞌuaa namina uꞌu ua ba, “Yau, abaa Christ.”^f

21 Rona iꞌiginia, “Haa, ma yoi hini? Yoi Elijah?”

Ina ware, “Abaa yau.”

“Yoi mei Mamamaꞌa?”

Ina ware, “Lomi.”

22 Ronawe ware, “Yoi hini? Onei warefanaa haiꞌou ma haiꞌouꞌaree warefanaa ei rona aloamii haiꞌou. O ware ba yoi hini ma ramaꞌa bata?”

23 John na wareaa ei wareaa Isaiah, mei mamamaꞌa, “Yau fei lao na haroharo fawelei lomi haihai o guana, ‘Raꞌaꞌaugaa fei talaa mei Fasu.’”

24 Ma hefiꞌa ei aloamii roꞌou, Pharisee, 25 rona iꞌiginia, “Nabaa faꞌua, hamatani o pudugufinaa ei ramaꞌa nabaa yoi abaa mei Christ, o Elijah, o mei Mamamaꞌa?”

26 John na ware, “Una pudugufinaa ramaꞌa ranu^g maꞌuaa hemea na u dupuaa hamuꞌou, hemea lomi hamona apaꞌia. 27 Hia mena i nomai neneu, mena lomi na rawani ba a alaraa fei supinena.”

28 Ei manumanu ei, rona bigiꞌia yei Bethany pepei adii fei Ranu Jordan, fawelei fi pudugufai wagina John.

29 I noꞌarewadilao, John na fanunupaꞌaa Jesus fi nomai aꞌana ma na ware, “Maꞌalao, fei Naꞌuu Sipsipii mei Haidaa, fei na tonaa ei hafeloꞌaa feni malagufu! 30 Simeni, meni una uꞌugia ba, ‘Mei i nomai neneu, na muainau, uaa hia rawarawaa haigua.’ 31 Yau ana lomi na apaꞌia, maꞌuaa ena a nomai ma pudugufinaa ramaꞌa ranu, sifei ba inei arewa aꞌa ei Israel.”

32 John na uꞌu ba, “Una fanunupaꞌaa fei Spiriti na falorogio pafea. Fei maumauna aleꞌei pune ma na faloro pafona. 33 Lomi ba a apaꞌia maꞌuaa, mei na aloau ba nei pudugufinaa ramaꞌa ranu, na warefanau ba, ‘Mei ona fanunupaꞌia ba na faloronaa pafona fei Spiriti, simena, mena i pudugufinaa ramaꞌa Spiriti Apuna.’ 34 Una fanunudigia ma uꞌufanaa hamuꞌou ba hia, Naꞌuu mei Haidaa.”

35 I noꞌarewadilao, John na gutadiai aꞌa helagui otalai nenerana. 36 I fanunupaꞌaa Jesus fi talailao, ina ware, “Maꞌalao, fei Naꞌuu Sipsipii mei Haidaa!”

37 Laguꞌaa guainaa fei wareana fei laguei otalai nenerana, laguna neneraa Jesus. 38 Jesus na diarai, maꞌapaꞌaa lagua ma na iꞌiginaa lagua, “Tamanu nunumiaa hamugua?”

Laguna ware, “Rabbi” (hanuna ba Feroia), “Ona maꞌigu hitani?”

39 Ina ware, “Nomai ma hamuwe aida.”

Siꞌei, lagunaree maꞌa fei nopana ma laguna gutafipui aꞌana fei arewaa fei. Fei au fei, obao idoꞌo fafi.

40 Andrew, mei lofuu Simon Peter, hia hemea laguei na guainaa ei wareaa John ma na neneraa Jesus. 41 Fei rawarawa bigiꞌaa Andrew, sifei ba nadoꞌo labaginaa mei lofuna Simon ma warefania, “Haiꞌouna bapaꞌaa mei Messiah” (hanuna ba mei Christ). 42 Ma ina duginaa hia aꞌa Jesus.

Jesus na fanununaa aꞌana ma ware, “Yoi Simon, mei naꞌuu John. Rowe roroinio Cephas” (hanuu fei ba Peter).^h

43 I noꞌarewadilao, Jesus na nara ba i dinaa Galilee. I bapaꞌaa Philip, na warenaa aꞌana, “Nenerau.”

44 Philip, ana aleꞌei Andrew ma Peter; gufuna Bethsaida. 45 Philip na bapaꞌaa Nathanael ma na warefania, “Haiꞌouna bapaꞌaa mei na neꞌinia Moses aꞌa fei Law, mei ana rona neꞌinia ei mamamaꞌa—Jesus, mei Nazareth, mei naꞌuu Joseph.”

46 Nathanael na iꞌigai, “Nazareth! Ana i paꞌi hepalo rawaniꞌa manumanu i norai yei?”

Philip na ware, “Mi maꞌaia.”

47 I fanunupaꞌaa Nathanael fi nomai, Jesus na wareia, “Simeni, hemea paꞌaa Israel, lomi hepalo sifiꞌa aꞌana.”

48 Nathanael na iꞌigai, “Tani o apaꞌau?”

Jesus na ware, “Una maꞌapaꞌio oifi guta haroo fei haihai figi ma nenee fei, na harofio Philip.”

49 Nawe ware Nathanael ba, “Rabbi, yoi Naꞌuu mei Haidaa; yoi mei Haparaa Israel.”

50 Jesus na ware,ⁱ “Ona nara aleꞌei uaa una warefanio ba na maꞌapaꞌio oifi guta haroo fei haihai figi. Owe fanunuaa hefiꞌadiai manumanu i muainaa fei.” 51 Ma na waredilao, “A warefaꞌuai aꞌamu^j ba owe^k fanunuaa fei gigei pafea iwe gigi ma ei aloꞌaloo mei Haidaa, roifi nogio aꞌa mei Naꞌuu Ramaꞌa ma hadiweꞌidinaa pafea, minaa aleꞌei bigiꞌaa roꞌou.”