4 Jesus na ware, “Mena rawaniꞌa pifine, tani o fihupuꞌinau aꞌa feni? Atawe nomai fei auu.”

5 Mei inana na warenaa aꞌa ei nafi, “Bigiꞌaa tamanu i wareia aꞌa hamuꞌou.”

6 Na ude farafiꞌi oloroa peꞌii ranu, bigiꞌaa roꞌou mugoo. Ma wagii fei mau losuia roꞌou, ronaꞌo fesufesu aꞌa eꞌei ei Jew. Hepapalo peꞌi na hawia aleꞌei watolaa fainaroa paꞌania amaꞌanaa hefa puꞌu ma enu paꞌania litre.^a

7 Jesus na warefanaa ei nafi, “Igi ranu laloo ei peꞌii ranu”; siꞌei, rona igifamereaa roꞌou.

8 Ma na warenaa aꞌa roꞌou, “Nadii, gufi maꞌida ma re fanaa mei bauaniaa feni hananaa.”

Rona bigiꞌia 9 ma mei bauaniaa fei hananaa na hunumaꞌaiaa fei ranu, fei na filoginaa wine. Lomi ina aida ba noramiana hitani maꞌuaa, ei nafi, ei roꞌaa gufinamai, rona aida. Ma ina haroꞌuꞌugainaa mei wawanee lalaia 10 ma ware, “Ei ramaꞌa, ronaꞌaida augaa ei rawaniꞌa wine famaꞌa ma roꞌaa hunudigaa watauda ei, ronawe augaa ei lomi namina rawani; maꞌuaa, yoi onadii aumaꞌaiaa ei rawaniꞌa.”

11 Hefei, fei rawarawa hilalaa foigia bigiꞌaa Jesus yei Cana i Galilee. Aꞌa fei, ina famaꞌaiaa fei hawerana ma ei otalai nenerana na narafaweꞌi aꞌana.

12 Nenee fei, ina upunaloo Capernaum fipuinaa mei inana ma ei lofuna mawe ei otalai nenerana. Ma rona guta yei hefiꞌa arewaa.

13 Ei ana i paꞌaa fei au fei Talai Falogiaa ei Jew, Jesus na fanenaloo Jerusalem. 14 I malalaa fei humuu mei Haidaa na maꞌapaꞌaa ei ramaꞌa roi aloaa ei budumaꞌao, sipsipi mawe ei pune ma hefiꞌa, rona guta aꞌa ei tawa, roi filoginaa ei mugoo poꞌi. 15 Siꞌei, na fifigaa ei wao ba babu ma na teteaa minaa roꞌou fipuinaa ei sipsipi ma budumaꞌao ba ronei diꞌininaa malalaa fei humuu mei Haidaa. Ina bailarofinaa ei mugoo poꞌi, ei rona filoginia ma hadupeduaa ei tawaa roꞌou. 16 Aꞌa ei roi alo pune, ina ware, “Tofaꞌasiꞌanaa ano eꞌeni! Tani hamoꞌaa filoginaa humuu mei Amau ba humuu aloꞌaloo manumanu?”

17 Ei otalai nenerana, rona nonominaa fei neꞌia ba: “Namina fuaꞌonau fei niꞌeniꞌeau aꞌa fei humumu.”

18 I dii, ei Jew rona ware, “O bigiꞌaa tamanu hilalaa foigia i pudaa haiꞌou aleꞌei famaꞌamaꞌaa haiꞌou ba na paꞌi foraforamu ba o bigiꞌaa eꞌei?”

19 Jesus na warenaa aꞌa roꞌou, “Birosiaa feni humuu mei Haidaa ma awe faꞌufalaraidinia laloo oduai arewaa.”

20 Ei Jew, rona ware, “Feni humuu mei Haidaa feni, faduaa roꞌou laloo gunaroa paꞌania ma oloroa igisimasi. Ma yoi, ba o fadudinia laloo oduai arewaa?” 21 Maꞌuaa fei humuu mei Haidaa, fei hia fi warewareia, ana fei hudi ununa. 22 Nenee fei asiꞌanana aꞌa ei maꞌea, ei otalai nenerana na nonominaa tamanu inadii wareia. Ma ronawe aida ba paꞌaa faꞌua ei wareaa fei Buꞌu Apuna ma Jesus.

23 Ifi guta yei Jerusalem aꞌa fei Hananaa fei Talai Falogia, watauda na fanunuaa ei hilalaa foigia na bigiꞌia ma narafaweꞌi aꞌa fei harana.^b 24 Maꞌuaa Jesus, lomi ba i faꞌarewafarawani aꞌa roꞌou, uaa ina apaꞌaa minaa ei ramaꞌa. 25 Lomi na nunuminia ba hemea i uꞌugaa hemeadiai, uaa na aida ei naranaraa ramaꞌa.